ລາວຈະຈັດການແຂ່ງຂັນທຸລະກິດດີເດັ່ນອາຊຽນ (ABAL 2016) ເປັນຄັ້ງທຳອິດເພື່ອຊີງລາງວັນໃນລະດັບພາກພື້ນ

           ວັນທີ 15 ມີນານີ້, ທ່ານ ອຸເດດ ສຸວັນນະວົງ ປະທານສະພາທີ່ປຶກສາທຸລະກິດອາຊຽນ ໄດ້ຖະແຫລງຕໍ່ສື່ມວນຊົນວ່າ: ຈະມີການຈັດ ງານແຂ່ງຂັນທຸລະກິດດີເດັ່ນອາຊຽນຂອງລາວ ປະຈຳປີ 2016 (ABAL 2016) ວ່າ: ການຈັດງານຄັ້ງນີ້ເປັນຄັ້ງທຳອິດຂອງປະເທດເຮົາ ເພື່ອເປັນການຍ້ອງຍໍ, ຊົມເຊີຍບັນດາວິສາຫະກິດ, ທຸລະກິດ, ອຸດສາຫະກຳຕ່າງໆ ທີ່ເຫັນວ່າມີຄວາມດີເດັ່ນ, ພ້ອມທັງເປັນການສ້າງຄວາມເຂັ້ມແຂງ ແລະ ເຮັດໃຫ້ນັກທຸລະກິດຂອງລາວ ມີຄວາມສາມາດໃນການແຂ່ງຂັນກັບສາກົນໄດ້ເທື່ອລະກ້າວ ແລະ ຜູ້ໄດ້ຮັບລາງວັນຊະນະເລີດ ຈາກງານດັ່ງກ່າວແລ້ວ ຈະຖືກສົ່ງເຂົ້າຮ່ວມແຂ່ງຂັນໃນລະດັບອາຊຽນ, ເຊິ່ງຈະເປັນການພົບກັບບັນດາຫົວໜ່ວຍທຸລະກິດທີ່ມີຊື່ສຽງໃນລະດັບສາກົນ ແລະ ພາກພື້ນ.

          ທ່ານຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດ, ທັງເປັນປະທານຈັດງານດັ່ງກ່າວ ໃຫ້ຮູ້ວ່າ: ບັນດາຫົວໜ່ວຍທຸລະກິດໃນລາວ ບໍ່ວ່າຈະນ້ອຍ ຫລື ໃຫຍ່ ແມ່ນສາມາດຢືນໃບສະໝັກເຂົ້າຮ່ວມແຂ່ງຂັນໄດ້ທຸກປະເພດ, ເຊິ່ງເງື່ອນໄຂຕ່າງໆແມ່ນສາມາດເຂົ້າໄປສອບຖາມກັບພະນັກ ງານຂອງສະພາການຄ້າ ແລະ ອຸດສາຫະກຳ ໄດ້ທຸກເວລາບໍ່ໃຫ້ກາຍວັນທີ 30 ເມສານີ້, ສ່ວນການປະກາດຜົນຈະມີຂຶ້ນໃນທ້າຍເດືອນມີຖຸນາ 2016, ຈາກນັ້ນ ການປະກາດຜົນໃນລະດັບພາກພື້ນຈະມີຂຶ້ນໃນເດືອນກັນຍາ 2016 ນີ້ເຊັ່ນດຽວກັນ, ມີຫລາຍປະເພດລາງວັນຄື: ລາງວັນທຸລະກິດບູລິມະສິດຂອງລາວດີເດັ່ນ 1 ລາງວັນ, ລາງວັນທຸລະກິດຂະໜາດນ້ອຍດີເດັ່ນ 2 ລາງວັນ, ລາງວັນພິເສດ 1 ລາງວັນ, ລາງວັນທຸລະກິດດີເດັ່ນ ຄົບຮອບ 40 ປີ ມີ 10 ລາງວັນ.