ຍົກລະດັບວຽກງານກວດກາ ແລະ ຄວບຄຸມຢາເສບຕິດໃຫ້ພະນັກງານແຂວງພາກກາງ ແລະ ພາກໃຕ້

             ຄະນະກຳມະການແຫ່ງຊາດລາວ ເພື່ອກວດກາ ແລະ ຄວບຄຸມຢາເສບຕິດ (ກຄສ) ກະຊວງສາທາລະນະສຸກ, ອົງການສະຫະປະຊາຊາດເພື່ອຄວບຄຸມຢາເສບຕິດ ແລະ ຕ້າດອາຊະຍາ ກຳ (UNODC) ປະຈຳ ສປປ ລາວ ໂດຍການສະ ໜັບສະໜູນຈາກພະແນກຄວບຄຸມຢາເສບຕິດຂອງສະຖານທູດສະຫະລັດອາເມລິກາປະຈຳລາວ ໄດ້ຮ່ວມກັນເຝິກ ອົບຮົມ ສ້າງຄູເຝິກ ເພື່ອຊ່ວຍເຫຼືອ ແລະ ໃຫ້ຄຳແນະນຳຜູ້ຕິດສິ່ງ ເສບຕິດຢູ່ບັນດາແຂວງພາກກາງ ແລະ ພາກໃຕ້ຂອງ ສປປ ລາວ ​ເຊິ່ງພິທີ​ເປີດ​ຊຸດອົບຮົມດັ່ງ ກ່າວໄດ້​ຈັດຂຶ້ນໃນຕອນເຊົ້າວັນທີ 1 ເມສານີ້ ແລະ ຈະດຳເນີນໄປ​ເປັນ​ເວລາ 3 ມື້ ຢູ່ກະຊວງກະສິ ກຳ ແລະ ປ່າໄມ້ ນະຄອນຫຼວງ ວຽງຈັນ ໂດຍການເປັນປະທານ ຂອງທ່ານ ກຸ ຈັນສີນາ ຮັກສາ ການປະທານຄະນະກຳມະການ ແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ,ມີທ່ານ ເລຊີ ໄວຣ ຫົວໜ້າພະແນກຄວບຄຸມຢາ ເສບຕິດຂອງສະຖານ ທູດອາເມລິກາປະຈຳລາວ,ທ່ານ ດຣ ວັນ ນະເລດ ທຳມະວົງສາ ຜູ້ຕ່າງໜ້າ ກົມປິ່ນປົວ ແລະ ຟື້ນຟູສຸຂະພາບຈິດກະຊວງສາ ທາລະນາສຸກ ແລະ ຜູ້ຕາງໜ້າຈາກບັນດາ ແຂວງພາກກາງ ແລະ ພາກໃຕ້ ເຂົ້າຮ່ວມ 47 ທ່ານ.

         ການອົບຮົມດັ່ງກ່າວ​ເພື່ອ​ແນ​ໃສ່ເຮັດໃຫ້ພະນັກງານ, ນັກວິຊາການ ແລະ ຜູ້ຕາງໜ້າຈາກ ບັນດາແຂວງພາກກາງ ແລະ ໃຕ້ໄດ້ມີຄວາມຮູ້, ຄວາມເຂົ້າໃຈ ແລະ ຄວາມຊຳນິຊຳນານໃນການປ້ອງກັນ ແລະ ແກ້ໄຂບັນຫາ​ຢາ​ເສບ​ຕິດເພື່ອຊ່ວຍເຫຼືອ ແລະ ໃຫ້ຄຳແນະນຳຜູ້ທີ່ຕົກເປັນເຫຍື່ອ ຂອງຢາເສບຕິດຢູ່ໃນທ້ອງຖິ່ນ ຂອງຕົນໃຫ້ເກີດດອກອອກຜົນ ເຊິ່ງເນື້ອໃນຂອງ ການເຝິກອົບຮົມຄັ້ງນີ້ເປັນຫົວຂໍ້ດຽວກັນກັບ ທີ່ຄະນະກຳມະການໄດ້ຈັດຊຸດເຝິກອົບຮົມໃຫ້ພະນັກງານຢູ່ແຂວງຕ່າງໆຂອງ ພາກເໜືອລາວ ໃນໄລຍະຜ່ານມາ.

      ທ່ານ ກຸ ຈັນສີນາ ຮັກສາການ ປະທານຄະນະກຳມະການແຫ່ງ ຊາດ ເພື່ອກວດກາ ແລະ ຄວບຄຸມ ຢາເສບຕິດ ກ່າວໃນ ພິທີວ່າ: ການຈັດການເຝິກອົບຮົມຄັ້ງນີ້  ເພື່ອ ຈັດຕັ້ງຜັນຂະຫຍາຍວຽກງານ ສາມສ້າງທີ່ພັກ ແລະ ລັດຖະບານວາງອອກ ຢູ່ ໃນຂະແໜງກວດກາ ແລະ ຄວບຄຸມຢາເສບຕິດໃຫ້ເກີດດອກອອກຜົນ ເນື່ອງຈາກການສ້າງບ້ານໃຫ້ເປັນຫົວໜ່ວຍພັດ ທະ ນາຕ້ອງຕິດພັນກັບການສ້າງ ແລະ ພັດທະນາບ້ານໃຫ້ເປັນບ້ານປອດສິ່ງເສບຕິດເຊິ່ງເປັນວຽກງານທີ່ມີຄວາມສຳຄັນ ແລະ ຈຳ ເປັນຕໍ່ການພັດທະນາປະເທດຊາດ. ການຕິດຕາມ, ກວດກາ ແລະ ແກ້ໄຂບັນຫາຢາ ເສບຕິດທີ່ພວມເປັນບັນຫາ ແລະ ທ້າ ທາຍຕໍ່ສັງຄົມນັ້ນຕ້ອງໄດ້ປະ ຕິບັດຢ່າງຈິງຈັງ, ສອດຄ່ອງກັບແນວທາງນະໂຍບາຍຂອງ​ພັກ ​ແລະ ລະບຽບ​ກົດໝາຍ​ຂອງ​ລັດ​ວາງ​ອອກທັງຮຽກຮ້ອງເຖິງ ຄວາມລະອຽດອ່ອນ ແລະ ຮູບແບບການດຳເນີນງານທີ່ຊັດເຈນ ເພາະສະນັ້ນ ເປົ້າໝາຍຂອງການ ເຝິກອົບຮົມໃນຄັ້ງນີ້ແມ່ນເພື່ອ ສ້າງຄວາມຮູ້,ຄວາມເຂົ້າໃຈຕໍ່ແນວທາງອັນຖືກຕ້ອງ ໃຫ້ແກ່ ພະນັກງານ,ນັກວິຊາການ ແລະ ຜູ້ແທ່ນຈາກແຕ່ລະແຂວງເພື່ອນຳເອົາບົດຮຽນດັ່ງກ່າວໄປໂຄສະ ນາເຜີຍແຜ່, ແນະນຳ ແລະ ໃຫ້ຄຳ ປຶກສາແກ່ຄອບ ຄົວທີ່ຕົກ ເປັນທາດຂອງສິ່ງເສບຕິດ ແລະ ບຸກຄົນທີ່ມີຄວາມສ່ຽງສູງຕໍ່ບັນຫາສິ່ງເສບຕິດ ໂດຍສະເພາະແມ່ນກຸ່ມໄວໜຸ່ມນັກຮຽນ, ນັກ ສຶກສາ.

     ປັດຈຸບັນ, ຢູ່ ສປປ ລາວ ມີສູນບຳບັດຜູ້ຕິດຢາເສບຕິດທັງໝົດ 6 ແຫ່ງ ແລະ ມີຜູ້ຕິດຢາເສບຕິດຫຼາຍພັນຄົນດັ່ງນັ້ນການ ເຝິກອົບຮົມຄັ້ງນີ້ ຈະນຳໄປສູ່ການຊ່ວຍເຮັດໃຫ້ຈຳນວນຜູ້ຕິດຢາ ເສບຕິດໃນທົ່ວປະເທດຫຼຸດລົງເທື່ອລະກ້າວ.