laophatthananewspaper: ສະພາແຫ່ງຊາດລາວ-ຫວຽດນາມ-ກຳປູເຈຍ ແລກປ່ຽນບົດຮຽນດ້ານການກວດກາງົບປະມານແຫ່ງລັດ

ການສຳມະນາຮ່ວມຂອງກຳມາທິການເສດຖະກິດ-ແຜນ ການ ແລະ ການເງິນສະພາແຫ່ງຊາດ 3 ປະເທດ ຄື ສປປ ລາວ, ສສ ຫວຽດນາມ ແລະ ຣາຊະອາ ນາຈັກ ກຳປູເຈຍ ໄດ້ມີຂຶ້ນໃນວັນທີ 19 ມີນາ 2014 ນີ້ ຢູ່ໂຮງແຮມລາວພລາຊາ ນະຄອນຫລວງວຽງຈັນ ແລະ ຈະດຳເນີນໄປເປັນເວລາ 2 ມື້ ໂດຍເປົ້າໝາຍສຳຄັນແມ່ນພ້ອມກັນຄົ້ນຄວ້າ ແລະ ແລກປ່ຽນບົດຮຽນໃນຫົວຂໍ້ “ເພີ່ມທະວີບົດບາດຂອງສະພາແຫ່ງຊາດໃນການຕິດຕາມກວດ ກາງົບປະມານແຫ່ງລັດ” ໂດຍສະເພາະກົນໄກການປະສານງານກັບກະຊວງການເງິນ ແລະ ອົງ ການກວດສອບແຫ່ງລັດ ໃນການຮັບຮອງເອົາແຜນງົບປະມານແຫ່ງລັດປະຈຳປີ ລວມເຖິງມາດຕະການແກ້ໄຂຜົນຂອງການ ກວດສອບຕໍ່ກັບບັນດາຫົວໜ່ວຍງົບປະມານທີ່ລະເມີດກົດໝາຍ ແລະ ແນວທາງການຮ່ວມມືຊ່ວຍເຫລືອຂອງກຳມາທິການທັງສາມປະເທດໃຫ້ດີຂຶ້ນກວ່າເກົ່າ.

ການສຳມະນາຄັ້ງນີ້, ເຈົ້າ ພາບ ສປປ ລາວ ນຳໂດຍທ່ານ ດຣ. ນາງ ສຸວັນເພັງ ບຸບຜານຸວົງ ປະທານກຳມາທິການເສດຖະ ກິດ-ແຜນການ ແລະ ການເງິນສະພາແຫ່ງຊາດລາວ, ທ່ານ ຟຸ້ງ ກວັກ ຫ້ຽນ ກຳມາທິການການເງິນ ແລະ ງົບປະມານ ສະພາແຫ່ງຊາດຫວຽດນາມ ແລະ ທ່ານ ດຣ. ຈຽມຢຽບ ປະທານກຳມາທິການເສດຖະກິດ, ການເງິນ, ການທະນາຄານ ແລະ ການ ກວດສອບສະພາແຫ່ງຊາດກຳປູເຈຍ ໂດຍທ່ານ ດຣ. ນາງ ສຸວັນເພັງ ບຸບຜານຸວົງ ກ່າວວ່າ: ສະພາແຫ່ງຊາດລາວ ຖືສຳຄັນວຽກງານການຕິດຕາມກວດກາງົບປະມານແຫ່ງລັດ ໂດຍການສະໜັບສະໜູນຂອງອົງການກວດສອບແຫ່ງລັດ ເນື່ອງຈາກວ່າສະພາແຫ່ງຊາດໄດ້ຖືເອົາຜົນການກວດສອບນັ້ນມາເປັນບ່ອນອີງໃນການພິຈາລະນາຮັບຮອງເອົາບົດສະຫລຸບຂາດຕົວການຈັດຕັ້ງປະ ຕິບັດງົບປະມານແຫ່ງລັດແຕ່ລະສົກປີ ແລະ ຮັບຮອງແຜນງົບປະມານລາຍຮັບ-ລາຍຈ່າຍປະຈຳປີ.

ອົງການກວດສອບແຫ່ງລັດ ແມ່ນເຄື່ອງມືດ້ານວິຊາການທີ່ຂາດບໍ່ໄດ້ຂອງສະພາແຫ່ງຊາດໃນການຕົກລົງບັນຫາງົບປະ ມານ. ດ້ວຍເຫດນັ້ນ, ກຳມາທິ ການເສດຖະກິດ-ແຜນການ ແລະ ການເງິນ ໄດ້ເອົາໃຈໃສ່ເຮັດວຽກຢ່າງໃກ້ຊິດກັບອົງການກວດສອບແຫ່ງລັດ ເພື່ອສ້າງສະພາບເອື້ອອຳນວຍ ແລະ ປະກອບຊັບ ພະຍາກອນທີ່ຈຳເປັນໃຫ້ແກ່ອົງ ການກວດສອບແຫ່ງລັດຕາມເງື່ອນໄຂຕົວຈິງເພື່ອໃຫ້ສາມາດດຳເນີນງານຢ່າງມີປະສິດທິຜົນ.

ທ່ານ ດຣ. ນາງ ສຸວັນເພັງ ບຸບຜານຸວົງ ກ່າວຕື່ມວ່າ: ຈາກການເຮັດວຽກຮ່ວມກັນຂອງສະ ພາແຫ່ງຊາດ ແລະ ອົງການກວດສອບແຫ່ງລັດທີ່ນັບມື້ມີປະສິດທິຜົນດີຂຶ້ນນັ້ນ ໄດ້ເຮັດໃຫ້ວຽກງານກວດກາງົບປະມານແຫ່ງລັດມີຜົນສຳເລັດດີຂຶ້ນຕາມລຳ ດັບ ແລະ ໄດ້ປະກອບສ່ວນໃຫ້ ການປະຕິບັດລະບຽບກົດໝາຍການເງິນຂອງບັນດາຫົວໜ່ວຍງົບປະມານໄດ້ຮັບການປັບປຸງດີຂຶ້ນເທື່ອລະກ້າວ.

ຍັງອີກບໍ່ດົນ 3 ປະເທດ ຈະໄດ້ເຂົ້າເປັນສະມາຊິກປະຊາຄົມເສດຖະກິດອາຊຽນ ເຊິ່ງທັງສາມປະເທດຈະຜະເຊີນກັບສິ່ງທ້າທາຍອັນໃຫຍ່ຫລວງໃນດ້ານການແຂ່ງຂັນ ແລະ ຍາດແຍ່ງຜົນປະໂຫຍດທາງເສດຖະກິດຈາກການເຊື່ອມໂຍງມາສູ່ປະເທດ. ສະນັ້ນ ຈຶ່ງຮຽກຮ້ອງໃຫ້ພ້ອມກັນເອົາໃຈໃສ່ວຽກງານການກວດກາ ແລະ ປັບປຸງຄືນລະບົບນິຕິກຳໃຫ້ມີປະສິດທິຜົນ ແລະ ສອດຄ່ອງກັບການເຊື່ອມໂຍງລວມເຖິງກົນໄກການຄຸ້ມຄອງຕ່າງໆໂດຍສະເພາະໃນຂົງເຂດແຜນການ-ການເງິນ ແລະ ງົບປະມານ.

ຢ່າງໃດກໍຕາມ, ທ່ານ ດຣ. ນາງ ສຸວັນເພັງ ບຸບຜານຸວົງ ໄດ້ສະເໜີໃຫ້ ສສ ຫວຽດນາມ ເຊິ່ງມີບົດຮຽນ ແລະ ປະສົບການ ທັງມີຄວາມສາມາດສູງທາງດ້ານວິຊາການໃຫ້ຄວາມຮ່ວມມືຊີ້ນຳຊ່ວຍເຫລືອ. ພ້ອມນີ້ ຍັງໄດ້ສະເໜີໃຫ້ມີການເຊື້ອເຊີນສາທາ ລະນະລັດ ສະຫະພາບມຽນມາ ເຂົ້າຮ່ວມນຳ ໃນໂອກາດຕໍ່ໄປເພື່ອສ້າງກົນໄກການຮ່ວມມື 4 ປະເທດສະມາຊິກອາຊຽນໃໝ່ເພື່ອໃຫ້ສາມາດຍາດແຍ່ງການຊ່ວຍເຫລືອທາງວິຊາການ ແລະ ທຶນຮອນຈາກກອງທຶນຫລຸດຜ່ອນຄວາມຫລຸດໂຕນຂອງປະເທດອາຊຽນໃໝ່-ເກົ່າ ແລະ ກອງທຶນສາກົນອື່ນໆ.