SME ຄືທ່າແຮງຍູ້ການເຕີບໂຕເສດຖະກິດໃນການເຊື່ອມໂຍງເສດຖະກິດອາຊຽນ

“ການກ້າວເຂົ້າເປັນປະຊາຄົມເສດຖະກິດອາຊຽນຂອງ ສປປ ລາວໃນທ້າຍປີ 2015 ນີ້ແມ່ນມີທັງກາລະໂອ ກາດ ແລະ ສິ່ງທ້າທາຍຫລາຍດ້ານ, ສະນັ້ນຖ້າຫົວໜ່ວຍ ທຸລະກິດຂະໜາດນ້ອຍ ແລະ ກາງ (SME) ມີຄວາມພ້ອມດີກໍຈະເປັນຫົວ ຈັກທີ່ມີກຳລັງແຮງຂັບເຄື່ອນການພັດທະ ນາປະເທດໃນອະນາຄົດ” ນີ້ແມ່ນຄຳ ເຫັນບາງຕອນຂອງທ່ານ ພູເພັດ ຄຳພູນວົງ ລັດຖະມົນຕີປະຈຳຫ້ອງວ່າການລັດ ຖະບານ, ປະທານຄະນະປັບປຸງທຸລະກິດແຫ່ງຊາດໃນໂອກາດກ່າວເປີດການສຳມະນາພິເສດໃນຫົວຂໍ້ : “ ສປປ ລາວ ໂອກາດແຫ່ງການກ້າວກະໂດດ” ຊຶ່ງຈັດຂຶ້ນໃນວັນທີ 15 ມິຖຸນານີ້, ທີ່ສຳນັກງານຕະຫລາດຫລັກຊັບລາວທີ່ນະຄອນຫລວງ ວຽງຈັນ.

ທ່ານ ພູເພັດ ກ່າວວ່າ: ພາຍຫລັງປະເທດເຮົາໄດ້ຈັດຕັ້ງປະຕິບັດນະໂຍບາຍປ່ຽນແປງໃໝ່ຂອງພັກ ໂດຍສະ ເພາະ ແມ່ນການປະຕິຮູບກົນໄກການຄຸ້ມຄອງເສດຖະກິດລວມສູນຫັນໄປສູ່ການຄຸ້ມຄອງຕາມກົນໄກຕະຫລາດທີ່ມີການດັດສົມຂອງລັດ ແລະ ການເປີດກວ້າງການຮ່ວມມືທາງດ້ານເສດຖະກິດກັບຕ່າງປະເທດ, ອັນພົ້ນເດັ່ນແມ່ນການປະຕິ ບັດມະຕິກອງປະຊຸມ ໃຫຍ່ຄັ້ງທີ 9 ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VII

(2011-2015) ເຫັນວ່າຫົວໜ່ວຍວິສາຫະກິດ, ທຸລະກິດຢູ່ປະເທດເຮົາໄດ້ມີຈຳນວນເພີ່ມຂຶ້ນ ແລະ ຂະຫຍາຍຕົວຢ່າງວ່ອງໄວ, ໂດຍສະເພາະຫົວໜ່ວຍວິສາຫະກິດຂະໜາດນ້ອຍ ແລະ ກາງ(SME), ໄດ້ກາຍເປັນກຳລັງແຮງຕົ້ນຕໍ່ໃນການຂັ ບເຄື່ອນການພັດທະນາເສດຖະກິດຂອງຊາດຢ່າງຕໍ່ເນື່ອງ, ຂະນະດຽວກັນຕະຫລາດທຶນກໍໄດ້ຮັບການສ້າງຕັ້ງ ແລະ ພັດທະນາຂຶ້ນ ແລະ ເປັນຊ່ອງທາງໃໝ່ຂອງການລະດົມທຶນຈາກສັງຄົມເຂົ້າໃນການພັດທະນາເສດ ຖະກິດ-ສັງຄົມ ຂອງປະເທດໃຫ້ຂະຫຍາຍຕົວໃນຈັງຫວະໄວ, ແຕ່ແນວໃດກໍຕາມ, ໃນເງື່ອນໄຂຂອງການເຊື່ອມໂຍງຮ່ວມມືສາກົນ ທີ່ນັບມື້ນັບກ້າວເຂົ້າສູ່ລວງເລິກ ແລະ ກວ້າງຂວາງຄືດັ່ງປັດຈຸບັນນີ້, ເຫັນວ່າຄວາມຮຽກຮ້ອງຕ້ອງການຂອງ ການແຂ່ງຂັນກັບພາກພື້ນ ແລະ ສາກົນກໍຍິ່ງນັບມື້ສູງຂຶ້ນເປັນຕົ້ນ: ການປະຕິບັດຫລັກການຂອງອົງການການຄ້າໂລກ (WTO) ຫລື ຫລັກການຂອງປະຊາຄົມເສດຖະກິດອາຊຽນ(AEC), ເຊິ່ງເຫັນວ່າບໍ່ມີການຈຳແນກການປະ ພຶດປະຕິບັດນຳກັນ, ລຶບລ້າງທຸກການຜູກຂາດ ແລະ ເຄື່ອນໄຫວເສລີໃນການຊຳລະສະສາງດ້ວຍເງິນຕາ, ການເຄື່ອນຍ້າຍຂອງກຳລັງແຮງງານ ແລະ ມ້າງບັນດາສິ່ງກີດຂວາງຕ່າງໆຕໍ່ລະບົບການຄ້າ ແລະ ບົນຫລັກການເງື່ອນໄຂທີ່ ວ່ານັ້ນວິສາຫະກິດຢູ່ປະເທດເຮົາ, ໂດຍສະເພາະວິສາຫະກິດຂະໜາດນ້ອຍ ແລະ ກາງ ຈະມີສິ່ງທີ່ເປັນກາລະໂອກາດຄື: ຜະລິດຕະພັນສີນຄ້າຈາກປະເທດພວກເຮົາຈະມີຕະຫລາດຈຳໜ່າຍກວ້າງໃຫຍ່ຂຶ້ນ, ສະພາບແວດລ້ອມຂອງການ ດຳເນີນທຸລະກິດມີຄວາມສະເໝີພາບ, ມີຄວາມສາມາດເຂົ້າເຖິງຕະຫລາດຕ່າງປະເທດຢ່າງສະດວກງ່າຍດາຍກວ່າເກົ່າ, ຂະນະດຽວກັນສິ່ງທີ່ເປັນບັນຫາທ້າທາຍ

ໃຫຍ່ຫລວງກໍແມ່ນການແຂ່ງຂັນທີ່ມີລັກສະນະດຸເດືອດບົນພື້ນຖານຄວາມຕ້ອງການຂອງຕະຫລາດທີ່ສູງຂຶ້ນ, ຄວາມເຂັ້ມແຂງຂອງວິສາຫະກິດພວກເຮົາໃນເງື່ອນໄຂດັ່ງກ່າວຫລາຍດ້ານຍັງມີຂໍ້ຈຳກັດ ເຊັ່ນ: ດ້ານຖານະການເງິນອ່ອນນ້ອຍ, ລະບົບເຕັກໂນໂລຊີນຳໃຊ້ເຂົ້າໃນການຜະລິດບໍ່ທັນສະໄໝ, ຄວາມຮູ້ຄວາມສາມາດໃນການຄຸ້ມຄອງບໍລິຫານຍັງບໍ່ເຂັ້ມແຂງ, ລະດັບສີມືແຮງງານຂອງພະນັກງານ, ກຳມະກອນບໍ່ທັນສູງ, ຄຸນນະພາບຂອງສີນຄ້າບໍ່ທັນດີ, ທັງມີປະ

ລິມານໜ້ອຍ, ແຕ່ຕົ້ນທຶນຂອງການຜະລິດພັດສູງ, ຊຶ່ງທັງໝົດນີ້ນັບວ່າເປັນບັນຫາທີ່ພວກເຮົາທີ່ຈະຕ້ອງໄດ້ມີການຄົ້ນຄວ້າ ແລະ ຊອກຊ່ອງທາງແກ້ໄຂໂດຍໄວ, ເຊິ່ງເຊື່ອໝັ້ນວ່າການຈົດທະບຽນໃນຕະຫລາດຫລັກຊັບກໍແມ່ນວິທີໜຶ່ງໃນການເສີມສ້າງຄວາມເຂັ້ມແຂງໃຫ້ແກ່ທຸລະກິດເພື່ອຮອງຮັບການແຂ່ງຂັນໃນຍຸກແຫ່ງການເຊື່ອມໂຍງພາກພື້ນ ແລະ ສາກົນ,ໂດຍສະເພາະກໍແມ່ນປະຊາຄົມເສດຖະກິດອາຊຽນໄດ້ເປັນຢ່າງດີ.

     ສຳລັບການສຳມະນາດັ່ງກ່າວ, ແມ່ນດຳເນີນໄປເປັນເວລາເຄິ່ງມື້, ຈັດຂຶ້ນໂດຍການຮ່ວມມືລະຫວ່າງຕະຫລາດຫລັກຊັບລາວ, ຕະຫລາດຫລັກຊັບແຫ່ງປະເທດໄທ, ໜັງສືພິມບາງກອກໂພສ, ໂພສທູເດ ແລະ ບໍລິສັດຫລັກຊັບເອພິເອັມລາວເຊິ່ງມີຜູ້ປະກອບການຈາກບໍລິສັດ, ຫົວໜ່ວຍທຸລະກິດທັງພາຍໃນ ແລະ ຕ່າງປະເທດ, ນັກລົງທຶນ ແລະ ສະຖາບັນການເງິນເຂົ້າຮ່ວມເປັນຈຳນວນຫລາຍ.