ຂະແໜງກະສິກໍາຈະຊຸກຍູ້ການຜະລິດລະດູຝົນໃຫ້ແຂງແຮງກວ່າເກົ່າ

            ກະຊວງກະສິກໍາ ແລະ ປ່າໄມ້, ຈະເພີ່ມທະວີຊຸກຍູ້ວຽກງານການຜະລິດລະດູຝົນຂອງຊາວກະສິກອນໃນທົ່ວປະເທດໃຫ້ແຂງແຮງ ແລະ ເປັນຂະບວນຟົດຟື້ນກວ່າເກົ່າ, ເພື່ອເຮັດໃຫ້ການຜະລິດບັນລຸແຜນການວາງໄວ້, ພາຍຫລັງເຫັນວ່າສະພາບການຜະລິດລະດູແລ້ງໃນໄລຍະຜ່ານມານັ້ນແມ່ນຫລຸດຄາດໝາຍຫລາຍສົມຄວນ.

            ກົມປູກຝັງກະຊວງດັ່ງກ່າວໃຫ້ຮູ້ວ່າ: ແຜນການປູກເຂົ້ານາປີທົ່ວປະເທດໃນລະດູຝົນປີນີ້ໄດ້ວາງຄາດໝາຍໄວ້ທັງໝົດ 7,8 ແສນກວ່າເຮັກຕາ, ສະມັດຕະພາບສະເລ່ຍ 4,3 ໂຕນຕໍ່ເຮັກຕາ, ຜົນຜະລິດ 3,4 ລ້ານໂຕນ. ສ່ວນພືດລະດູຝົນອື່ນໆຄາດວ່າຈະໃຫ້ບັນລຸໄດ້ຫລາຍກວ່າ 1,3 ລ້ານໂຕນ, ໃນນັ້ນສາລີ ແລະ ພືດຕະກູນຖົ່ວໃຫ້ໄດ້ຫລາຍກວ່າ 3,5 ແສນໂຕນ, ເຜືອກ-ມັນປະມານ

75 ພັນໂຕນ, ພືດພັກອື່ນໆຫລາຍກວ່າ 737 ພັນໂຕນ ແລະ ໝາກໄມ້ຕາມລະດູການໃຫ້ໄດ້ເກັບກູ້ 166 ພັນໂຕນ ຈຶ່ງຈະສາມາດຮັບປະກັນການຕອບສະໜອງຄວາມຕ້ອງການຂອງຕະຫລາດກໍຄືສັງຄົມຢ່າງພຽງພໍ ແລະ ເພື່ອບັນລຸຄາດໝາຍດັ່ງກ່າວຂະແໜງກະສິກໍານັບແຕ່ສູນກາງຮອດທ້ອງຖິ່ນຕ້ອງໄດ້ເພີ່ມທະວີການສົ່ງພະນັກງານ, ວິຊາການລົງປຸກລະດົມ, ຊຸກຍູ້ສົ່ງເສີມ ແລະ ແນະນໍາຊາວກະສິກອນໃຫ້ສຸມໃສ່ການຜະ ລິດຂອງຕົນໃຫ້ຫລາຍຂຶ້ນ ແລະ ຖືກຕ້ອງຕາມເຕັກນິກວິຊາການ, ພ້ອມທັງສ້າງເງື່ອນໄຂອໍານວຍຄວາມສະດວກຕ່າງໆແກ່ການຜະລິດ ເຊັ່ນ: ສະໜອງນໍ້າ, ຝຸ່ນ ແລະ ອຸປະກອນຮັບໃຊ້ການຜະລິດ ອື່ນໆ ເພື່ອຮັບປະກັນໃຫ້ໄດ້ການຜະລິດທີ່ຫລາຍ ແລະ ສະມັດຕະພາບຜົນຜະລິດໃຫ້ສູງຂຶ້ນ.

           ກົມດັ່ງກ່າວໃຫ້ຮູ້ວ່າ: ສໍາລັບການປູກເຂົ້ານາແຊງໃນທົ່ວປະເທດສົກປີນີ້ແມ່ນບໍ່ບັນລຸຕາມແຜນການວາງໄວ້ຫລາຍສົມຄວນຄື: ທົ່ວປະເທດໄດ້ກໍານົດເນື້ອທີ່ທັງໝົດ 1,2 ແສນກວ່າເຮັກຕາ, ສະມັດຕະພາບ 5,1 ໂຕນຕໍ່ເຮັກຕາ, ຊຶ່ງຈະໄດ້ຜົນຜະລິດເທົ່າກັບ 612 ພັນໂຕນ, ແຕ່ຜ່ານການປະ ຕິບັດຕົວຈິງນັບແຕ່ເດືອນມີນາຫາມິຖຸນາປີນີ້ເຫັນວ່າຕົວເກັບກ່ຽວຜົນຜະລິດໄດ້ພຽງ 500 ພັນກວ່າໂຕນ, ໃນນີ້ພາກເໜືອປະຕິບັດໄດ້ຫລາຍກວ່າ 37 ພັນໂຕນ, ພາກກາງ 337 ພັນໂຕນ ແລະ ພາກໃຕ້ໄດ້ 129 ໂຕນ, ຊຶ່ງສາເຫດຕົ້ນຕໍທີ່ພາໃຫ້ການປູກເຂົ້ານາແຊງບໍ່ບັນລຸຄາດໝາຍແມ່ນພື້ນທີ່ການຜະລິດໃນຫລາຍຖິ່ນໄດ້ຮັບຜົນກະທົບຈາກໄພທໍາມະຊາດ, ສັດຕູພືດທໍາລາຍ, ການສະໜອງນໍ້າຍັງບໍ່ພຽງພໍ ແລະ ກະສິກໍາຈໍານວນໜຶ່ງໄດ້ຫັນເນື້ອທີ່ນາແຊງໄປປູກພືດຊະນິດອື່ນທີ່ມີເງື່ອນໄຂເໝາະສົມດີກວ່າ.