ລັດຖະບານຍີ່ປຸ່ນໃຫ້ການຊ່ວຍເຫຼືອການບໍລິການສຸຂະພາບແມ່ ແລະ ເດັກແຂວງຜົ້ງສາລີ

ລັດຖະບານຍີ່ປຸ່ນໄດ້ໃຫ້ການສະໜັບສະໜຸນ ເພື່ອສົ່ງເສີມການບໍລິການສຸຂະພາບແມ່ ແລະ ເດັກໃນ ສປປ ລາວ ໂດຍຜ່ານຫຼາຍໂຄງການຕະຫຼອດມາ ຄືໂຄງການຊ່ວຍເຫຼືອລ້າເພື່ອປັບປຸງການບໍລິການສຸຂະພາບແມ່ ແລະ ເດັກທີ່ແຂວງຜົ້ງສາລີໃນຄັ້ງນີ້ມີມູນຄ່າ 298.300 ກວ່າໂດລາສະຫະລັດ ເຊິ່ງຈະເລີ່ມຈັດຕັ້ງປະຕິບັດໃນເດືອນພະຈິກ 2015 ນີ້ ​ເຊິ່ງພິທີເຊັນສັນຍາໂຄງການດັ່ງກ່າວໄດ້ຈັດຂຶ້ນ​ໃນ​ວັນ​ທີ 2 ພະຈິກ​ນີ້ ທີ່ສະຖານທູດຍີ່ປຸ່ນປະຈຳ ສປປ ລາວ ລະ ຫວ່າງທ່ານ ຮິ​ໂຣ​ຢູ​ກິ ກີຊີໂນະ ເອກອັກຄະລາຊະທູດຍີ່ປຸ່ນປະຈໍາ ສປປ ລາວ ​ແລະ ທ່ານນາງ ໂນະລິໂກະ ອັນໂດະ ຜູ້ບໍລິຫານໂຄງການຂອງສະມາຄົມຊ່ວຍເຫຼືອ ແລະ ສົງເຄາະແຫ່ງປະເທດຍີ່ປຸ່ນ ຫຼື AAR Japan ເຊິ່ງເປັນອົງການບໍ່ຫວັງຜົນກຳໄລ ໂດຍມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ໂດຍຜ່ານໂຄງການດັ່ງກ່າວ, ອົງການ AAR Japan ຈະມອບອຸປະກອນການແພດໃຫ້ແກ່ໂຮງໝໍແຂວງ, ໂຮງໝໍເມືອງ ແລະ ສຸກສາລາ 2 ແຫ່ງ ພ້ອມທັງຈັດການເຝິກອົບຮົມວິທີການນຳໃຊ້ ແລະ ຮັກສາອຸປະກອນດັ່ງກ່າວອີກດ້ວຍ.

ນອກຈາກນີ້ ທາງອົງການ AAR Japan ຈະສ້າງຄວາມອາດສາມາດໃຫ້ແກ່ແພດທີ່ປະຈຳຢູ່ສຸກສາລາ ເພື່ອເຮັດໃຫ້ລະບົບການບໍລິການສຸຂະພາບແມ່ ແລະ ເດັກມີ​ຄວາມເຂັ້ມແຂງ ແລະ ປັບປຸງການບໍລິການສຸຂະພາບຂອງປະຊາຊົນທ້ອງຖິ່ນດີຂຶ້ນ​ເພື່ອຊ່ວຍຫຼຸດຜ່ອນອັດຕາການເສຍຊີວິດຂອງແມ່ ແລະ ເດັກຫລຸດຜ່ອນ​ລົງ.

ນັບ​ແຕ່​ປີ 2000 ​ເປັນຕົ້ນມາ, ອົງການ AAR Japan ໄດ້ສະໜັບສະໜູນໂຄງການຕ່າງໆ ເພື່ອສົ່ງເສີມຄວາມເຂັ້ມ ແຂງຂອງຄົນພິການ ໂດຍຜ່ານການຜະລິດລໍ້ນັ່ງຄົນພິການທີ່ນະຄອນຫຼວງວຽງຈັນ ແລະ ສ້າງຄວາມອາດສາມາດຂອງພະນັກງານສາທາລະນະສຸກ ເພື່ອຊ່ວຍເຫຼືອຜູ້ເຄາະຮ້າຍຈາກລະເບີດທີ່ບໍ່ທັນແຕກ (UXO) ທີ່ແຂວງຊຽງຂວາງຢ່າງ​ມີ​ຜົນສຳ​ເລັດ.