ຕາມການລາຍງານຂອງຮອງຫົວໜ້າກອງບັນຊາການ
ປກສ ນະຄອນຫລວງວຽງຈັນ ຕໍ່ກອງປະຊຸມຄະນະພັກຂອງຕົນ ເມື່ອມໍ່ໆມານີ້ ໃຫ້ຮູ້ວ່າ:
ໃນປີ 2013 ຜ່ານມາ, ກຳລັງເຈົ້າໜ້າທີ່ປາບປາມຢາເສບຕິດໄດ້ມີຄວາມພະຍາຍາມສູງໃນການສະກັດກັ້ນ
ແລະ ຕ້ານຢາເສບຕິດຢູ່ໃນຂອບເຂດຄວາມຮັບຜິດຊອບຂອງຕົນ ແລະ ສາມາດມ້າງຄະດີຄ້າຂາຍ
ແລະ ມົ້ວສຸມຢາເສບຕິດໄດ້ 362 ເລື່ອງ, ຈັບຕົວຜູ້ຕ້ອງຫາມາດຳເນີນຄະດີໄດ້ຫລາຍກວ່າ
500 ຄົນ, ສາມາດຢຶດຂອງກາງປະເພດຢາບ້າໄດ້ຫລາຍກວ່າ 4 ແສນເມັດ, ເຮໂຣອິນໄດ້ເກືອບ
3 ກິໂລ, ຢາໄອເກືອບກິໂລ, ຝິ່ນດິບ 1,4 ກິໂລ ແລະ ເຄື່ອງມືອຸປະກອນອື່ນໆສຳລັບການເຄື່ອນໄຫວຄ້າຂາຍ
ແລະ ເສບຢາເສບຕິດ.
ຜູ້ລາຍງານຂ່າວໃຫ້ຮູ້ວ່າ:
ໜ້າເປັນຫ່ວງທີ່ສຸດໃນຂະບວນການມົ້ວສຸມຢາເສບຕິດດັ່ງກ່າວສ່ວນຫລາຍແມ່ນກຸ່ມນັກຮຽນ-
ນັກສຶກສາ ແລະ ໄວໜຸ່ມຜູ້ບໍ່ມີວຽກເຮັດງານທຳ. ຈາກນັ້ນກໍພາໃຫ້ເກີດສິ່ງຫຍໍ້ທໍ້ຕ່າງໆ
ຄືຂີ້ລັກງັດແງະ, ປຸ້ນຈີ້ຊິງຊັບ, ລັກຊັບ ແລະ ອື່ນໆເກີດຂຶ້ນໃນສັງຄົມ ຄືໃນວັນທີ
31 ມັງກອນຜ່ານມານີ້, ກຳລັງ ປກສ ເມືອງໄຊເສດຖາ ແລະ ປກສ ນະຄອນຫລວງ
ວຽງຈັນ ກໍສາມາດມ້າງຄະດີຢາເສບຕິດໄດ້ໜຶ່ງລາຍຢູ່ບ້ານທາດຫຼວງໃຕ້
ເມືອງໄຊເສດຖາ ສາມາດຈັບຕົວຜູ້ຕ້ອງສົງໄສໄດ້ 3 ຄົນ ຄືນາງ ເຄືອວັນ ອາຍຸ
39 ປີ ຜູ້ເປັນເຈົ້າຂອງເຮືອນ ແລະ ທ້າວ ແຊມພູ ອາຍຸ 24 ປີ, ທ້າວ ແສງຈັນ ອາຍຸ
32 ປີ ທັງສອງຢູ່ບ້ານນາຄວາຍໃຕ້ ມີອາຊີບກຳມະກອນ ແລະ ສາມາດຢຶດຂອງກາງປະເພດຢາບ້າໄດ້
1.170 ເມັດ ແລະ ເງິນສົດຈຳນວນໜຶ່ງ. ປັດຈຸບັນເຈົ້າໜ້າທີ່ພວມດຳເນີນການສອບສວນ
ແລະ ສືບສວນຂະຫຍາຍຜົນ ເພື່ອຊັກຖອດຜູ້ຕ້ອງຫາຕໍ່ໄປ.
ບົດລາຍງານດັ່ງກ່າວຍັງຊີ້ໃຫ້ເຫັນວ່າ:
ໃນປີ 2013 ຜ່ານມາ, ຢູ່ນະຄອນຫລວງວຽງຈັນ ມີຄະດີເກີດຂຶ້ນທັງໝົດ 1.359 ເລື່ອງ
ທຽບໃສ່ປີ 2012 ຜ່ານມາ ເພີ່ມຂຶ້ນ 300 ກວ່າເລື່ອງ, ໃນນັ້ນ ເຈົ້າ ໜ້າທີ່ສາມາດແກ້ໄຂໄດ້ແລ້ວ
887 ເລື່ອງ, ກັກຕົວຜູ້ຕ້ອງຫາມາດຳເນີນຄະດີໄດ້ 1.413 ຄົນ ສ່ວນໃຫຍ່ແມ່ນຄະດີປຸ້ນຈີ້ຊິງຊັບ,
ລັກຊັບພົນລະເມືອງ, ບັນຫາຢາເສບຕິດ ແລະ ອຸປະຕິເຫດ ແລະ ເພື່ອຢາກແກ້ໄຂບັນຫາດັ່ງກ່າວໃຫ້ມີຜົນ
ຕ້ອງແມ່ນການຮ່ວມມືຂອງຫລາຍພາກສ່ວນ, ປະຊາຊົນ ແລະ ສັງຄົມຕ້ອງເປັນຫູເປັນຕາຊ່ວຍເຈົ້າໜ້າທີ່,
ພ້ອມນັ້ນ ສະຖາບັນຄອບຄົວ ແລະ ການສຶກສາ ກໍຕ້ອງເປັນເຈົ້າການເຮັດໜ້າທີ່ສຶກສາອົບຮົມລູກຫລານ
ແລະ ລູກສິດຂອງຕົນໃຫ້ຫລາຍຂຶ້ນ. ພ້ອມນັ້ນ ເບື້ອງຂະບວນຍຸຕິທຳກໍຕ້ອງມີຄວາມເຂັ້ມງວດປະຕິບັດມາດຕະການທາງລະບຽບກົດໝາຍໃຫ້ໄດ້ດີກວ່າເກົ່າ
ເພື່ອລົງໂທດຜູ້ກະທຳຜິດໃຫ້ມີຄວາມເຄັດຫລາບ ຄືໃນປັດຈຸບັນຢູ່ນະຄອນຫລວງວຽງຈັນ
ຍັງມີຜູ້ປະຕິບັດໂທດ ແລະ ດັດສ້າງຢູ່ຫລາຍກວ່າ 3.000 ຄົນ ສ່ວນໃຫຍ່ແມ່ນຜູ້ຕ້ອງໂທດກ່ຽວກັບການຄ້າຂາຍ
ແລະ ມົ້ວສຸມຢາເສບຕິດ.
No comments:
Post a Comment