laophatthananewspaper: ໂຄງການເຮືອນຈັດສັນໃນຝັນ

ໂຄງການເຮືອນຈັດສັນໃນຝັນ ຕັ້ງຢູ່ບ້ານໜອງແຫ້ວ ເມືອງຫາດຊາຍຟອງ ນະຄອນຫລວງວຽງຈັນ ໄດ້ມີລູກຄ້າເຂົ້າໄປຈອງກວມເຄິ່ງໜຶ່ງຂອງໂຄງການແລ້ວ ຂະນະທີ່ການກໍ່ສ້າງຍັງບໍ່ທັນສຳເລັດສົມບູນຫລັງໂຄງການດັ່ງ ກ່າວມີນະໂຍບາຍໃຫ້ລູກຄ້າຈ່າຍ ຜ່ອນໃນໄລຍະຍາວຫລາຍ ສີບປີ.

ທ່ານ ພູຂົງ ສະຫວັນ ຜູ້ບໍລິຫານໂຄງການດັ່ງກ່າວ ໃຫ້ສຳພາດກັບນັກຂ່າວໜັງສືພີມລາວພັດທະນາ ໃນວັນທີ 18 ສິງ ຫານີ້ວ່າ:ໂດຍຫລິງເຫັນການເຕີບໃຫຍ່ຂະຫຍາຍຕົວຂອງເສດຖະ ກິດ ແລະ ສັງຄົມ ເວົ້າສະເພາະຢູ່ນະຄອນຫລວງວຽງຈັນ ເຊິ່ງແມ່ນສູນກາງດ້ານເສດຖະກິດ ແລະ ວັດທະນະທຳຂອງປະເທດ ແລະ ຄົນເຂົ້າມາຢູ່ອາໄສເພື່ອສຶກສາຮ່ຳຮຽນ, ປະ ກອບອາຊີບຕ່າງໆເປັນຈຳນວນຫລາຍ, ປັດຈຸບັນມີປະຊາກອນ 7-8 ແສນ ກວ່າຄົນ,ໃນນັ້ນຫລາຍກວ່າ 10% ແມ່ນມາຈາກ ຕ່າງແຂວງ.ຈາກບັນຫາດັ່ງກ່າວຄວາມ ຕ້ອງການດ້ານທີ່ພັກອາໄສຈຶ່ງເພີ່ມຂຶ້ນແຕ່ລະປີ ເຊິ່ງເຫັນໄດ້ໃນບໍ່ເທົ່າໃດປີມານີ້ທຸລະກິດເຮືອນເຊົ່າໄດ້ເກີດຂຶ້ນຫລາຍເພື່ອຮອງຮັບກັບຄວາມຕ້ອງການດັ່ງກ່າວ.

ໂຄງການເຮືອນຈັດສັນໃນຝັນ ກໍແມ່ນໂຄງການໜຶ່ງທີ່ສ້າງຂຶ້ນເພື່ອຕອບສະໜອງໃຫ້ລູກຄ້າທີ່ຕ້ອງການມີບ່ອນຢູ່ອາໄສໝັ້ນ ຄົງຖາວອນໃນຕົວເມືອງ ເຊິ່ງ ໂຄງການນີ້ໄດ້ເລີ່ມກໍ່ສ້າງມາແຕ່ຕົ້ນປີນີ້ ມີເນື້ອທີ່ 7 ເຮັກຕາ,ໃນນັ້ນ ໄດ້ປຸກສ້າງເຮືອນຊັ້ນ ດຽວ 20 ຫລັງ ຂາຍໃນລາຄາ 375 ລ້ານກີບຕໍ່ຫລັງ,ອາຄານຫ້ອງແຖວສອງຊັ້ນ 13 ຫ້ອງ ແລະ ອາຄານ ຫ້ອງແຖວຊັ້ນດຽວ 18 ຫ້ອງ ຂາຍໃນລາຄາປະມານ 227 ລ້ານກີບຕໍ່ຫ້ອງ ໂດຍໄດ້ອອກແບບໃຫ້ມີຄວາມສະດວກສະບາຍ,ຫລູ ຫລາ ແລະ ທັນສະໄໝ ເໝາະກັບການດຳລົງຊີວິດໃນຕົວເມືອງ. ນອກຈາກນີ້ເຮືອນແຕ່ລະປະເພດໄດ້ມີການປະກອບເຄື່ອງໃຊ້ໄຟຟ້າ ແລະ ຕົກແຕ່ງເຟີນີເຈີ ຄື ແອ,ຕູ້ເຢັນ,ຕັ່ງຊຸດໂຊຟາ,ຊຸດບ່ອນນອນ(ຕຽງ,ຕູ້ເສື້ອຜ້າ ແລະ ໂຕະແຕ່ງໜ້າ),ຊຸດເຮືອນຄົວ,ໂຕະກິນເຂົ້າ ແລະ ສິ່ງອຳນວຍຄວາມ ສະດວກອື່ນໆ ແລະ ສິ່ງສຳຄັນ ທາງໂຄງການຍັງມີນະໂຍບາຍໃຫ້ລູກຄ້າຈ່າຍກ່ອນພຽງ 30% ຂອງມູນຄ່າ ແລະ ຈ່າຍຜ່ອນໃນໄລຍະຍາວເຖິງ 30 ປີ ແລະ ເມື່ອ ລູກຄ້າຈ່າຍຜ່ອນໝົດກໍຈະໄດ້ເປັນເຈົ້າຂອງກຳມະສິດເຮືອນ ແລະ ທີ່ດິນດັ່ງກ່າວເລີຍ ໂດຍສາມາດເອົາໄປເປັນຊັບສີນເພື່ອເຮັດທຸລະກຳທາງການເງິນຕ່າງໆໄດ້ໃນອານາຄົດຂ້າງໜ້າ ເຊິ່ງເຫັນວ່າ:ຈຸດນີ້ເປັນທີ່ຖືກອົກຖືກໃຈ ຂອງລູກຄ້າບໍ່ໜ້ອຍໂດຍສະເພາະ ແມ່ນຜູ້ທີ່ມີລາຍຮັບໃນລະດັບປານກາງທີ່ມີຄວາມໃຝ່ຝັນຢາກມີເຮືອນຢູ່ເປັນຂອງຕົນເອງຢ່າງໝັ້ນຄົງຖາວອນ. ປັດຈຸບັນ, ການກໍ່ສ້າງໂຄງການດັ່ງກ່າວຄືບໜ້າຫລາຍກວ່າ 50% ແລະ ມີລູກຄ້າມາຈອງເຮືອນໄປແລ້ວເກືອບເຄິ່ງໜຶ່ງ ໂດຍສ່ວນຫລາຍແມ່ນ, ນັກທຸລະກິດ, ພະນັກງານ ແລະ ລວມໄປເຖິງຊາວຄ້າຂາຍເປັນຕົ້ນ.

ທ່ານ ພູຂົງ ກ່າວວ່າ:ໂຄງ ການເຮືອນຈັດສັນໃນຝັນ ມີມູນຄ່າການກໍ່ສ້າງປະມານ 20 ຕື້ກີບໂດຍແມ່ນນັກທຸລະກິດເອກະຊົນລາວລົງທຶນ 100% ຕັ້ງຢູ່ຫ່າງຈາກຕົວເມືອງໄປຕາມເສັ້ນທາງທ່າເດື່ອປະມານ 20 ກິໂລແມັດ ໃກ້ສະໜາມກ໊ອຟລອງວຽງ ບ້ານໜອງແຫ້ວ ເມືອງຫາດຊາຍຟອງ ນະຄອນຫລວງວຽງຈັນ.