laophatthananewspaper: ເອກະຊົນໄດ້ມີບົດບາດສຳຄັນໃນການພັດທະນາວຽກງານສື່

ນັບແຕ່ພັກ ແລະ ລັດ ໄດ້ມີແນວທາງນະໂຍບາຍປ່ຽນແປງໃໝ່ເປັນຕົ້ນມາ ວຽກງານສື່ມວນຊົນກໍແມ່ນຂະແໜງການໜຶ່ງທີ່ຖືເປັນວຽກປາຍແຫລມໃນການເປັນເຄື່ອງມື ເພື່ອໂຄສະ ນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ສັງຄົມໄດ້ຮັບຮູ້ເຂົ້າໃຈ ເພື່ອໃຫ້ທຸກພາກສ່ວນມີຄວາມຕື່ນຕົວປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ຈະເລີນສີວິໄລ ເຊິ່ງໄລຍະຜ່ານມາພາກເອກະຊົນກໍໄດ້ມີບົດບາດສຳຄັນໃນການພັດທະ ນາວຽກງານສື່.

ທ່ານ ຫົງຄຳ ສຸວັນນະວົງ ອຳນວຍການສະຖານີໂທລະພາບ TV ລາວ ໃຫ້ສຳພາດຕໍ່ນັກຂ່າວໜັງສືພິມ ລາວພັດທະ ນາ ໃນວັນທີ 5 ສິງຫານີ້ວ່າ: ນັບແຕ່ພັກ-ລັດ ຖະບານໄດ້ມີການເປີດກວ້າງນະໂຍບາຍໃນຂະແໜງວຽກງານສື່ມວນຊົນໃນໄລຍະຫລັງມາ ແຕ່ເຫັນວ່າສື່ມວນຊົນລາວທຸກຂະແໜງການໄດ້ມີການພັດທະນາເຕີບໃຫຍ່ຂະຫຍາຍຕົວເປັນກ້າວໆມາ ທັງດ້ານປະລິມານ ແລະ ຄຸນນະພາບ ເຊິ່ງສະແດງອອກຄືສື່ສິ່ງພິມ, ວິທະຍຸ ແລະ ໂທ ລະພາບໄດ້ມີການຜະລິດບົດຂຽນ, ລາຍ ການຕ່າງໆທີ່ສາມາດຕອບສະ ໜອງກັບຄວາມຮຽກ ຮ້ອງຕ້ອງການຂອງສັງຄົມ ທັງດ້ານເນື້ອຫາສາລະ ແລະ ສີສັນເພີ່ມຂຶ້ນ. ນອກຈາກນີ້ສື່ມວນຊົນບາງຂະແໜງກໍໄດ້ເປີດເວທີ ເພື່ອໃຫ້ສັງຄົມເຂົ້າມາມີສ່ວນຮ່ວມໃນການປະກອບສະແດງຄຳຄິດເຫັນ, ສ່ອງແສງ ຫລື ວິຈານບັນຫາຕ່າງໆທີ່ເປັນປາກົດການຫຍໍ້ທໍ້ຂອງສັງຄົມ.

ທ່ານ ອຳນວຍການສະ ຖານີ TV ລາວ ກ່າວວ່າ: ຄຽງຄູ່ກັບການພັດທະນາດັ່ງກ່າວ, ສື່ມວນຊົນລາວຍັງຈະຕ້ອງໄດ້ມີຄວາມບຸກບືນພະຍາຍາມພັດທະ ນາຕົນເອງໃຫ້ຫລາຍກວ່າເກົ່າ ເພື່ອຕອບສະໜອງໄດ້ກັບຄວາມຮຽກຮ້ອງຕ້ອງການໃນໄລຍະໃໝ່, ຍຸກສະໄໝຂອງການເຊື່ອມໂຍງກັບສາກົນ ເປັນຕົ້ນດ້ານເນື້ອ ຫາສາລະຂອງລາຍການຍັງມີຈຳ ກັດ ແລະ ບໍ່ລົງເລິກ ດີເທົ່າທີ່ຄວນ, ການນຳສະເໜີຂ່າວສ່ວນໃຫຍ່ແມ່ນມີລັກສະນະລວງດຽວ ໝາຍ ວ່າເຫັນແຕ່ລາຍງານກ່ຽວກັບການເຄື່ອນໄຫວຂອງຂັ້ນເທິງ, ແຕ່ຂ່າວກ່ຽວກັບການພັດທະນາຂອງທ້ອງຖິ່ນຫ່າງໄກສອກຫລີກ ລວມໄປເຖິງຄວາມເດືອດຮ້ອນຂອງປະຊາຊົນຕໍ່ຂັ້ນເທິງແມ່ນມີໜ້ອຍ. ຄຽງຄູ່ກັນນັ້ນ ແຕ່ລະອົງກອນສື່ກໍຕ້ອງເພີ່ມທະວີການລົງ ທຶນໃສ່ລະບົບເຕັກນິກ ແລະ ບຸກຄະລາກອນໃຫ້ຫລາຍກວ່າເກົ່າ ເພື່ອໃຫ້ມີຄວາມທັນສະໄໝ ແລະ ສາມາດເຊື່ອມໂຍງກັບສາ ກົນ ແລະ ພາກພື້ນ.

ທ່ານອຳນວຍການສະ ຖານີ TV ລາວ ກ່າວວ່າ: TV Lao ແມ່ນສະຖານີໂທລະພາບເອກະຊົນລາວລົງທຶນ 100% ໄດ້ເລີ່ມອອກອາກາດໃນທ້າຍປີ 2012 ເປັນຕົ້ນມາ ເຊິ່ງໄດ້ປະຕິບັດພາ ລະບົດບາດຂອງຕົນພາຍໃຕ້ລະບຽບທີ່ກະ ຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວວາງອອກ ໂດຍການເຮັດໜ້າທີ່ຜະລິດສື່ໂທລະພາບຜະລິດລາຍການ ຕ່າງໆເພື່ອໂຄສະນາເຜີຍແຜ່ແນວທາງຂອງພັກ, ລະບຽບກົດໝາຍຂອງລັດ ແລະ ໂຄສະນາຜົນສຳເລັດໃນການພັດ ທະນາເສດ ຖະກິດ-ສັງຄົມໄດ້ສຳເລັດດ້ວຍດີຕະຫລອດມາ ແລະ ໄດ້ຮັບຄວາມຍ້ອງຍໍຈາກພາກລັດ ແລະ ເອກະຊົນ, ສັງຄົມ ທັງພາຍໃນ ແລະ ຕ່າງປະເທດ, ປັດຈຸບັນສະຖານີໄດ້ອອກອາກາດດ້ວຍລະບົບຊັດແຈ້ງສູງ (HD) ເຊິ່ງເປັນລະ ບົບທັນສະໄໝທີ່ສຸດຂອງການສົ່ງສັນຍານອອກອາກາດໃນປັດຈຸບັນ.