ເອກອັກຄະລັດຖະທູດແຫ່ງ ສປປ ລາວ ປະຈຳປະເທດໄທ ຮ່ວມບຸນປະຈຳປີໄທພວນ

     ເມື່ອບໍ່ດົນມານີ້, ທ່ານ ຫລີ ບຸນຄ້ຳ ເອກອັກຄະລັດຖະທູດລາວ ປະຈຳລາຊະ ອານາຈັກໄທ ພ້ອມດ້ວຍຄະນະໄດ້ໃຫ້ ກຽດເຂົ້າຮ່ວມ ບຸນສືບທອດປະເພນີເຜົ່າພວນ ຄັ້ງ ທີ 55 ຈັດຂຶ້ນຢູ່ບ້ານຖ່ອນ  ເມືອງ ບ້ານຜື ແຂວງອຸດອນທານີ ປະ ເທດໄທ ຕາມການເຊື້ອເຊີນຂອງ ສະມາຄົມໄທພວນແຫ່ງປະເທດ ໄທ, ມີທ່ານ ເສນີ ຈິດຕະ ກະເສນ ເຈົ້າແຂວງອຸດອນທານີ, ພົນໂທ ທະນະພັດ ສີຄູນໄຊພັດປະທານສະມາຄົມ ໄທພວນແຫ່ງປະເທດໄທ, ເຈົ້າເມືອງບ້ານຜື, ອຳນາດການປົກຄອງບ້ານຜື, ບ້ານຖ່ອນ ແລະ ຄົນຊົນເຜົ່າໄທພວນຈາກ 19 ແຂວງຂອງປະເທດໄທເຂົ້າຮ່ວມຫລວງຫລາຍ ເປັນການເຕົ້າໂຮມ ຄວາມສາ ມັກຄີສືບທອດວັດທະນະທຳຂອງຊົນເຜົ່າໄທພວນທີ່ມີຕົ້ນກຳເນີດບັນພະບູລຸດຈາກຊົນເຜົ່າພວນແຂວງຊຽງຂວາງ ຂອງລາວ.

    ໂອກາດດັ່ງກ່າວ, ເອກອັກຄະລັດຖະທູດ ຫລີ ບຸນຄ້ຳ ໄດ້ກ່າວ ສະແດງຄວາມດີໃຈ ແລະ ຕີລາຄາສູງການຈັດບຸນສືບ ທອດປະເພນີວັດທະນະທຳໄທພວນເຊິ່ງໄດ້ຮັບການອະນຸລັກຮັກສາສືບທອດກັນຕໍ່ໆມາ, ຊົມເຊີຍຄວາມສາມັກຄີເຕົ້າໂຮມ ເປັນປຶກແຜ່ນຂອງເຜົ່າ ພວນທີ່ມີສະມາຄົມໄທພວນແຫ່ງປະເທດໄທເປັນສູນກາງການເຕົ້າໂຮມ ເພື່ອພ້ອມກັນອະນຸລັກສົ່ງ

ເສີມຮີດຄອງປະເພນີວັດທະນະ ທຳອັນດີງາມຂອງບັນພະບູລຸດ ເອົາໄວ້ຢ່າງໝັ້ນຄົງ, ເປັນການ ສະແດງໃຫ້ເຫັນເຖິງຄວາມຮັກ ອັນດູດດື່ມທີ່ມີຕໍ່ບັນພະບູລຸດ.

    ໃນບຸນດັ່ງກ່າວມີການສະແດງ ສິລະປະຂັບລຳ ແລະ ຟ້ອນຂອງ ຄົນພວນ 19 ແຂວງຢ່າງມ່ວນຊື່ນ ແຕ່ຕົ້ນຕະຫລອດປາຍ ເຊິ່ງສາມາດສະທ້ອນພາບແຫ່ງຄວາມເປັນເອກະລັກການຂັບລຳ-ຟ້ອນ ແລະ ການນຸ່ງຖືແບບພວນຊຽງ ຂວາງໄດ້ດີພໍສົມຄວນ.

    ສະມາຄົມໄທພວນແຫ່ງປະ ເທດໄທເປັນສູນກາງເຕົ້າໂຮມ ຄວາມສາມັກຄີຄົນພວນ ສືບເຊື້ອ ສາຍຈາກປະເທດລາວ, ອາໄສຢູ່ ເກືອບທົ່ວປະເທດໄທ. ຕາມການ ສຳຫລວດ ມີຄົນພວນອາໄສຢູ່ ເປັນກຸ່ມກ້ອນເກັບກຳໄດ້ມາເຖິງ ປັດຈຸບັນມີ 25 ແຂວງ (ໃນ 77 ແຂວງທົ່ວປະເທດ), ໃນນັ້ນ ເຂົ້າ ຮ່ວມສະມາຄົມໄທພວນແຫ່ງປະ ເທດໄທແລ້ວ 19 ແຂວງ, ມີພົນ ລະເມືອງປະມານ 2 ລ້ານຄົນ. ແຕ່ລະປີມີການຈັດບຸນສືບທອດຮີດຄອງປະເພນີວັດທະນະທຳພວນໝູນວຽນໄປແຕ່ລະ ແຂວງ ໂດຍພື້ນຖານຄົນພວນຍັງສາມາດຮັກສາພາສາປາກເວົ້າແບບພວນຕົ້ນກຳເນີດ, ການນຸ່ງຖື-ຮີດຄອງປະ ເພນີອັນດີງາມດັ້ງເດີມ ພວມໄດ້ຮັບການສົ່ງເສີມທ່າມກາງຄວາມທ້າທາຍແຫ່ງຍຸກສະໄໝທີ່ວັດທະນະທຳຕາເວັນຕົກພວມແຜ່ຂະຫຍາຍໃນປະເທດໄທຢ່າງເສລີ.