ເມື່ອທ້າຍອາທິດຜ່ານມານີ້,ທ່ານ ສີຫຸນ ສິດທິລືໄຊ ຮອງເລຂາຄະນະພັກ, ຮອງປະທານຄະນະກຳມະການເລືອກຕັ້ງຂັ້ນນະຄອນ ຫລວງວຽງຈັນ, ໄດ້ຖະແຫລງຕໍ່ສື່ມວນຊົນກ່ຽວກັບການກະກຽມກອງປະຊຸມຄັ້ງປະຖົມມະລືກຂອງສະພາປະຊາຊົນນະຄອນຫລວງວຽງຈັນຊຸດທີ
I ວ່າ:ກອງປະຊຸມດັ່ງກ່າວຈະໄຂຂຶ້ນແຕ່ລະຫວ່າງວັນທີ
18-20 ພຶດສະພານີ້, ເພື່ອພິຈາລະນາ ແລະ ຮັບຮອງເອົາບັນຫາສຳຄັນພື້ນຖານຕ່າງໆໃນການພັດທະນານະຄອນຫລວງວຽງຈັນໄປສູ່ຄຸນນະພາບໃໝ່ ສອດຄ່ອງຕາມລັດຖະທຳມະນູນ ແລະ ກົດໝາຍກຳນົດໄວ້ຄື: ຮັບຟັງຜົນສຳເລັດການເລືອກຕັ້ງ ແລະ ການຢັ້ງຢືນຄຸນລັກສະນະຂອງສະມາຊິກສະພາປະຊາຊົນນະຄອນຫລວງ, ເລືອກຕັ້ງປະທານ,
ຮອງປະທານ ແລະ ກຳມະການຄະນະປະຈຳຂອງສະພາປະຊາຊົນນະຄອນຫລວງ, ພິຈາລະນາຮັບຮອງເອົາກົງຈັກການ
ຈັດຕັ້ງຂອງສະພາປະຊາຊົນ, ພິຈາລະນາຮັບຮອງເອົາການແຕ່ງຕັ້ງປະທານ, ຮອງປະທານຄະນະກຳມະ ການ ແລະ ເລຂາທິການສະພາປະຊາຊົນນະຄອນຫລວງ, ພ້ອມທັງເລືອກຕັ້ງເຈົ້າຄອງນະຄອນຫລວງ, ພິຈາລະນາໂຄງປະກອບກົງຈັກການຈັດຕັ້ງຂອງອົງການປົກຄອງນະຄອນ ຫລວງ, ພິຈາລະນາຮັບຮອງເອົາການສະເໜີການແຕ່ງຕັ້ງຮອງເຈົ້າຄອງ,
ຫົວໜ້າພະແນກ,
ຫົວໜ້າອົງການລັດທຽບເທົ່າພະແນກຂັ້ນນະຄອນຫລວງ, ພິຈາລະນາຮັບຮອງເອົາການສະເໜີແຕ່ງຕັ້ງຫົວໜ້າອົງການໄອຍະການປະຊາຊົນນະຄອນຫລວງ. ນອກນີ້ຍັງຈະພິຈາລະນາຮັບຮອງເອົາວິໄສທັດຮອດປີ
2030, ຍຸດທະສາດຮອດປີ
2025, ແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານ 5 ປີ
ຄັ້ງທີ VIII ຂອງນະຄອນຫລວງວຽງຈັນ ແລະ ພິຈາລະນາຮັບຮອງເອົາແຜນການ 5 ປີຂອງສະພາປະຊາຊົນນະຄອນຫລວງວຽງຈັນ.
ທ່ານ ສີຫຸນ ກ່າວວ່າ: ກອງປະຊຸມດັ່ງກ່າວແມ່ນເຫດການທາງດ້ານປະຫວັດສາດທີ່ມີຄວາມໝາຍສໍາຄັນທາງດ້ານການເມືອງຢ່າງໜັກແໜ້ນທີ່ຢັ້ງຢືນເຖິງຄວາມເປັນເອກະພາບ ແລະ ຄວາມເຊື່ອໝັ້ນຂອງປວງຊົນຊາວນະຄອນຫລວງຕໍ່ການນຳພາຂອງພັກ-ລັດ, ທັງແມ່ນໝາກຜົນແຫ່ງການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຕາມຫລັກການຂອງພັກທີ່ກຳນົດໄວ້, ໂດຍສະເພາະແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກກ່ຽວກັບການປັບປຸງລະບົບອຳນາດລັດປະຊາທິປະໄຕປະຊາຊົນຂອງພວກເຮົາໄປສູ່ຄຸນນະພາບໃໝ່ທີ່ມີຄວາມເຂັ້ມແຂງ, ຮັບປະກັນໃຫ້ການປະຕິບັດໜ້າທີ່ຕາມລັດຖະທຳມະນູນ ແລະ ກົດໝາຍກຳນົດໄວ້, ພ້ອມທັງຮັບປະກັນການຄຸ້ມຄອງລັດໃຫ້ມີປະສິດທິຜົນ ແລະ ສ້າງລັດເປັນລັດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ.
No comments:
Post a Comment