ໂດຍ: ຄຳເຜີຍ ສີຊະນະມຸງຄຸນ
ໃນປະໂຫຍກຄຳເວົ້າທີ່ກ່າວມາຂ້າງເທິງນີ້, ຢາກໝາຍເຖິງວ່າມາຮອດປັດຈຸບັນພວມກ້າວເຂົ້າສູ່ໄລຍະແຫ່ງການຜັນຂະຫຍາຍມະຕິ
10 ຂອງພັກ ໄດ້ມີຫລາຍກະຊວງ, ຫລາຍກົມກອງ
ນັບແຕ່ຂັ້ນສູນກາງລົງຮອດທ້ອງຖິ່ນຕ່າງກໍມີການຈັດຕັ້ງຮໍ່າຮຽນເຊື່ອມຊຶມມະຕິດັ່ງກ່າວຢ່າງເປັນຂະບວນກວ້າງຂວາງ
ຄືດັ່ງພວກ ເຮົາຮູ້ນຳກັນແລ້ວວ່າ: ມະຕິຄັ້ງທີ 10 ຂອງພັກປຽບເໝືອນຄໍາພີວິເສດທີ່ເປັນຫລັກມູນທາງດ້ານທິດສະດີ
ທັງເປັນເຂັມຊີ້ທິດເຍືອງທາງແຫ່ງການສ້າງສາພັດທະນາເສດຖະກິດ-ສັງຄົມຂອງປະເທດນັບແຕ່ນີ້ຫາປີ
2020.
ອີກປະການໜຶ່ງ, ມາຮອດໄລຍະນີ້ກໍເຫັນວ່າ ກອງປະຊຸມວຽກງານກວດກາທົ່ວປະເທດເບື້ອງພັກ, ເບື້ອງລັດກໍໄດ້ສຳເລັດລົງໄປແລ້ວ. ນອກຈາກນັ້ນ
ກອງປະຊຸມວຽກງານຈັດຕັ້ງ-ກໍ່ສ້າງພະນັກງານໃນທົ່ວປະເທດກໍໄດ້ສຳເລັດເຊັດຊິ້ນເປັນທີ່ຮຽບຮ້ອຍ.
ສິ່ງດັ່ງກ່າວ, ໃນສອງຂົງເຂດນີ້ມັນລ້ວນແລ້ວແຕ່ເປັນຕົວຊີ້ວັດເຖິງຊາຕາກຳຂອງປະເທດຊາດ.
ເປັນຫຍັງຈຶ່ງວ່າແນວນັ້ນ?
ຍ້ອນວ່າມັນພົວພັນເຖິງພະນັກງານ (ຄົນ) ໂດຍກົງ. ພະນັກງານຈະດີ, ມີຄຸນທາດການເມືອງ, ມີຄວາມຮູ້ຄວາມສາມາດ,
ຄຸນສົມບັດ ແລະ
ມີຄວາມສັດຊື່ບໍລິສຸດນັ້ນມັນກໍຂຶ້ນກັບລະດັບຄົນຜູ້ໜຶ່ງ.
ໃນກອງປະຊຸມວຽກງານກວດກາພັກທົ່ວປະເທດທີ່ຫາກໍສຳເລັດໄປຫວ່າງຫລັງນີ້ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຂອງພັກ ເພິ່ນກໍໄດ້ມີຄຳເຫັນຊີ້ນຳໄປແລ້ວ.
ຖ້າຈະສະຫລຸບພໍສັ້ນໆກໍແມ່ນວ່າ ນັບແຕ່ຄະນະລັດຖະບານຊຸດໃໝ່ (ຊຸດທີ 8) ໄດ້ກ້າວຂາເຂົ້າມາບໍລິຫານປົກຄອງບ້ານເມືອງກໍເຫັນວ່າໄດ້ມີປັດໄຈອັນໃໝ່ເກີດຂຶ້ນຫລາຍດ້ານ
ບໍ່ວ່າຈະເປັນເລື່ອງໄມ້,
ເລື່ອງເງິນ, ເລື່ອງສິນຄ້າ,
ນ້ຳມັນ, ພາສີ, ພະນັກງານ ແລະ ເລື່ອງອື່ນໆ ນັບທັງນິຕິກຳ ແລະ ຂອດຈັດຕັ້ງປະຕິບັດ
ນັບແຕ່ຂັ້ນສູນກາງລົງຮອດຂັ້ນທ້ອງຖິ່ນຮາກຖານ.
ໂດຍລວມແລ້ວ, ເວົ້າເລື່ອງແນວທາງຂອງພັກ, ລະບຽບກົດໝາຍຂອງລັດສ່ວນຫລາຍພວກເຮົາກໍໄດ້ພາກັນຈັດຕັ້ງຄົ້ນຄວ້າຮໍ່າຮຽນແຫລກແຫລວ
ແລະ ຊາບຊຶມຢ່າງເລິກເຊິ່ງເຖິງຖອງດີພໍສົມຄວນ ໂດຍສະເພາະແມ່ນຖັນແຖວພະນັກງານແກນນຳ, ບັນດາສະຫາຍສະມາຊິກພັກ ນັບແຕ່ຂັ້ນສູນກາງລົງຮອດທ້ອງຖິ່ນ.
ແຕ່ເມື່ອຮໍ່າຮຽນເຊື່ອມຊຶມໄປແລ້ວ, ເວົ້າເຖິງຂອດຈັດຕັ້ງປະຕິບັດບາງຄັ້ງມັນຍັງອືດປານດຶງຂາເຕົ່າ, ຍິ່ງໄປກວ່ານັ້ນ ບາງສະຫາຍ, ບາງຄົນຮູ້ແລ້ວຍັງຕ່າວພາໂລ. ຕົວຢ່າງ: ເວົ້າເລື່ອງການຫ້າມຕັດໄມ້ຍິ່ງໄປລັກຕັດເອົາຢູ່ໃນປ່າສະຫງວນ, ຫ້າມລ່າສັດປ່າຂ້າສັດນ້ຳຍັງເຫັນການຊື້ຂາຍກັນເປັນປົກກະຕິ
ໂດຍສະເພາະຢູ່ເຂດຊົນນະບົດຫ່າງໄກ, ການຊື້ຂາຍ ແລະ
ການນຳເຂົ້າ- ນໍາອອກສິນຄ້າກໍຫາທຸກວິທີ ເພື່ອ
ຫລີກເວັ້ນພາສີ,
ການເກັບລາຍຮັບເຂົ້າງົບປະມານຍັງມີການຮົ່ວໄຫລໄປຕາມຊ່ອງຫວ່າງ
ແລະ ບັນຫາອື່ນໆ. ບັນດາປາກົດການທີ່ໄດ້ຍົກມານີ້ມັນຍັງເປັນພະຍາດຕິດແປດທີ່ຍັງເກາະຫ້ອຍຢູ່ນຳພວກເຮົາຄືຄົນກັບເງົາ.
ສ່ວນວ່າຢາປົວນັ້ນມັນກໍຍັງພໍມີວິທີແກ້ ຖ້າພວກເຮົາຫາກພ້ອມກັນເຮັດ
ຄືອັນທີໜຶ່ງແມ່ນຕ້ອງຫັນມະຕິຄັ້ງທີ 10 ຂອງພັກເຂົ້າສູ່ລວງເລິກຢ່າງແຂງແຮງ ແລະ ເລິກເຊິ່ງເຖິງຖອງ. ອັນທີສອງປະຕິບັດຄຳສັ່ງເລກທີ
15
ແລະ ຄຳສັ່ງອື່ນໆຂອງທ່ານນາຍົກລັດຖະມົນຕີ, ປະຕິບັດບັນດາຄຳສັ່ງຂອງທ່ານຮອງນາຍົກ ສົມດີ ດວງດີ
ລັດຖະມົນຕີກະຊວງການເງິນ ກ່ຽວກັບການແກ້ໄຂພາຫະນະທີ່ນຳເຂົ້າຜິດກົດໝາຍ, ຄຳສັ່ງແນະນຳກ່ຽວກັບການນຳໃຊ້ເຄື່ອງມືທີ່ທັນສະໄໝ
(ເອເລັກໂຕຣນິກ) ເຂົ້າສູ່ການຄຸ້ມຄອງລາຍຮັບ ນັບທັງຄຳສັ່ງປະຕິບັດອາກອນມູນຄ່າເພີ່ມ 10% ແລະ ບັນດາມະຕິຄຳສັ່ງອື່ນໆຕາມມະຕິຂອງພັກ ແລະ ກົດໝາຍຂອງລັດ.
ຕາມເຮົາວ່າຈະເຮັດຫຍັງກໍເຮັດທຸກສິ່ງທຸກຢ່າງເບື້ອງໜຶ່ງມັນຂຶ້ນກັບຄົນຈະມີເຄື່ອງມືທັນສະໄໝດີປານໃດກໍຕາມ
ຖ້າເຮົາບໍ່ນຳໃຊ້ໃຫ້ໝົດຄຸນຄ່າເຮັດຄືໂສ້ບໍ່ເຄັ່ງມັນກໍຈະກາຍເປັນຫຸ່ນ. ຖ້າຮູ້ແລ້ວພາກັນຕ່າວພາໂລນັ້ນມັນຍິ່ງເປັນການກົດໜ່ວງຖ່ວງດຶງຄວາມຈະເລີນກ້າວໜ້າຂອງຊາດ.
ໃຫ້ພວກເຮົາ ທຸກຄົນເຂົ້າໃຈວ່າ
ການຍາດແຍ່ງແຂ່ງຂັນອັນໃດກໍຕາມຜູ້ທີ່ໄປຮອດຫລັກໄຊກ່ອນໝູ່ນັ້ນລະຄືຜູ້ຊະນະ.
ຄຳວ່າບຸນບ້ານເຮົາຄ່ອຍຫລິ້ນຄ່ອຍກິນນັ້ນເປັນຄຳເວົ້າທີ່ຫລ້າສະໄໝໄປແລ້ວ.
No comments:
Post a Comment