ມອບລົດນຳສົ່ງຄັນເຈັບພ້ອມອຸປະກອນການແພດຄົບຊຸດໃຫ້ໂຮງຫມໍເມືອງທ່າປາງທອງ

     ອີງໃສ່ແຈ້ງການຂອງກົມປິ່ນປົວກະຊວງສາທາລະນະສຸກສະບັບເລກທີ 0360/ ກປປ, ລົງວັນທີ 1 ມີນາ 2013 ເລື່ອງແຜນແບ່ງປັນລົດນຳສົ່ງຄົນເຈັບ (AMBU LANCE) ທີ່ໄດ້ຮັບຈາກ ຂະບວນການຮັບໃຊ້ກອງປະຊຸມ ASEM 9 ທີ່ໄດ້ຈັດ ຂຶ້ນໃນທ້າຍປີ 2012 ຜ່ານມາ ຢູ່ນະຄອນຫລວງວຽງຈັນນັ້ນ, ຄະນະພະແນກສາທາ ລະນະສຸກແຂວງສະຫວັນນະເຂດຈຶ່ງໄດ້ອອກຂໍ້ຕົກລົງວ່າດ້ວຍການ ມອບລົດນຳສົ່ງ ຄົນເຈັບໃຫ້ໂຮງໝໍເມືອງທ່າປາງທອງ ເປັນຜູ້ຄຸ້ມຄອງ ແລະ ນຳໃຊເຂົ້າໃນການເຄື່ອນ ໄຫວບໍລິການຮັບໃຊ້ປະຊາຊົນພາຍໃນເມືອງດັ່ງກ່າວ ແລະ ເມືອງໃກ້ ຄຽງໃຫ້ມີຄຸນນະພາບ ແລະ ມີປະສິດທິຜົນຫລາຍ.

    ພິທີມອບລົດນຳສົ່ງຄົນເຈັບໃຫ້ແກ່ເມືອງທ່າປາງທອງເທື່ອນີ້ ໄດ້ຈັດຂຶ້ນຢູ່ພະແນກສາທາລະນະສຸກແຂວງໂດຍ ແມ່ນທ່ານ ດຣ. ປະນອມ ພອງມະນີ ຫົວໜ້າພະແນກສາທາລະນະສຸກແຂວງສະຫວັນນະເຂດ ແລະ ຕາງໜ້າໃຫ້ ແກ່ຫ້ອງການສາທາລະ ນະສຸກເມືອງທ່າປາງທອງກ່າວຮັບລົດ ຄັນດັ່ງກ່າວໂດຍແມ່ນທ່ານ ດຣ. ສີສະຫວັນ ດວງຈັນ ທາ ຮອງຜູ້ ອຳນວຍການໂຮງ ໝໍເມືອງທ່າປາງທອງ ພ້ອມດ້ວຍບັນດາທ່ານ ໃນຄະນະພັກພະແນກກໍໄດ້ເຂົ້າຮ່ວມ.

ລົດດັ່ງກ່າວປະກອບມີອຸປະກອນການແພດ ຄືເຄື່ອງກະຕຸ້ນຫົວໃຈ 1 ໜ່ວຍ, ເຄື່ອງວັດ ແທກຄວາມດັນເລືອດ 1 ຊຸດ, ເຄື່ອງດູດຂີ້ສະເລດ 1 ໜ່ວຍ, ເຄື່ອງໃຫ້ຄວາມຊື່ນອາກາດ ແລະ ອົກຊີ 1 ໜ່ວຍ, ບັ້ງອົກຊີ ແລະ ໂມງວັດ 1 ຊຸດ, ຫີບໃສ່ເຄື່ອງເປົ່າ 1 ໜ່ວຍ. ນອກນັ້ນ ຍັງມີບັງການ ແກ້ໄຂອຸປະຕິເຫດ, ປອກຄໍ ແລະ ລໍ້ຍູ້ຄົນເຈັບ. ສຳລັບ ການຄຸ້ມຄອງບຳລຸງຮັກສາອຸປະກອນການແພດພາຍໃນລົດ ແລະ ພາຫະນະແມ່ນມອບໃຫ້ຫ້ອງການສາທາລະນະ ສຸກເມືອງທ່າປາງທອງປະຕິບັດຕາມຫລັກການຂອງການຄຸ້ມຄອງ ແລະ ບຳລຸງຮັກສາຢ່າງເຂັ້ມງວດ.