ລາວເອົາໃຈໃສ່ວຽກງານຕ້ານການສໍ້ລາດບັງຫລວງ

      ທ່ານ ບຸນປອນ ສັງສົມສັກ ຮອງຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ກ່າວໃນກອງປະຊຸມເຜີຍແຜ່ຜົນ ສຳເລັດການຈັດຕັ້ງປະຕິບັດສົນທິສັນຍາສະຫະປະຊາຊາດວ່າ ດ້ວຍການຕ້ານການສໍ້ລາດບັງ ຫລວງ ແລະ ການເຄື່ອນໄຫວ ວຽກງານຕ້ານການສໍ້ລາດບັງ ຫລວງ ສປປ ລາວ ໃນວັນທີ 27 ກຸມພານີ້ວ່າ: ສປປ ລາວ ໄດ້ເອົາໃຈໃສ່ປະຕິບັດວຽກງານ ສະກັດກັ້ນ ແລະ ຕ້ານການສໍ້ລາດບັງຫລວງຢ່າງມີຜົນສຳເລັດຫລາຍດ້ານຊຶ່ງສະແດງອອກຄື: ໄດ້ປັບ ປຸງກົດໝາຍວ່າດ້ວຍການສໍ້ລາດບັງຫລວງໂດຍໄດ້ກຳນົດໃຫ້ອົງການຕ້ານການສໍ້ລາດ ບັງຫລວງ ເປັນອົງການສືບສວນສອບສວນຢ່າງເຕັມສ່ວນ, ໄດ້ອອກ ນິຕິກຳຈຳນວນໜຶ່ງເພື່ອ ເປັນເຄື່ອງມືສະກັດກັ້ນ ແລະ ຕ້ານການສໍ້ລາດບັງຫລວງເປັນຕົ້ນ: ດຳລັດວ່າດ້ວຍການແຈ້ງ ຊັບສິນ, ແຜນຍຸດທະສາດຕ້ານການສໍ້ລາດບັງຫລວງ, ມະຕິຂອງຄະນະບໍລິ ງານສູນກາງພັກວ່າດ້ວຍການເພີ່ມທະວີວຽກງານ ຕິດຕາມ, ກວດກາ, ສະກັດກັ້ນ ແລະ ຕ້ານ ການສໍ້ລາດບັງຫລວງໃນເງື່ອນໄຂໃໝ່.

      ທ່ານຮອງຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງກ່າວຕື່ມວ່າ: ໄພອັນຕະລາຍຂອງການສໍ້ລາດບັງ ຫລວງ ທີ່ພວມຂ່ົມຂູ່ຕໍ່ສະຖຽນລະພາບຂອງອົງການຈັດຕັ້ງ ແລະ ພະນັກງານ, ເປັນບັນຫາທີ່ປະເທດ ແລະ ອົງການຈັດຕັ້ງສາກົນ
ເອົາໃຈໃສ່ຕິດຕາມເປັນພິເສດ ແລະ ເປັນບັນຫາທີ່ກະທົບເຖິງບົດບາດການຄຸ້ມຄອງຂອງລັດ ແລະ ຄວາມໝັ້ນຄົງຂອງລະ ບອບການເມືອງ, ເປັນການບົ່ງບອກເຖິງຄວາມສາມາດກໍຄືປະສິດທິຜົນຂອງການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໃນເງື່ອນໄຂເສດຖະກິດຕະຫລາດ. ສຳລັບການປະຕິບັດສົນທິສັນຍາ (ສປຊ) ວ່າດ້ວຍ ການຕ້ານການສໍ້ລາດບັງຫລວງ ຂອງລາວ, ບັນດາຄະນະຊ່ຽວຊານຈາກລຸກຊຳບວກ, ມົງໂກລລີ ແລະ ກອງເລຂາ UNODC  ປະຈຳກຸງວຽນ ປະເທດ ໂອຕຣິດ ໄດ້ຕີລາຄາວ່າ: ບົດປະເມີນຜົນ ຂອງລາວ ໄດ້ກຳນົດລະອຽດພໍ ສົມຄວນກ່ຽວກັບການຈັດຕັ້ງປະຕິບັດສົນທິສັນຍາ (ສປຊ) ວ່າດ້ວຍການຕ້ານການສໍ້ລາດບັງຫລວງໂດຍໄດ້ນຳເອົາບາງມາດຕາຢູ່ໃນລັດຖະທຳມະນູນ, ກົດໝາຍ ແລະ ນິຕິກຳ ມາຢັ້ງຢືນ.