ອຸດົມໄຊເລັ່ງຄົ້ນຫາສານເຄມີປາບສັດຕູພືດ ແລະ ຢາຂ້າຫຍ້າທີ່ຖືກນໍ້າຊຸສູນຫາຍ

          ປັດຈຸບັນພະແນກກະສິກໍາ-ປ່າໄມ້ ແລະ ພະແນກຊັບພະຍາກອນທໍາມະຊາດ ແລະສິ່ງແວດ ລ້ອມ ແຂວງອຸດົມໄຊ, ພວມລະດົມກໍາລັງເຈົ້າໜ້າທີ່ເລັ່ງຄົ້ນຫາຖັງນໍ້າຢາເຄມີປາບສັດຕູພືດ ແລະ ຢາຂ້າຫຍ້າຂອງຜູ້ລົງທຶນປູກກ້ວຍໃນທ້ອງຖິ່ນຕົນ, ພາຍຫລັງຖືກກະແສນໍ້າພັດຊຸໄຫລສູນຫາຍເມື່ອທ້າຍອາທິດຜ່ານມານີ້.

           ທ່ານຫົວໜ້າພະແນກກະສິກໍາ-ປ່າໄມ້ ແຂວງອຸດົມໄຊ ບຸນລຽນ ວໍລະກົດ ໃຫ້ຮູ້ວ່າ: ພາຍຫລັງມີສະພາບຝົນຕົກໜັກຕິດຕໍ່ກັນຫລາຍວັນມາແຕ່ວັນທີ 11 ສິງ ຫານີ້, ໄດ້ສົ່ງຜົນໃຫ້ສາຍນໍ້າແບ່ງຍຶ່ງສູງຂຶ້ນໄຫລເຂົ້າຖ້ວມເຮືອນຊານບ້ານຊ່ອງ, ຖະໜົນຫົນທາງ ແລະ ພື້ນທີ່ການຜະລິດກະສິກໍາຂອງປະ ຊາຊົນໃນເຂດເມືອງແບ່ງ ແລະ ເມືອງຮຸນ, ແຂວງອຸດົມໄຊ, ໄດ້ຮັບຜົນເສຍຫາຍໜັກໜ່ວງເປັນບໍລິເວນກວ້າງ ແລະ ສິ່ງທີ່ໜ້າຕົກໃຈຈາກເຫດໄພທໍາມະຊາດຄັ້ງນີ້ແມ່ນສານເຄມີຂ້າຫຍ້າ ແລະ ຢາປາບສັດຕູພືດຈໍານວນບໍ່ໜ້ອຍຂອງຜູ້ລົງທຶນປູກກ້ວຍໃນທ້ອງຖິ່ນດັ່ງກ່າວທີ່ມີມູນຄ່າຫລາຍຮ້ອຍລ້ານກີບຖືກນໍ້າພັດຊຸໄຫລ

ສູນຫາຍໄປ, ຊຶ່ງບັນຫາອັນຕະລາຍນີ້ແມ່ນຕ້ອງເລັ່ງເກັບກູ້ຄືນມາໃຫ້ໄດ້ໂດຍໄວ ເພື່ອບໍ່ໃຫ້ສົ່ງຜົນກະທົບຮ້າຍແຮງຕໍ່ສິ່ງແວດລ້ອມ ແລະ ການດໍາລົງຊີວິດຂອງຄົນໃນໄລຍະຍາວ, ຊຶ່ງການຄົ້ນຫາແມ່ນສຸມໃສ່ຈຸດທີ່ເປັນສາງເກັບມ້ຽນສານເຄມີດັ່ງກ່າວທີ່ຖືກຂີ້ດິນຂີ້ຕົມທັບຖົມໜາແໜ້ນ, ຊຶ່ງສານເຄມີດັ່ງກ່າວແມ່ນເປັນສານທີ່ມີຄວາມອັນຕະລາຍຫລາຍຖ້າຫາກເກີດການແຕກ ຫລື ຮົ່ວໄຫລ ແມ່ນຈະເຮັດໃຫ້ປາຕາຍ ແລະ ສົ່ງຜົນກະທົບຕໍ່ການດໍາລົງຊີວິດຂອງປະຊາຊົນໃນເຂດດັ່ງກ່າວ, ຊຶ່ງມາ

ຮອດປັດຈຸບັນຍັງບໍ່ພົບເຫັນສະພາບປາຕາຍໃນພື້ນທີ່ດັ່ງກ່າວ ແລະ ເຂດບໍລິເວນໃກ້ຄຽງ. ແນວໃດກໍຕາມຕໍ່ກໍລະນີທີ່ເກີດນີ້, ຂະແໜງກະສິກໍາໄດ້ແຈ້ງເຖິງອໍານາດການປົກຄອງ ແລະ ປະຊາຊົນໃນພື້ນທີ່ໃກ້ຄຽງໃຫ້ມີສະຕິລະວັງໃນການຊົມໃຊ້ນໍ້າ, ໂດຍສະເພາະຫລີກລ້ຽງການໃຊ້ນໍ້າຈາກຫ້ວຍໜອງທີ່ບໍ່ຮັບປະກັນຄວາມ ສະອາດປອດໄພມາບໍລິໂພກ, ພ້ອມນີ້ເມື່ອພົບເຫັນກໍລະນີປາຕາຍຢູ່ຕາມຫ້ວຍນໍ້າຕ່າງໆແມ່ນໃຫ້ຮີບຮ້ອນແຈ້ງຕໍ່ອໍານາດການປົກຄອງ ແລະ ເຈົ້າໜ້າທີ່ກ່ຽວຂ້ອງໂດຍໄວເພື່ອລົງກວດກາແກ້ໄຂໃຫ້ທັນການ.

           ຂະນະດຽວກັນ, ທ່ານຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງອຸດົມໄຊ ສົມແກ້ວ ມະນີວັນ ໃຫ້ຮູ້ວ່າ: ປັດຈຸບັນຍັງບໍ່ທັນຮູ້ຊັດເຈນວ່າສານເຄມີທີ່ສູນຫາຍໄປນັ້ນແມ່ນເປັນສານເຄມີປະເພດໃດ, ມີຄວາມອັນຕະລາຍລະດັບໃດ ແລະ ມີປະລິມານເທົ່າໃດ, ເນື່ອງຈາກວ່າໃນໄລຍະຜ່ານມາຂະແໜງການຕົນໄດ້ຮັບຊາບແຕ່ວ່າຜູ້ລົງທຶນປູກກ້ວຍສ່ວນຫລາຍພາຍໃນແຂວງໄດ້ຮັບອະນຸຍາດພຽງແຕ່ນໍາເຂົ້າປຸຍເທົ່ານັ້ນ, ຈົນເກີດມີໄພທໍາມະຊາດຄັ້ງນີ້ຈຶ່ງຮູ້ວ່າມີສານເຄມີເສຍຫາຍ ແລະ ບໍ່ຮູ້ວ່າແມ່ນພາກສ່ວນໃດເປັນຜູ້ອະນຸຍາດໃຫ້ນໍາເຂົ້າສານເຄມີເຫລົ່ານັ້ນ, ຊຶ່ງຄາດວ່າອີກປະ ມານ 2 ວັນຈະສາມາດຮູ້ຜົນການຊອກຄົ້ນຫາສານເຄມີນີ້.