ຫ້ອງວ່າການສະພາແຫ່ງຊາດຕີລາຄາການເຄື່ອນໄຫວວຽກງານປະຈຳປີ

    ຫ້ອງວ່າການສະພາແຫ່ງຊາດໄດ້ຈັດກອງປະຊຸມສະຫລຸບຕີລາຄາການຈັດຕັ້ງເຄື່ອນໄຫວວຽກງານປະຈຳປີ 2012 ແລະ ກຳນົດ ທິດທາງວຽກງານປະຈຳປີ 2013 ຂຶ້ນລະຫວ່າງວັນທີ 14-16 ມີນານີ້ ຢູ່ທ່າລາດ ແຂວງວຽງຈັນ ເພື່ອແລກປ່ຽນ ແລະ ຖອດຖອນບົດຮຽນນຳກັນລະຫວ່າງຫ້ອງວ່າການສະພາແຫ່ງຊາດກັບຫ້ອງວ່າການສະພາແຫ່ງຊາດປະຈຳເຂດເລືອກຕັ້ງໃນທຸກ ເຂດເລືອກຕັ້ງທົ່ວປະເທດແນໃສ່ປັບປຸງລະບອບແບບແຜນ, ວິທີເຮັດວຽກ ແລະ ວິທີການປະສານງານໃຫ້ຄ່ອງແຄ້ວ ແລະ ມີຄຸນນະພາບດີຂຶ້ນ.

    ທ່ານ ດຣ. ອຸ່ນແກ້ວ ວຸທິລາດ ຫົວໜ້າຫ້ອງວ່າການສະພາແຫ່ງຊາດ ໄດ້ມີຄຳເຫັນວ່າ: ຫ້ອງວ່າການສະພາແຫ່ງຊາດ ໄດ້ພະ ຍາຍາມຜັນຂະຫຍາຍ ແລະ ຈັດຕັ້ງປະຕິບັດທິດທາງວຽກງານປີ 2012 ທີ່ວາງອອກໂດຍຕິດແທດກັບພາລະບົດບາດ, ສິດ ແລະ ໜ້າທີ່ຂອງຫ້ອງວ່າການສະພາແຫ່ງຊາດ ເຊິ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫລາຍປະການ, ໄດ້ບຸກບືນສູ້ຊົນ ເຮັດຫລ້ອນໜ້າທີ່ ແລະ ມີຜົນສຳເລັດທີ່ເປັນໜ້າເພິ່ງພໍໃຈໃນຫຼາຍດ້ານສະແດງອອກໃນການເປັນເສນາທິການ ດ້ານເນື້ອໃນ ໃຫ້ແກ່ກອງປະຊຸມສະພາແຫ່ງຊາດ, ຄະນະປະຈຳສະພາແຫ່ງຊາດ, ກຳມາທິການ, ຄະນະ ສສຊ ປະຈຳເຂດ ເລືອກຕັ້ງຕ່າງໆໄດ້ຮັບການປັບປຸງ ແລະ ພັດທະນາດີຂຶ້ນເປັນກ້າວໆ; ການບໍລິຫານ-ພິທີການ ແລະ ການເງິນ
ກໍໄດ້ຮັບການປັບປຸງດີຂຶ້ນອັນພົ້ນເດັ່ນແມ່ນການຄຸ້ມຄອງງົບປະມານຕາມສາຍຕັ້ງໄດ້ຫັນເຂົ້າສູ່ຄວາມເປັນລະບົບຕາມລະບຽບກົດໝາຍ; ກົງຈັກ ການຈັດຕັ້ງບຸກຄະລາກອນ,ລະບອບແບບແຜນວິທີເຮັດວຽກກໍໄດ້ຮັບການປັບປຸງໃຫ້ມີຄວາມເຂັ້ມ ແຂງສາ ມາດຮັບຮອງກັບ ຄວາມຮຽກຮ້ອງຕ້ອງການໜ້າທີ່ການເມືອງຂອງສະພາແຫ່ງຊາດໃນລະດັບທີ່ແນ່ນອນ; ກົນໄກ ປະສານງານພາຍໃນ, ພາຍນອກ ກໍໄດ້ຮັບການປັບປຸງໃຫ້ຄ່ອງຕົວດີຂຶ້ນກວ່າເກົ່າ ໂດຍການສ້າງນິຕິກຳຕ່າງໆ ສຳລັບພື້ນຖານບ່ອນ ອີງໃນການເຄື່ອນໄຫວ. ນອກ ຈາກນັ້ນ, ຫ້ອງວ່າການສະພາແຫ່ງຊາດຍັງໄດ້ປະກອບ ສ່ວນສຳຄັນເຂົ້າໃນຜົນສຳເລັດລວມ ຕໍ່ການປະຕິບັດໜ້າທີ່ການເມືອງ ກໍຄືເຫດການສຳຄັນຕ່າງໆຂອງຊາດເຊັ່ນ: ປີແຫ່ງຄວາມສາມັກຄີ ແລະ ມິດຕະພາບລະຫວ່າງ ລາວ-ຫວຽດນາມ, ກອງປະຊຸມການເປັນຄູ່ຮ່ວມລັດຖະສະ ພາອາຊີ-ເອີຣົບ ຄັ້ງທີ 7, ການເລືອກ ຕັ້ງແທນສະມາຊິກສະພາແຫ່ງຊາດຢູ່ເຂດເລືອກຕັ້ງທີ 12 ແຂວງຄຳມ່ວນ ແລະ ເຫດການສຳຄັນ ອື່ນໆ.

     ກອງປະຊຸມໄດ້ຮັບຟັງບົດສະຫລຸບຕີລາຄາສະພາບການຈັດຕັ້ງປະຕິບັດວຽກງານຂອງຫ້ອງວ່າການສະພາແຫ່ງຊາດ ປະຈຳ ປີ 2012 ແລະ ທິດທາງວຽກງານປະຈຳປີ 2013; ການສະຫລຸບຕີລາຄາການຈັດຕັ້ງປະຕິບັດແຜນງົບປະມານຂອງຫ້ອງ ວ່າການສະພາແຫ່ງຊາດປະຈຳປີ 2012- 2013 ແລະ ສະເໜີຮ່າງແຜນການສົກປີ 2013-2014; ວຽກງານກົງຈັກ ແລະ ບຸກຄະລາກອນຂອງຫ້ອງວ່າການສະພາແຫ່ງຊາດໃນການຄຸ້ມຄອງສັບຊ້ອນຕຳແໜ່ງງານຕ່າງໆ; ລະບອບແບບແຜນວິ ທີເຮັດ ວຽກລະຫວ່າງຫ້ອງວ່າການສະພາແຫ່ງຊາດກັບຄະນະ ສສຊ ປະຈຳເຂດເລືອກຕັ້ງ; ສິດ, ໜ້າທີ່ ແລະ ພາລະບົດບາດຂອງ ສູນເຝິກອົບຮົມ ແລະ ທິດທາງພັດທະນາຊັບພະຍາກອນມະນຸດຂອງຫ້ອງວ່າການສະພາແຫ່ງຊາດ; ການເປັນເສນາທິການ ໃຫ້ແກ່ຄະນະ ສສຊ ຕາມຂະແໜງວິຊາການ; ພາລະບົດບາດຂອງກົມບໍລິຫານ-ພິທີການກັບການຄຸ້ມຄອງການລົງທຶນ ຂອງສະ ພາແຫ່ງຊາດ ແລະ ການປະສານງານເພື່ອຮັບປະກັນການເຄື່ອນໄຫວຂອງຄະນະ ສສຊ ເຊັ່ນ: ການລົງພົບປະຜູ້ມີສິດເລືອກຕັ້ງ, ການທາບທາມກົດໝາຍ ແລະ ອື່ນໆ.