ເພື່ອເຮັດໃຫ້ການປູກໄມ້ ແລະ ຟື້ນຟູປ່າໃນປີ
2016 ໄດ້ຮັບຜົນດີ ແລະ ບັນລຸຕາມຄາດໝາຍວາງໄວ້, ທັງເປັນພັນທະ,ໜ້າທີ່ ແລະ ມີຂະບວນການຟົດຟື້ນໃນຂອບເຂດທົ່ວປະເທດນັ້ນ, ລັດຖະມົນຕີກະຊວງກະສິກໍາ ແລະ ປ່າໄມ້ຈຶ່ງໄດ້ອອກແຈ້ງການດັ່ງນີ້:(1) ໃຫ້ກົມປ່າໄມ້, ພະແນກກະສິກໍາ ແລະ ປ່າໄມ້ປະຈໍາແຂວງ ແລະ ນະຄອນຫລວງ
ເປັນເຈົ້າການໂຄສະນາເຜີຍແຜ່ບັນດານະໂຍບາຍ ແລະ ລະບຽບກົດໝາຍກ່ຽວກັບການປູກໄມ້,ຟື້ນຟູປ່າທໍາມະຊາດໂດຍຜ່ານສື່ມວນຊົນທຸກປະເພດ, ການປາຖະກາຖາ
ແລະ ຈັດຕັ້ງຂະບວນການຕ່າງໆ ເພື່ອໃຫ້ທົ່ວປວງຊົນຕະຫລອດເຖິງທະຫານ, ຕໍາຫລວດ ແລະ ການຈັດຕັ້ງລວມໝູ່ໄດ້ຮັບຮູ້, ເຊື່ອມຊືມ ແລະ ເຫັນໄດ້ຄວາມສໍາຄັນຂອງວຽກງານປ່າໄມ້, ການປົກປັກຮັກສາສິ່ງແວດລ້ອມ ແລະ ການປ້ອງກັນໄຟໃໝ້ລາມປ່າ.(2) ໃຫ້ພະແນກກະສິກໍາ ແລະ ປ່າໄມ້ປະຈໍາແຂວງ ແລະ ນະຄອນຫລວງຄນຄວ້ານໍາສະເໜີຕໍ່ອົງການປົກຄອງທ້ອງຖິ່ນຂັ້ນຂອງຕົນ ເພື່ອແຕ່ງຕັ້ງຄະນະຮັບພິຊອບວຽກງານປູກໄມ້
ແລະ ຟື້ນຟູປ່າ ໂດຍແມ່ນຂະແໜງກະສິກໍາ ແລະ ປ່າໄມ້ ເປັນໃຈກາງ, ພ້ອມທັງມອບຄວາມຮັບພິຊອບໃຫ້ແກ່ຂະແໜງປ່າໄມ້, ໜ່ວຍງານສົ່ງເສີມປູກໄມ້ ແລະ ການລົງທຶນດ້ານປ່າໄມ້ໂດຍມີການແຕ່ງຕັ້ງພະນັກງານວິຊາການ ເພື່ອລົງຊຸກຍູ້ສົ່ງເສີມແນະນໍາເຕັກນິກວິຊາການປູກ, ບົວລະບັດ, ປົກປັກຮັກສາຕົ້ນໄມ້ທີ່ປູກແລ້ວໃຫ້ເຕີບໃຫຍ່, ຮັກສາອັດ ຕາການລອດຕາຍຂອງເບ້ຍໄມ້ ແລະ ດໍາເນີນການປູກທົດແທນຕົ້ນໄມ້ທີ່ຕາຍ, ໃຫ້ບັນດາໂຄງການປູກໄມ້ຂອງລັດ, ບໍລິສັດ, ຜູ້ປະກອບການ ແລະ ຊາວກະສິກອນ ແນໃສ່ເຮັດໃຫ້ການປູກໄມ້ ແລະ ຟື້ນຟູປ່າທໍາມະຊາດກາຍເປັນຮູບປະທໍາ ແລະ ມີປະສິດທິຜົນກວ່າເກົ່າ.(3) ໃຫ້ພະແນກກະສິກໍາ-ປ່າໄມ້ປະຈໍາແຂວງ,ນະຄອນຫລວງຊີ້ນໍາຂະແໜງປ່າໄມ້ເປັນເຈົ້າການເກັບກໍາ ແລະ ສັງລວມສະຖິຕິເບ້ຍໄມ້ທີ່ຜະລິດໄດ້, ການກະກຽມເນື້ອທີ່ປູກ ແລະ ເນື້ອທີ່ຟື້ນຟູ ໂດຍແຍກລະອຽດແຕ່ລະຊະນິດເບ້ຍໄມ້ທີ່ຜະລິດ ແລະ ເບ້ຍໄມ້ທີ່ຈະປູກໃນແຕ່ລະເຂດ, ພ້ອມທັງສົມທົບກັບອົງການປົກຄອງເມືອງເພື່ອກໍານົດວັນເວລາ, ສະຖານທີ່ເຂດທີ່ຈະປູກ ແລະ ຟື້ນຟູຢ່າງມີຈຸດສຸມ ແລະ ເປົ້າໝາຍແນໃສ່ຮັກສາແຫລ່ງນໍ້າ,ປ້ອງກັນເຂດທີ່ມີຄວາມສ່ຽງຕໍ່ການເຊາະເຈື່ອນ ແລະ ເກີດໄພທໍາມະຊາດ.(4) ໃຫ້ກົມປ່າໄມ້ເປັນເຈົ້າການສົມທົບກັບພະແນກກະສິກໍາ ແລະ ປ່າໄມ້ປະຈໍາແຂວງ, ນະຄອນຫລວງ ແລະ
ຫ້ອງການກະສິກໍາ-ປ່າໄມ້ເມືອງກວດກາ ແລະ ສັງລວມຄືນຕົວເລກການປູກໄມ້ ແລະ ຟື້ນຟູປ່າໃນສົກປີຜ່ານມາ, ໂດຍສົມທຽບໃສ່ຕົວເລກແຜນການດັ່ງກ່າວວ່າສາມາດປະຕິດບັດໄດ້ເທົ່າໃດ, ໄປພ້ອມໆກັນນັ້ນກໍໃຫ້ດໍາເນີນການຂຶ້ນທະບຽນສວນປູກໄມ້ຂອງລັດ, ກົມກອງລວມໝູ່, ການຈັດຕັ້ງ, ນັກລົງທຶນ, ບຸກຄົນ ແລະ ຄອບຄົວ ທີ່ໄດ້ປູກໃນປີຜ່ານມາເພື່ອສັງລວມລາຍງານໃຫ້ກົມປ່າໄມ້ຮັບຊາບເປັນແຕ່ລະໄລະຍະ.(5) ສໍາລັບພັນໄມ້ທີ່ຈະປູກນັ້ນແມ່ນໃຫ້ຖືເອົາຊະນິດໄມ້ທີ່ເປັນເສດຖະກິດ, ຮັກສາແຫລ່ງນໍ້າ, ເໝາະສົມກັບສະພາບແວດລ້ອມຂອງແຕ່ລະທ້ອງຖິ່ນ, ສ່ວນການປູກໄມ້ຢູ່ຕາມສໍານັກງານແມ່ນໃຫ້ເນັ້ນໃສ່ໄມ້ປະດັບ,ໄມ້ໃຫ້ໝາກ,ໄມ້ທີ່ເປັນຮົ່ມລໍາຕົ້ນບໍ່ສູງ ແລະ ຊະນິດພັນໄມ້ປົກປັກຮັກສາສິ່ງແວດລ້ອມ.(6) ສ່ວນການຈັດພິທີປູກໄມ້ເນື່ອງໃນວັນປູກຕົ້ນໄມ້ແຫ່ງຊາດວັນທີ 1 ມິຖຸນານີ້ ແມ່ນໃຫ້ອິງໃສ່ສະພາບເງື່ອນໄຂທີ່ເໝາະສົມຂອງແຕ່ລະທ້ອງຖິ່ນ ໂດຍເນັ້ນໃສ່ເນື້ອທີ່ປຸກລະດົມເປັນຕົ້ນຕໍບົນພື້ນຖານປະຢັດມັດທະຍັດ ແລະ ຕ້ານການຟູມເຟືອຍ, ສ່ວນທ້ອງຖິ່ນໃດ ຫລື
ບ່ອນໃດທີ່ມີເງື່ອນໄຂແມ່ນໃຫ້ເລີ່ມລົງມືປູກແຕ່ດຽວນີຈົນເຖິງທ້າຍເດືອນກັນຍາປີນີ້ ໂດຍບໍ່ໃຫ້ລໍຖ້າແຕ່ວັນທີ 1 ມິຖຸນາ.(7) ໃຫ້ພະແນກກະສິກໍາ ແລະ ປ່າໄມ້ປະຈໍາແຂວງ, ນະຄອນຫລວງ ແລະ
ຫ້ອງການກະສິກໍາ ແລະ ປ່າໄມ້ປະຈໍາເມືອງ ຄົ້ນຄວ້າກ່ຽວກັບຜົນງານຂອງບຸກຄົນ, ຄອບຄົວ, ລວມໝູ່, ກົມກອງ ແລະ ການຈັດຕັ້ງທີ່ໄດ້ປະກອບ ສ່ວນເຫື່ອແຮງ ແລະ ທຶນຮອນເຂົ້າໃນການຄຸ້ມຄອງ ແລະ
ບົວລະບັດຮັກສາປ່າປູກ ແລະ ຟື້ນຟູປ່າ ເພື່ອນໍາສະເໜີຂັ້ນເທິງພິຈາລະນະຍ້ອງຍໍດ້ວຍກຽດຕິຄຸນ, ວັດຖຸພັນ ແລະ ອື່ນໆ ຕາມດໍາລັດຂອງນາຍົກລັດຖະມົນຕີວ່າດ້ວຍການເພີ່ມທະວີວຽກງານແຂ່ງຂັນ-ຍ້ອງຍໍ ແລະ
(8) ໃຫ້ພະແນກກະສິກໍາ ແລະ ປ່າໄມ້ປະຈໍາແຂວງ,ນະຄອນຫລວງຊີ້ນໍາຫ້ອງການກະສິກໍາ ແລະ ປ່າໄມ້ປະຈໍາເມືອງ ເພື່ອສົມທົບກັບອົງການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງຈັດຕັ້ງເຜີຍແຜ່ ແລະ ເຊື່ອມຊືມແຈ້ງການສະບັບນີ້ຢ່າງທົ່ວເຖິງ ແລະ ໃຫ້ໄດ້ຮັບຜົນດີ ແລະ ຜ່ານການຈັດຕັ້ງປະຕິບັດມີຂໍ້ສະດວກ ແລະ ຫຍຸ້ງຍາກແນວໃດໃຫ້ລາຍງານການນໍາກະຊວງຮັບຊາບເພື່ອຫາວິທີແກ້ໄຂຢ່າງທັນການ.
No comments:
Post a Comment