ວາງສີລາເລີກກໍ່ສ້າງສະຫນາມບິນສາກົນຫນອງຄ້າງ

           ແຫລ່ງຂ່າວຈາກແຂວງຫົວພັນ ລາຍງານວ່າ:ວັນທີ 14 ມີນານີ້,ພະນະທ່ານ ທອງສິງ ທຳມະວົງ ນາຍົກລັດຖະ ມົນຕີແຫ່ງ ສປປ ລາວ ແລະ ພະນະທ່ານ ຫງວຽນ ເຕິນຢຸງ ນາຍົກລັດຖະມົນຕີແຫ່ງ ສສ ຫວຽດນາມພ້ອມ ດ້ວຍບັນ ດາລັດ ຖະມົນຕີວ່າການ, ຂະແໜງການກ່ຽວຂ້ອງ, ອຳນາດການປົກຄອງແຂວງ, ສະມາຄົມ ບັນດານັກລົງທຶນຫວຽດນາມຢູ່ ປະເທດລາວ ແລະ ປະຊາຊົນບັນດາເຜົ່າ ໄດ້ເຂົ້າ ຮ່ວມໃນພິທີວາງສີລາເລີກກໍ່ສ້າງສະໜາມບິນສາກົນໜອງຄ້າງເຊິ່ງຕັ້ງຢູ່ບ້ານ ໜອງ ຄ້າງເມືອງຊຳເໜືອແຂວງຕົນ.       

         ໂຄງການກໍ່ສ້າງສະໜາມ ບິນສາກົນໜອງຄ້າງ ແບ່ງອອກ ເປັນສອງໄລຍະຄື ໄລຍະທີ 1 ກໍ່ສ້າງສະໜາມບິນໃນເນື້ອທີ່ 183 ເຮັກຕາລວມທັງອາຄານຜູ້ໂດຍ ສານທີ່ຮອງຮັບຜູ້ໂດຍສານໄດ້ 100.000 ຄົນ/ປີ, ກໍ່ ສ້າງທາງ ແລ່ນຂຶ້ນ-ລົງ ( run way ) ຍາວ 2.400 ແມັດ, ກວ້າງ 30 ແມັດໂດຍ ສາມາດບໍລິການເຮືອບິນຂະໜາດ 70 ເຖິງ 100 ບ່ອນນັ່ງເຊັ່ນ:ເຮືອ ບິນ ATR 72, Forkker 70 ແລະ ທຽບເທົ່າ.ສ່ວນໄລຍະທີ 2ຈະຍົກ ລະດັບ ແລະ ເປີດກວ້າງເນື້ອທີ່ສະ ໜາມບິນຕື່ມອີກ 66 ເຮັກ ຕາເປັນ 249 ເຮັກຕາ ເພື່ອສາມາດເພີ່ມ ການ ບໍລິການຂົນສົ່ງ ຜູ້ໂດຍສານ ໃນແຕ່ລະປີເປັນ 350 000 ຄົນ ລວມ

ທັງເປີດກວ້າງທາງແລ່ນຂຶ້ນລົງຂອງເຮືອບິນໃນຄວາມຍາວ 3.800 ແມັດ, ກວ້າງ 45 ແມັດ ເພື່ອສາມາດຮອງຮັບ ເຮືອບິນ ບໍ ລິການຂະໜາດ 150 ເຖິງ 250 ບ່ອນນັ່ງ ເຊັ່ນ:ເຮືອບິນ A 320,A 321,A 300 ແລະ ທຽບເທົ່າ. ຄຽງຄູ່ກັນນີ້ກໍ ເພີ່ມບໍລິມາດການກໍ່ສ້າງອື່ນໆ ເປັນຕົ້ນທາງແລ່ນ ( taxi way ),ເດີ່ນຈອດເຮືອບິນ, ສາງສິນຄ້າເຄື່ອງຂອງ, ອາຄານບໍລິຫານ, ສະຖານທີ່ຈອດລົດ, ລະບົບສະໜອງ-ລະບາຍນ້ຳ, ລະບົບໄຟຟ້າ, ເສັ້ນທາງຄົມມະນາຄົມຈະໄດ້ກໍ່ສ້າງຢ່າງຕັ້ງໜ້າ ແລະ ຍົກ ລະດັບຢ່າງຕໍ່ເນື່ອງຈົນສຳເລັດໂຄງການ ແລະ ນຳໃຊ້ຢ່າງເປັນທາງການໃນຕໍ່ໜ້າເຊິ່ງໂຄງການນີ້ມີມູນຄ່າກໍ່ສ້າງ 80 ລ້ານໂດລາ ສະຫະລັດໂດຍກຸ່ມບໍລິສັດ ຮວ່າງ ແອງ ຢາລາຍ ເປັນຜູ້ໃຫ້ກູ້ຍືມທຶນ ແລະ ກໍ່ສ້າງກ່ອນໂດຍບໍ່ມີດອກເບ້ຍເປັນເວລາ 5 ປີ.ຂະນະທີ່ລັດຖະບານລາວຈະທົດແທນໂດການຫັກບັນດາຮ່ວງເງິນພາສີ-ອາກອນ, ຄ່າທຳນຽມທີ່ບໍລິສັດມອບພັນທະເຂົ້າງົບ ປະມານຂອງ ລັດ ແລະ  ຄາດວ່າການກໍ່ສ້າງ ຈະສຳເລັດໃນປີ 2015 .       

           ເມື່ອສະໜາມບິນກໍ່ສ້າງ ສຳເລັດ ແລະ ເປີດນຳໃຊ້ຈະເປັນເສັ້ນທາງຄົມມະນາຄົມເຊື່ອມຕໍ່ລະຫວ່າງສູນກາງ ແລະ ທ້ອງຖິ່ນທີ່ກ່ອນໜ້ານີ້ບໍ່ສາມາດເຮັດໄດ້ທັງຈະຊ່ວຍຊຸກຍູ້ການຄ້າ,ການລົງທຶນຢູ່ແຂວງຫົວພັນປະກອນສ່ວນພັດທະນາເສດ ຖະກິດ-ສັງຄົມໃຫ້ທ້ອງຖິ່ນ ແລະເພີ່ມທະວີ ສາຍພົວພັນຮ່ວມມືການຄ້າ ລະ ຫວ່າງສອງປະເທດລາວ-ຫວຽດນາມ.