ສຳນັກຂ່າວສານປະເທດລາວ ແລະ ກຽວໂດຍີ່ປຸ່ນເພີ່ມທະວີການຮ່ວມມືສອງຝ່າຍ

ເພື່ອຜັນຂະຫຍາຍໝາກຜົນຂອງການພົບປະລະຫວ່າງສອງນາຍົກລັດຖະມົນຕີລາວ ແລະ ຍີ່ປຸ່ນໃນໂອກາດສະເຫລີມສະຫລອງຄົບຮອບ 60 ປີແຫ່ງສາຍພົວພັນການ ທູດທີ່ຈັດຂຶ້ນໃນເດືອນມີນາຜ່ານມາທີ່ນະຄອນ ຫລວງໂຕກຽວໃນການເພີ່ມທະ ວີການຮ່ວມມືຂົງເຂດສື່ມວນຊົນລະຫວ່າງ ສອງປະເທດລາວ ແລະ ຍີ່ປຸ່ນໃຫ້ເລິກ ເຊິ່ງກວ່າເກົ່າ, ດັ່ງນັ້ນໃນວັນທີ 22 ມິຖຸນານີ້ ຢູ່ໂຮງແຮມລ້ານຊ້າງ ນະຄອນຫລວງ ວຽງຈັນ ໄດ້ມີພິທີລົງນາມບົດບັນທຶກການຮ່ວມມືສອງຝ່າຍລະຫວ່າງທ່ານ ສູນ ທອນ ຄັນທະວົງ ອຳນວຍການສຳນັກຂ່າວສານ ປະເທດລາວ(ຂປລ) ແລະ ທ່ານ ໂມຣິຢາຊຶ ຈີກາຊາວະ ຫົວໜ້າສູນຂ່າວ ປະຈຳພາກພື້ນອາຊີ ສຳນັກຂ່າວສານກຽວໂດປະເທດຍີ່ປຸ່ນ, ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊະມົນຕຣີ ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຮີໂຣຢູກິ ກີຊີໂນະ ເອກອັກ ຄະລາຊະທູດຜູ້ມີອຳນາດເຕັມແຫ່ງປະເທດຍີ່ປຸ່ນປະຈຳລາວ,ພ້ອມດ້ວຍພະນັກງານກ່ຽວຂ້ອງສອງຝ່າຍເຂົ້າຮ່ວມຈຳນວນຫລາຍ.

ສຳນັກຂ່າວສານປະເທດລາວ ແລະ ສຳນັກຂ່າວສານກຽວໂດ ເຄີຍເປັນຄູ່ຮ່ວມມືກັນມາຍາວນານແລ້ວໃນຂອບການຮ່ວມມືການລະດັບພາກພື້ນອາຊີ-ປາຊີຟີກ ຫລື (OANA), ເຊິ່ງ ຂປລ ໄດ້ເລືອກນຳໃຊ້ແຫລ່ງຂ່າວ, ບົດ ແລະ ຮູບຂອງສຳນັກຂ່າວກຽວໂດຜ່ານເວັບໄຊ ເພື່ອຈັດພິມລົງໃນໜັງສືພິມ KPL News ເປັນພາສາຕ່າງປະເທດ, ເຊິ່ງແມ່ນຜະລິດຕະພັນໜຶ່ງຂອງ ຂປລ ແລະ ໃນປີ 2014 ສຳນັກຂ່າວກຽວໂດ, ໄດ້ສົ່ງວິຊາການຂອງ ຕົນມາຢ້ຽມຢາມ ຂປລ ເພື່ອສຶກສາຄວາມຕ້ອງການອັນສຳຄັນໃນການເພີ່ມທະວີການຮ່ວມມືສອງຝ່າຍ ແລະ ເຫັນວ່າຝ່າຍ ຂປລ ໄດ້ສະເໜີໃຫ້ສຳ ນັກຂ່າວກຽວໂດຜະລິດຂ່າວທີ່ລົງເລິກກ່ຽວກັບການເຄື່ອນໄຫວຕ່າງໆກ່ຽວ ກັບລາວຢູ່ປະເທດ ຍີ່ປຸ່ນເຊັ່ນ: ການຢ້ຽມຢາມຍີ່ປຸ່ນຂອງບັນດາການນຳລາວລວມເຖິງການເຄື່ອນໄຫວອື່ນໆຂອງນັກຮຽນ, ນັກສຶກສາລາວ ແລະ ຄົນລາວທີ່ເຮັດວຽກ ແລະ ດຳລົງຊີວິດຢູ່ປະເທດຍີ່ປຸ່ນ ເພື່ອເປັນການປະກອບສ່ວນເຂົ້າໃນການເສີມຂະຫຍາຍສາຍ ພົວພັນມິດຕະພາບ ແລະ ການຮ່ວມມືລະຫວ່າງສອງຊາດລາວ-ຍີ່ປຸ່ນເວົ້າລວມ ເວົ້າສະເພາະໃນຂົງເຂດສື່ມວນຊົນ ໃນການແລກປ່ຽນຂໍ້ມູຂ່າວສານທີ່ຖືກຕ້ອງ, ມີປະໂຫຍດເພື່ອເຜີຍແຜ່ອອກສູ່ສັງຄົມ, ນອກຈາກນີ້ຍັງເປັນການ ຮ່ວມມືສົ່ງເສີມດ້ານວິຊາການ ແລະ ສ້າງຄວາມຮັບຮູ້ເຂົ້າໃຈເຊິ່ງກັນ ແລະ ກັນລະຫວ່າງປະຊາຊົນຍີ່ປຸ່ນ ແລະ ລາວໃຫ້ຫລາຍກວ່າເກົ່າ.