ນະຄອນຫລວງ ສະຫລຸບວຽກງານສະກັດກັ້ນ ແລະ ຕ້ານຢາເສບຕິດ

          ວັນທີ 16 ສິງຫານີ້, ຢູ່ຫ້ອງວ່າການນະຄອນຫລວງວຽງຈັນ, ໄດ້ຈັດກອງປະຊຸມສະຫລຸບວຽກງານການຈັດຕັ້ງປະຕິບັດ ເປີດຂະບວນການເພີ້ມທະວີສະກັດກັ້ນ, ປາບປາມ ແລະ ແກ້ໄຂເປົ້າໝາຍທີ່ພົວພັນກັບຢາເສບຕິດ ແລະ ລະດົມທຶນຂັ້ນບ້ານ ຢູ່ 9 ບ້ານ, 9 ເມືອງໃນນະຄອນຫລວງວຽງຈັນ, ໂດຍການເປັນປະທານຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີທ່ານ ກຸ ຈັນເສນາ ປະທານກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ, ພ້ອມດ້ວຍຫົວໜ້າ ປກສ 9 ເມືອງອ້ອມຂ້າງນະຄອນຫລວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.

          ທ່ານ ຊື່ນຊ່ວງ ດວງຕາວິໄລ ຮອງປະທານຜູ້ປະຈຳການ, ຫົວໜ້າຫ້ອງການຄະນະກຳມະການ ກວດກາ ແລະ ຄວບຄຸມຢາເສບຕິດ ນະຄອນຫລວງວຽງຈັນ ໄດ້ລາຍງານ ວ່າ: ເພື່ອຮັບປະກັນໃຫ້

ນະຄອນຫລວງວຽງຈັນ ມີສະຖຽນລະພາບທາງດ້ານການເມືອງ, ມີຄວາມເປັນລະບຽບຮຽບຮ້ອຍທາງສັງຄົມຢ່າງໜັກແໜ້ນ ປະກອບສ່ວນເຂົ້າໃນການປະຕິບັດ ແລະ ພັດທະນາ ນະຄອນຫລວງວຽງຈັນໃຫ້ມີຄວາມກ້າວໜ້າ ແລະ ປອດຈາກສິ່ງເສບຕິດ, ເຮັດໃຫ້ບັນຫາຢາເສບຕິດໃນພື້ນທີ່ນະຄອນ ຫລວງວຽງຈັນ ເປັນຕົ້ນກຸ່ມຄ້າຂາຍ, ກຸ່ມເສບ, ກຸ່ມສ່ຽງຕ່າງໆ ໃຫ້ຫລຸດໜ້ອຍຖອຍລົງເທື່ອລະກ້າວນັ້ນ ຈຶ່ງໄດ້ດຳເນີນການເປີດຂະບວນການຈັດຕັ້ງປະຕິບັດຕົວຈິງຢູ່ຂັ້ນບ້ານ ນັບແຕ່ເດືອນມີນາຫາມີຖຸນາ, ໂດຍນຳໃຊ້ຍຸດທະສາດ ແລະ ມາດຕະການແກ້ໄຂ 4 ດ້ານເຊັ່ນ: ໂຄສະນາສຶກສາອົບຮົມ, ແກ້ໄຂດ້ານວິຊາສະເພາະວຽກ ປກສ, ແກ້ໄຂດ້ານລະບຽບກົດໝາຍ ແລະ ແກ້ໄຂດ້ານມີສ່ວນຮ່ວມຂອງປະຊາຊົນ. ຜ່ານການຈັດຕັ້ງປະຕິບັດວຽກງານດັ່ງກ່າວ ໃນຂອບເຂດ 9 ບ້ານໃນ 9 ເມືອງທົ່ວນະ ຄອນ ຫລວງວຽງຈັນ, ປະກອບມີ ບ້ານນາລ້ອມ, ເມືອງໄຊທານີ, ບ້ານໄຮ່ ເມືອງປາກງື່ມ, ບ້ານດົງໂພນແຮ່, ເມືອງຫາດຊາຍຟອງ, ບ້ານດົງຫລວງ, ເມືອງນາຊາຍທອງ, ບ້ານແສງສະຫວ່າງ, ເມືອງໄຊເສດຖາ, ບ້ານຈັນສະຫວ່າງ, ເມືອງສີໂຄດຕະບອງ, ບ້ານທົ່ງຂັນຄຳ, ເມືອງຈັນທະບູລີ, ບ້ານດອນກອຍ, ເມືອງສີສັດຕະນາກ ແລະ ບ້ານໂຄກເພີງ, ເມືອງສັງທອງ, ມີປະຊາກອນທັງໝົດ 24.683 ຄົນ, ຍິງ 12.514 ຄົນ, ໃນນັ້ນ ເປົ້າໝາຍພົວພັນກັບຢາເສບຕິດ 1.098 ຄົນ, ຍິງ 79 ຄົນ, ກວດພົບສານເສບຕິດໃນຮ່າງກາຍ 468 ຄົນ, ຍິງ 46 ຄົນ, ຂໍ້ມູນການຊັກທອດເປົ້າໝາຍບ້ານອື່ນ 449 ຄົນ, ຍິງ 40 ຄົນ, ກວດພົບຈຸດມົ້ວສຸມ 33 ຈຸດ, ກວດກາຈຸດມົ້ວສຸມ ພົບຜູ້ຂາຍຢາເສບຕິດ 4 ຄົນ, ຂອງກາງຢາບ້າ 32 ເມັດ ໂດຍມອບໃຫ້ພະແນກຕະຫລວດສະກັດກັ້ນ ແລະ ຕ້ານຢາເສບຕິດ ນະຄອນ ຫລວງວຽງຈັນ ດຳເນີນຄະດີ, ຜູ້ເສບທີ່ມີອາການຮ້າຍແຮງໄດ້ນຳສົ່ງສູນສົມສະ ຫງ່າ 6 ຄົນ, ແບ່ງຂັ້ນຄຸ້ມຄອງ ຂັ້ນບ້ານ 763 ຄົນ, ຂັ້ນເມືອງ 778 ຄົນ ແລະ ຂັ້ນນະຄອນຫລວງວຽງຈັນ 10 ຄົນ, ສະເລ່ຍ ມີຜູ້ພົວພັນຢາເສບຕິດເຖິງ 4,44% ຂອງຈຳນວນປະຊາກອນທັງໝົດ.

          ນອກນີ້ ຍັງໄດ້ປະຕິບັດຕາມ 4 ມາດຖານ ແລະ  10 ບາດກ້າວກິດຈະກຳຂອງການສ້າງບ້ານປອດຢາເສບຕິດ ແລະ ບົດແນະນຳຂອງຄະນະກຳມະການແຫ່ງຊາດເພື່ອກວດກາ ແລະ ຄວບຄຸມຢາເສບຕິດ, ໂດຍການສ້າງຄອບຄົວປອດຢາເສບຕິດໃນ 9 ບ້ານຂອງ 9 ເມືອງ ໄດ້ທັງໝົດ 4.739 ຄອບ ຄົວ, ໃນນັ້ນ ສາມາດອອກໃບຢັ້ງຢືນເປັນຄອບຄົວປອດຢາເສບຕິດໄດ້ 3.867 ຄອບຄົວ, ສະເລ່ຍ 77,04% ແລະ ສ້າງໜ່ວຍປອດຢາເສບຕິດ ໄດ້ 367 ໜ່ວຍ ແລະ ສາມາດອອກໃບຢັ້ງຢືນໃຫ້ໄດ້ພຽງ 78 ໜ່ວຍ, ສະເລ່ຍ 13,73%.