ປະຊາຊົນບ້ານຫົວຂົວ ​ແລະ ໜອງໜ່ຽງສະເໜີພາກສ່ວນກ່ຽວຂ້ອງກວດກາລະບົບໄຟເຍືອງທາງ

ປະຊາຊົນທີ່ຢູ່ລຽບ​ຕາມເສັ້ນທາງບົງຕົງແຕ່ບ້ານຫົວຂົວໄປຮອດບ້ານໜອງໜ່ຽງ ເມືອງໄຊເສດຖາ,ນະ ຄອນຫລວງວຽງຈັນ, ຕ້ອງການໃຫ້ພາກສ່ວນກ່ຽວຂ້ອງລົງກວດກາລະບົບໄຟເຍື່ອງທາງໃນເສັ້ນທາງດັ່ງກ່າວໃຫ້ສາມາດເປີດນໍາໃຊ້ໄດ້, ພາຍຫລັງເຫັນວ່າສໍາເລັດການຕິດຕັ້ງລະບົບໄຟເຍືອງມາເປັນເວລາດົນແລ້ວ​ແຕ່​ບໍ່​ໄດ້​ນຳ​ໃຊ້ ເຊິ່ງບັນຫາດັ່ງກ່າວ, ໄດ້ສ້າງຄວາມຫຍຸ້ງຍາກໃຫ້ແກ່ການສັນຈອນໄປມາຂອງພາຫະນະໃນຍາມຄໍ່າຄືນ, ໂດຍສະເພາະມີຄວາມສ່ຽງເປັນອັນຕະລາຍຈາກອຸປະຕິເຫດແລະເປັນຊ່ອງຫວ່າງໃຫ້ຄົນບໍ່ດີສວຍໂອກາດລົງມືກໍ່ເຫດປຸ້ນຊັບ-ຊິງຊັບຕ່າງໆຄືດັ່ງເຄີຍເກີດຜ່ານມາຫລາຍຄັ້ງ. ດັ່ງນັ້ນໃນໂອກາດທີ່ພາກສ່ວນກ່ຽວຂ້ອງພວມດໍາເນີນການປົວແປງລະບົບໄຟເຍືອງທາງໃນເຂດເທດສະບານນະຄອນ ຫລວງວຽງຈັນເພື່ອຄໍານັບຮັບຕ້ອນວັນປະຫວັດສາດສໍາຄັນຂອງຊາດທີ່ຈະມາເຖິງນີ້, ກໍຂໍສະເໜີໃຫ້ພາກສ່ວນກ່ຽວຂ້ອງໄດ້ລົງກວດກາປົວແປງທາງໃນເຂດທີ່ກ່າວມານັ້ນຕື່ມ, ເຊິ່ງເປັນເສັ້ນທາງສໍາຄັນສາຍໜຶ່ງທີ່ຕັດຜ່ານຕົວເມືອງອອກສູ່ຊານເມືອງ ແລະ ມີພາຫະນະສັນຈອນໄປມາຫລວງຫລາຍໃນແຕ່ວັນ ແລະ ການປົວແປງ ​ແລະ ໃຫ້ສາມາດເປີດນໍາໃຊ້ໄດ້, ນອກຈາກເປັນການສ້າງແສງສະຫວ່າງເພື່ອອໍານວຍຄວາມສະດວກແກ່ການສັນຈອນໄປມາໃນຍາມຄໍ່າຄືນແລ້ວ, ຍັງສາມາດຊ່ວຍ

ຫລຸດຜ່ອນອຸປະຕິເຫດ ແລະ ສະກັດກັ້ນບັນດາປາກົດການຫຍໍ້ທໍ້ອື່ນໆຂອງສັງຄົມຫລຸດລົງ ​ແລະ ທັງເປັນການປະກອບສ່ວນເຂົ້າໃນການກະກຽມໃຫ້ແກ່ການສະເຫລີມສະຫລອງວັນປະຫວັດສາດສໍາຄັນຂອງຊາດຄື: ສະເຫລີມສະຫລອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ, ກອງປະຊຸມໃຫຍ່ຄັ້ງທີ X ຂອງພັກປະຊາຊົນປະຕິວັດລາວ, ກອງປະຊຸຸມສຸດຍອດອາຊຽນໃນປີ 2016 ແລະ ອື່ນໆເພື່ອໃຫ້ຮັບປະກັນຄວາມເປັນລະບຽບຈົບງາມ, ສະຫງົບ, ປອດໄພ ແລະ ເຮັດໃຫ້ການຈັດຕັ້ງປະຕິບັດນະໂຍບາຍ 6 ສ, ໂດຍສະເພາະສສະອາດ, ສ ສະຫວ່າງ, ສ ສະຫງົບ, ສ ສີຂຽວ ປາກົດຜົນເປັນຈິງເທື່ອລະກ້າວ.