ພາກທຸລະກິດສະເຫນີຫລາຍບັນຫາຕໍ່ລັດຖະບານ

     ກອງປະຊຸມພາກທຸລະກິດລາວ ຄັ້ງທີ VIII ໄດ້ມີຂຶ້ນໃນວັນທີ 20 ສິງຫານີ້, ຢູ່ໂຮງແຮມລາວພາຊາ ນະຄອນຫລວງ ວຽງຈັນ ໂດຍ ການເປັນປະທານຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດ ຖະກິດ, ມີບັນດາລັດຖະມົນຕີ ແລະ ນັກທຸລະກິດເຂົ້າຮ່ວມຢ່າງຫລວງຫລາຍ. ໃນຂະນະທີ່ພາກທຸລະກິດໄດ້ສະເໜີຫລາຍບັນຫາຕໍ່ລັດຖະບານເພື່ອໃຫ້ເພີ່ມແຮງ ໃນການສົ່ງເສີມພາກທຸລະກິດໃຫ້ມີຄວາມຄ່ອງຕົວໄປຕາມເງື່ອນໃໝ່ດີກວ່າເກົ່າ.

           ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ກ່າວໄຂກອງປະຊຸມວ່າ:ກອງປະຊຸມດັ່ງກ່າວເປັນເວທີ ເປີດໂອກາດໃຫ້ພາກລັດ ແລະ ພາກທຸລະກິດຮ່ວມກັນປຶກສາຫາລື, ສຶກສາ, ວິເຄາະ ເພື່ອຊອກຫາວິທີທາງແກ້ໄຂບັນຫາ ຕ່າງໆທີ່ກົດໜ່ວງການດຳເນີນທຸລະກິດໃນປັດຈຸບັນ, ອັນພົວພັນເຖິງການປັບປຸງນະໂຍບາຍຂອງລັດຖະບານ, ບັນດານິຕິ

ກຳໃຫ້ນັບມື້ສອດຄ່ອງກັບສະພາບຕົວຈິງຢູ່ພາຍໃນປະເທດ ເພື່ອແນໃສ່ສ້າງສະພາບແວດລ້ອມທີ່ອຳນວຍໃຫ້ແກ່ການພັດ ທະນາເສດຖະກິດ-ສັງຄົມຂອງຊາດກໍຄືການດຳເນີນທຸລະກິດ ແລະ ການລົງທຶນຂອງຜູ້ປະກອບການໃຫ້ມີຄວາມເຂັ້ມແຂງ ດີຂຶ້ນເລື້ອຍໆ.

          ໃນກອງປະຊຸມເທື່ອນີ້ພາກທຸລະກິດໄດ້ມີຫລາຍບັນຫາສະເໜີລັດຖະບານ ເຊັ່ນ: ທ່ານ ສີສະຫວາດ ທິລາວົງ ປະທານ ສະພາການຄ້າ ແລະ ອຸດສະຫະກຳແຫ່ງຊາດ ອຳນວຍການລັດວິສາຫະກິດໄຟຟ້າລາວ ມີຄຳເຫັນວ່າ: ພວກເຮົາຕ້ອງໄດ້ຮ່ວມກັນ ແກ້ໄຂລະຫວ່າງພາກລັດກັບພາກທຸລະກິດທາງດ້ານນິຕິກຳ ແລະ ກົນໄກທີ່ຍັງມີບາງອັນກົດໜ່ວງລວມໄປເຖິງການບໍລິການ ບາງອັນມີຫລາຍຂັ້ນຫລາຍຂອດ, ນອກຈາກ ນີ້ໃນປີ 2015 ສ ປປ ລາວ ຈະເຂົ້າເປັນປະຊາຄົມເສດຖະກິດອາຊຽນ (AEC) ຕໍ່ບັນຫາດັ່ງກ່າວພວກເຮົາຈະເຮັດແນວໃດເພື່ອສ້າງເສດຖະກິດໃຫ້ໄປຕາມກົນໄກຕະຫລາດຫັນເປັນອຸດສະຫະກຳ ແລະ ເປັນ ທັນສະໄໝເທື່ອລະກ້າວດັ່ງນັ້ນ ກ່ອນອື່ນໝົດພວກເຮົາຕ້ອງຫລຸດຜ່ອນຄວາມອັກຄະຕິຕໍ່ກັນລະຫວ່າງພາກລັດ ແລະ ພາກທຸ ລະກິດ ແລະ ຕ້ອງຈິງໃຈໃນການແກ້ໄຂຂອດທີ່ມີຄວາມຫຍຸ້ງຍາກເພື່ອຍາດແຍ່ງໂອກາດໃນການສ້າງລາຍຮັບໃຫ້ລັດ ແລະ ໃຫ້ ແກ່ທຸລະກິດ. 

          ທ່ານ ສະນັ່ນ ຈຸນລະມະນີ ຮອງປະທານສະພາການຄ້າ ແລະ ອຸດສະຫະກຳແຫ່ງຊາດກ່າວວ່າ: ເພື່ອຄວາມສະດວກ ໃນການຈັດ ຕັ້ງປະຕິບັດ ດຳລັດ 115/ນຍ ແລະ ດຳລັດ 316/ນຍ ສະພາການຄ້າ ແລະ ອຸດສະຫະກຳແຫ່ງຊາດ ສະເໜີໃຫ້ລັດ ປັບປຸງດຳລັດ 316/ນຍ ໃນໝວດ 2 ມາດຕາ 5 ຂອບເຂດ ສິດ ຂໍ້ 5.4 ການສ້າງຕັ້ງ ແລະ ຄຸ້ມຄອງສະມາຄົມ ແລະ ກຸ່ມທຸລະ ກິດໃນຂອບເຂດທົ່ວປະເທດແມ່ນໃຫ້ສະພາການຄ້າ ແລະ ອຸດສະຫະກຳຮັບຮອງກະກຽມການສ້າງຕັ້ງ ແລະ ເຕົ້າໂຮມສະມາ ຄົມ ແລະ ກຸ່ມທຸລະກິດ ໄລຍະ 1​-2 ປີເພື່ອກະກຽມຄວາມພ້ອມທາງດ້ານການລະດົມສະມາຊິກ ຫລັງຈາກນັ້ນຈຶ່ງສະເໜີໃຫ້ ກະຊວງພາຍໃນອະນຸມັດ ແລະ ຂຶ້ນທະບຽນສະມາຄົມ ຫລື ກຸ່ມທຸລະກິດ.

           ທ່ານ ກີ ອາໂປວີ ປະທານສະພາການຄ້າ ແລະ ອຸດສະຫະກຳ ເອີຣົບປະຈຳລາວ, ອຳນວຍການ ບໍລິສັດອາລີອັນ ປະກັນໄພ ລາວ ກ່າວວ່າ: ເຖິງແມ່ນວ່າໃນ ໄລຍະຜ່ານມາ ສປປ ລາວ ໄດ້ມີການປັບປຸງບັນດາກົນໄກ ແລະ ນິຕິກຳຕ່າງໆເພື່ອ ເອື້ອອຳນວຍໃຫ້ແກ່ການດຳເນີນກິດຈະການຂອງພາກທຸລະກິດກໍຕາມແຕ່ຍັງຖືວ່າມີຄວາມຫຍຸ້ງຍາກໃນການດຳເນີນທຸລະກິດ ເມື່ອທຽບກັບບັນດາປະເທດອື່ນໆໃກ້ຄຽງຖ້າພວກເຮົາຕ້ອງການໃຫ້ສາມາດແຂ່ງຂັນກັບບັນດາປະເທດອື່ນ ແລະ ດຶງດູດການ ລົງທຶນຈາກຕ່າງປະເທດໃຫ້ຫລາຍກວ່າເກົ່າແລ້ວແມ່ນມີຄວາມຈຳເປັນຢ່າງຍິ່ງໃນການປັບປຸງພາກສ່ວນສ່ວຍສາອາກອນໂດຍ ບັນດາບໍລິສັດທີ່ມີສຳນັກງານຢູ່ລາວສະເໜີໃຫ້ແກ້ໄຂບັນຫາ ແລະ ຂໍ້ຂັດແຍ່ງໂດຍອຳນາດສ່ວຍສາອາກອນ, ການຫັກຄ່າໃຊ້ ຈ່າຍ, ອາກອນມູນຄ່າເພີ່ມໃນທຸລະກິດບໍລິການ, ການສົ່ງອອກ ຫລື ສີນເຊື່ອໃນການຊື້ສີນຄ້າແມ່ນບໍ່ໄດ້ຮັບການຈັດຕັ້ງປະ ຕິບັດຢ່າງຖືກວິທີລວມໄປເຖິງອາກອນລາຍຮັບຕໍ່ບຸກຄົນສຳລັບຄົນຕ່າງປະເທດບັນຫານີ້ຍັງບໍ່ທັນໄດ້ຮັບການແກ້ໄຂ.

            ຜູ້ຕາງໜ້າສະມາຄົມທຸລະກິດອົດ ສະຕາລີ-ນີວຊີແລນ ກ່າວ ວ່າ: ໃນ ປີ 2012 ເສດຖະກິດຂອງ ລາວໄດ້ ຂະຫຍາຍ ຕົວຢ່າງແຂງແຮງໃນລະດັບ8% ຂອງGDP ແລະ ຕາມແຜນພັດທະນາເສດ ຖະກິດ- ສັງ ຄົມ 5 ປີຄັ້ງທີ VII (2011-2015) ລັດຖະບານໄດ້ວາງ ຄາດໝາຍໃຫ້ GDP ຂະຫບາຍຕົວໃນລະດັບ 8% ຂຶ້ນໄປໃນນັ້ນການລົງທຶນໂດຍກົງຂອງຕ່າງປະເທດ ແມ່ນກວມປະມານ 54% ຂອງການລົງທຶນທັງໝົດສະນັ້ນເພື່ອຮັບປະກັນໃຫ້ບັນລຸເປົ້າໝາຍວາງໄວ້ຈະຕ້ອງ ໄດ້ເອົາໃຈໃສ່ ລະດົມທຶນໂດຍກົງຈາກຕ່າງປະເທດທີ່ມີຄຸນນະພາບໃຫ້ຫລາຍຂຶ້ນເພື່ອສ້າງລາຍຮັບໃຫ້ລັດຖະບານ, ສ້າງວຽກເຮັດງານທຳໃຫ້ ຫລາຍຂຶ້ນ, ຖ່າຍໂອນສີມືແຮງງານ ແລະ ເຕັກໂນໂລຊີ ແລະ ປົກປັກຮັກສາສິ່ງແວດລ້ອມແຕ່ແນວໃດກໍຕາມຍັງມີຫລາຍບັນ ຫາທ້າທາຍທີ່ຈະຕ້ອງໄດ້ເອົາໃຈໃສ່ແກ້ໄຂເຊັ່ນ:ບໍ່ຄວນຖືເບົາໃນການໃຫ້ຂໍ້ມູນ ແລະ ຄຳແນະນຳ ແລະ ປັບປຸງສະພາບແວດ ລ້ອມໃນການລົງທຶນເພື່ອໃຫ້ ສປປ ລາວ ສາມາດດຶງດູດນັກລົງທຶນຕ່າງປະເທດທີ່ມີຄຸນນະພາບ ແລະ ຄວນແກ້ໄຂຄວາມບໍ່ຊັດ ເຈນກ່ຽວກັບຂອບເຂດການນຳ ໃຊ້ແຮງງານ ແລະ ການປັບປຸງໂຄງສ້າງຂອງກົດໝາຍຈຳນວນໜຶ່ງທີ່ກ່ຽວຂ້ອງກັບການລົງທຶນ.

            ທ່ານ ອ່ອນສີ ບຸດສີວົງສັກ ທີ່ປຶກສາສະພາການຄ້າ ແລະ ອຸດສະຫະກຳແຫ່ງຊາດ ສະເໜີວ່າ: ການຂາດແຄນແຮງ ງານ ແລະ ການເຄື່ອນຍ້າຍຂອງຜູ້ອອກແຮງງານຈາກບໍລິສັດນີ້ ໄປຫາບໍລິສັດອື່ນແມ່ນເປັນບັນຫາໃຫຍ່ເຖິງແມ່ນວ່າກະຊວງ ແຮງງານ ແລະ ສະຫວັດດີການສັງຄົມ ຈະມີບໍລິ ສັດຈັດຫາງານເຖິງ 15 ແຫ່ງ ແຕ່ການສະໜອງແຮງງານໃຫ້ການລົງທຶນຢູ່ ພາຍໃນປະເທດແມ່ນມີໜ້ອຍນອກຈາກນີ້ ໃນແຕ່ລະປີມີແຮງງານລາວຈຳນວນຫລາຍພັນຄົນທີ່ໄປເຮັດວຽກໂດຍບໍ່ຖຶກກົດ ໝາຍຢູ່ປະເທດໃກ້ຄຽງ ແລະ ຖືກສົ່ງກັບປະເທດສະນັ້ນເປັນໄປໄດ້ບໍທີ່ພວກເຮົາຈະຮ່ວມມືກັບອົງການສາກົນໃດໜຶ່ງຈັດເຝຶກ ອົບຮົມວິຊາຊີບໃຫ້ເຂົາເຈົ້າແລ້ວເລືອກເຟັ້ນເອົາຜູ້ມີຄວາມກ້າວໜ້າເພື່ອເຂົ້າເຮັດວຽກນຳຫົວໜ່ວຍທຸລະກິດພາຍໃນປະເທດ.