ຊຽງຂວາງເກັບກູ້ລະເບີດຕົກຄ້າງອອກຈາກເນື້ອທີ່ສ່ຽງໄພໄດ້ ແລ້ວ 0,31% ຂອງເນື້ອທີ່ທົ່ວແຂວງ

      ນັບວ່າເປັນຜົນສຳເລັດສູງພາຍຫລັງມີການສ້າງຕັ້ງໜ່ວຍງານເກັບກູ້ລະເບີດຕົກຄ້າງທີ່ບໍ່ທັນແຕກຢູ່ແຂວງຊຽງ ຂວາງ ແລະ ມາຮອດປັດຈຸບັນໜ່ວຍງານດັ່ງກ່າວສາມາດກວດ ແລະ ເກັບກູ້ລະເບີດດັ່ງກ່າວອອກຈາກເນື້ອທີ່ສ່ຽງ ໄພໄດ້ແລ້ວຫລາຍກວ່າ 5.360 ເຮັກຕາ ຫລື ເທົ່າກັບ 0,31% ຂອງເນື້ອທີ່ແຂວງຊຽງຂວາງ, ໃນນັ້ນມີເນື້ອທີ່ກະ ສິກຳປະມານ 4.000 ກວ່າເຮັກຕາ ແລະ ຜ່ານໄລຍະເວລາດັ່ງກ່າວ, ໜ່ວຍງານເກັບກູ້ລະເບີດຂອງ ແຂວງກໍສາມາດ ກວດເຫັນ ແລະ ທຳລາຍລູກລະເບີດທີ່ບໍ່ທັນ ແຕກໄດ້ 210.700 ກວ່າລູກ, ໃນນັ້ນ ມີລູກບົມ 326 ໜ່ວຍ, ບົມ ບີຫລາຍກວ່າ 127.300 ໜ່ວຍ, ມີນ 153 ໜ່ວຍ ແລະ ສຳພາວຸດອື່ນໆ 82.900 ກວ່າລູກ. ຜົນສຳເລັດດັ່ງກ່າວ ໄດ້ມາແມ່ນຄວາມຂະຫຍັນຂອງໜ່ວຍງານ.  ພ້ອມນັ້ນກໍໄດ້ຮັບການຮ່ວມມືຊ່ວຍເຫລືອຈາກພາຍນອກເປັນຈຳນວນຫລວງຫລາຍ. ນີ້ແມ່ນການລາຍງານຂອງຜູ້ຮັບຜິດຊອບວຽກງານດັ່ງກ່າວຕໍ່ຄະນະຜູ້ແທນສະຫະລັດອາເມລິ ກາ ນຳໂດຍນາງ ເອມມາ ອາດຄິນ ເຊີນ (Emma Atkin Son) ເຈົ້າໜ້າທີ່ຫ້ອງການເພື່ອຫລຸດຜ່ອນ ແລະ ຈຳກັດອາວຸດຂອງກະຊວງການຕ່າງປະເທດ ອາເມ ລິກາທີ່ໄດ້ດຳເນີນການຢ້ຽມຢາມແຂວງຊຽງຂວາງໃນ ວັນທີ 7 ມີນາ.

    ຜູ້ລາຍງານຂ່າວໃຫ້ຮູ້ອີກວ່າ: ໜ້າເສຍດາຍຕະຫລອດໄລຍະ 18 ປີຜ່ານມາ ຢູ່ແຂວງຊຽງຂວາງມີຜູ້ເສຍຊີວິດຈາກລະເບີດ ຕົກຄ້າງດັ່ງກ່າວຫລາຍເຖິງ 196 ຄົນ ແລະ ບາດເຈັບຈົນເຖິງຂັ້ນພິການ 550 ຄົນ ແລະ ປັດຈຸບັນ, ປະຊາຊົນແຂວງດັ່ງກ່າວ ກໍຍັງຜະເຊີນກັບຄວາມສ່ຽງດັ່ງກ່າວຢູ່ແຕ່ລະວັນຈາກການຜະລິດ, ການຊອກຢູ່ຫາກິນ ແລະ ອື່ນໆ.