ຜູ້​ເສຍ​ຊີວິດ​ຈາກ​ອຸປະຕິ​ເຫດຢູ່ນະຄອນຫລວງວຽງຈັນ ​ໄດ້​ກາຍ​ເປັນ​ລາຍ​ວັນ

   

 ພຽງວັນທີ 7-13 ກັນຍານີ້, ຢູ່​ນະຄອນຫລວງ​ວຽງຈັນ ມີອຸປະຕິເຫດເກີດຂຶ້ນ 30 ກໍລະນີ, ສົ່ງ​ຜົນ​ໃຫ້ມີຜູ້ເສຍຊີວິດ 6 ຄົນ, ໄດ້ຮັບບາດເຈັບສົມຄວນ 23 ຄົນ, ສາຫັດ 3 ຄົນ, ມີພາຫະນະເປ່ເພເສຍຫາຍຫລາຍ ມີ​ມູນ​ຄ່າ​ຫລາຍກວ່າ 280 ລ້ານກີບ.

     ເຈົ້າໜ້າທີ່ ໃຫ້ຮູ້ວ່າ: ​ເຫດ​ຮ້າຍ​ແຮງ​ໄດ້​ເກີດ​ຂຶ້ນ ໃນຕອນຄ່ຳຂອງວັນທີ 9 ກັນຍາ, ຢູ່ເຂດບ້ານນາໄຮ່ຄຳ, ມີລົດໃຫຍ່ຄັນ​ໜຶ່ງປິ້ນ ເຮັດໃຫ້ຜູ້ຂັບຂີ່ ອາຍຸ 39 ປີ ຢູ່ບ້ານນາໄຊ ເມືອງໄຊເສດຖາ ເສຍຊີວິດຄາທີ່, ໃນຕອນເຊົ້າມືດຂອງວັນຕໍ່ມາ, ຢູ່ເຂດບ້ານດົງປາ ແຫລບ ເມືອງຈັນທະບູລີ, ໄດ້ເກີດເຫດລົດໃຫຍ່ ເສຍຫລັກຕຳເສົາໄຟຟ້າຢ່າ​ງ​ແຮງ ເຮັດໃຫ້ຜູ້​ຂັບ​ຂີ່ ອາຍຸ 25 ປີ ຢູ່ບ້ານໂພນສີນວນ ເມືອງໄຊເສດຖາ ເສຍຊີວິດຄາທີ່ ແລະ ຕອນເຊົ້າຂອງວັນດຽວກັນ ຮັບສົ່ງນັກສຶກສາໄປຝຶກງານ ເສຍຫລັກຕຳເອົາຕົ້ນໄມ້ຢູ່ແຄມທາງ​ເຂດ​ບ້ານ​ສະພັງ​ມຶກ ເຮັດໃຫ້ນັກ​ສຶກສາ ​ເສຍຊີວິດ 2 ຄົນຄື: ທ້າວ ວິລະເພັດ ອາຍຸ 16 ປີ ແລະ ທ້າວ ລັກສະມັນ ອາຍຸ 18 ປີ, ເຊິ່ງທັງສອງຢູ່ບ້ານດ່ານຊ້າງ ເມືອງໄຊທານີ ​

ແລະ ໃນຕອນຄ້າຍແລງຂອງວັນທີ 12 ກັນຍານີ້, ຢູ່ເຂດບ້ານສົມປະເສີດ ເມືອງປາກງື່ມ ໄດ້ເກີດເຫດລົດໃຫຍ່ຕຳລົດຈັກ ເຮັດໃຫ້ຜູ້ຂັບຂີ່ລົດຈັກ ອາຍຸ 24 ປີ ຢູ່ບ້ານດັ່ງກ່າວ ເສຍຊີວິດຄາທີ່ ແລະ ໃນຕອນດຶກຂອງວັນດຽວກັນ, ຢູ່ ເຂດບ້ານດົງປາແຫລບ ເມືອງ ຈັນທະບູລີ ໄດ້ເກີດເຫດລົດຈັກຕຳທ້າຍລົດໃຫຍ່ທີ່ຈອດຢູ່ແຄມທາງ ເຮັດໃຫ້ຜູ້ຂັບຂີ່ລົດຈັກອາຍຸ 28 ປີ ຢູ່ບ້ານໜອງປິງ ເມືອງຈັນທະບູລີ ເສຍຊີວິດຄາທີ່.

    ຈາກສະພາບ​ດັ່ງກ່າວ ເຫັນວ່າ​ປັດຈຸບັນມີອຸປະຕິເຫດເພີ້ມຂຶ້ນເປັນຈຳນວນຫລາຍ, ດັ່ງນັ້ນ ຈຶ່ງເຕືອນມາຍັງນັກຂັບຂີ່ຈົ່ງ​ເອົາ​ໃຈ​ໃສ່ປະຕິບັດກົດລະບຽບຈາລະຈອນໃຫ້ເຂັ້ມງວດເພື່ອຫລຸດຜ່ອນອຸປະຕິເຫດທີ່ຮ້າຍແຮງຕາມມາ.