ກອງປະຊຸມໃຫຍ່ຄັ້ງທີ I ຂອງອົງຄະນະພັກກະຊວງພາຍ, ໄດ້ອັດລົງດ້ວຍຜົນສໍາເລັດຈົບງາມໃນວັນທີ 11 ກັນຍານີ້,ພາຍຫລັງດໍາເນີນມາເປັນເວລາ 2 ວັນ, ໂດຍການໃຫ້ກຽດເຂົ້າຮ່ວມຂອງສະຫາຍ ອາຊາງ ລາວລີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ກອງປະຊຸມໄດ້ເປັນເອກະພາບເລືອກເອົາສະຫາຍ ຄໍາໝັ້ນ ສູນວິເລີດເປັນເລຂາຄະນະພັກສະໄໝທີ I, ສະຫາຍ ຄໍາມູນ ວິພົງໄຊ ເປັນຮອງເລຂາ ແລະ ສະຫາຍ ສີພຸກ ວົງພັກດີ ເປັນປະທານກວດກາ, ສະຫາຍ ດວງມະນີ ສຸວັນໂນ
ແລະ ສະຫາຍ ທອງວັນ ສີສະຫວັນ ເປັນຮອງປະທານກວດກາ, ພ້ອມທັງຄັດເລືອກເອົາຜູ້ແທນເຂົ້າຮ່ວມກອງປະຊຸມໃຫຍ່ຄັ້ງທີ X ຂອງພັກທີ່ຈະມີຂຶ້ນໃນຕໍ່ໜ້ານີ້.
ໃນໂອກາດດັ່ງກ່າວ, ສະຫາຍ ອາຊາງ ລາວລີ ໄດ້ໃຫ້ກຽດໂອ້ລົມຊີ້ນໍາຕໍ່ຄະນະພັກຊຸດໃໝ່, ຊຶ່ງໄດ້ເນັ້ນໃຫ້ຍົກສູງຄວາມຮັບຜິດຊອບຂອງຕົນເພື່ອເສີມຂະຫຍາຍຜົນສໍາເລັດ ແລະ ແກ້ໄຂບັນດາຂໍ້ຄົງຄ້າງ, ຈັດຕັ້ງປະຕິບັດບັນດາທິດທາງ, ແຜນການທີ່ກອງປະຊຸມວາງອອກໃຫ້ມີຜົນສໍາເລັດ, ເອົາໃຈໃສ່ເຊີດຊູພາລະບົດບາດ ແລະ ຄວາມສາມາດໃນການເຄື່ອນ
ໄຫວວຽກງານວິຊາສະເພາະຂອງຂະແໜງພາຍໃນໃຫ້ສູງຂຶ້ນຕື່ມອີກ, ເອົາໃຈໃສ່ປັບປຸງວຽກງານຄຸ້ມຄອງລັດຖະກອນໃຫ້ເຂັ້ມແຂງບົນພື້ນຖານສ້າງ ແລະ ປັບປຸງນິຕິກໍາກ່ຽວຂ້ອງ, ປັບປຸງລະບົບການພັດທະນາ, ຄົ້ນຄວ້າບັນດາຄ່າຕອບແທນ ແລະ ການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນວຽກງານຄຸ້ມຄອງລັດຖະກອນ ແລະ ອື່ນໆ. ສົມທົບກັບອົງການປົກຄອງທ້ອງຖິ່ນເພື່ອກໍານົດສິດ, ໜ້າທີ່ ແລະ ຄວາມຮັບຜິດຊອບດ້ານການບໍລິຫານລັດ ແລະ ການຄຸ້ມຄອງເສດຖະກິດ-ສັງຄົມຂອງທ້ອງຖິ່ນແຕ່ລະຂັ້ນບົນພື້ນຖານເພີ່ມສິດ, ເພີ່ມຄວາມຮັບຜິດຊອບໃຫ້ທ້ອງຖິ່ນ, ກວດ ກາ ແລະກໍານົດໂຄງປະກອບກົງຈັກຂອງອົງການປົກຄອງເມືອງ ແລະ ບ້ານໃຫ້ມີກໍາລັງແຮງພຽງພໍກັບຄວາມຮັບຜິດ ຊອບທີ່ມອບໝາຍໃຫ້, ຕ້ອງເອົາໃຈໃສ່ວຽກງານທີ່ມີລັກສະນະລະອຽດອ່ອນເປັນຕົ້ນແມ່ນວຽກງານກ່ຽວກັບຊົນເຜົ່າ, ສາສະໜາ, ສະມາຄົມ, ມູນນິທິ ແລະ ວຽກງານຄຸ້ມຄອງພົນລະເມືອງ, ຕ້ອງໄດ້ຄົ້ນຄ້ວາ, ສ້າງ ແລະ ປັບປຸງບັນດານິຕິກໍາທີ່ກ່ຽວຂ້ອງໃຫ້ຮັດກຸມຕື່ມເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນເອກະພາບ, ສຸມໃສ່ແກ້ໄຂບັນຫາເຂດແດນເຊື່ອມຕໍ່ລະຫວ່າງທ້ອງຖິ່ນຂັ້ນຕ່າງໆ, ວຽກງານກ່ຽວກັບແຜນທີ່, ສໍາເນົາເອກະສານ, ການແຂ່ງຂັນ ແລະ ການຍ້ອງຍໍອື່ນໆໃຫ້ຮັດກຸມມີປະສິດທິຜົນດີກວ່າເກົ່າ.
No comments:
Post a Comment