ບໍລິສັດ ຮ່ວມພັດທະນາກະສິກຳ ຂາອອກ-ຂາເຂົ້າ ຈຳກັດ ( ຢູດີ ຟາມ) ແລະ ບໍລິສັດ KEI ZAN ຈຳກັດ ຕົກລົງ​ຮ່ວມ​ປູກ​ໄມ້ຕິ້ວຜະລິດ​ຖ່ານ​ຂາວ

          ທ້າຍອາທິດຜ່ານມານີ້, ບໍລິສັດ ຮ່ວມພັດທະນາກະສິກ ຂາ ອອກ-ຂາເຂ້າ ຈຳກັດ ຫຼື (ຢູດີ ຟາມ) ແລະ ບໍລິ ສັດ KEI ZAN ຈຳກັດ ຈາກ​ຍີ່ປຸ່ນ ​ໄດ້​ຕົກລົງ​ຮ່ວມ​ມືປູກໄມ້ຕິ້ວເປັນວັດຖຸດິບສຳລັບ ການຜະລິດຖ່ານຂາວແບບຍືນຍົງ ​ເຊິ່ງພິທີ​ເຊັນ​ບົດ​ບັນທຶກ​ຄວາມ​ເຂົ້າ​ໃຈ​ດັ່ງກ່າວ​ໄດ້​ມີ​ຂຶ້ນທີ່​ແຂວງ​ວຽງ​ຈັນ ລະຫວ່າງທ່ານ ນິດສະ ຫວັນຫຼວງໂຄດປຣະວົງວຽງຄຳ ປະທານ ບໍລິ ສັດ UD ຟາມ ແລະ ທ່ານ ເຄອີຈີ ອາຊາໂນະ ( KEIICHI ASANO) ປະທານບໍລິສັດ KEI ZAN ຈຳກັດ ​ໂດຍ​ການເຂົ້າ ຮ່ວມ ຂອງທ່ານ ດຣ. ເພັດ ພົມພິພັກ ລັດຖະມົນຕີຊ່ວຍວ່າການ ກະຊວງ ກະສິກຳ ແລະ ປ່າໄມ້, ທ່ານ ນາງ ສິງຄຳ ຄົງທະປານ ຮອງເຈົ້າແຂວງ, ແຂວງວຽງຈັນ, ທ່ານ ເອກອັກຄະລັດສະທູດຍີ່ປຸນ ປະຈຳ ສປປ ລາວ, ທ່ານ  ເອກອັກຄະລັດສະທູດລາວ ປະຈຳຍີ່ປຸນ ເຂົ້າຮ່ວມນຳ​ດ້ວຍ.

          ທ່ານ ນິດສະຫວັນ ​ໃຫ້​ຮູ້ວ່າ: ບົດບັນທຶກດັ່ງກ່າວ​ໄດ້​ລະບຸ​ວ່າ: ຝ່າຍ ບໍລິສັດ KEI ZAN ຈະເປັນຜູ້ສະໜອງດ້ານ ເຕັກນິກວິຊາການ, ທຶນຮອນອັນຈຳເປັນຈຳນວນ​ໜຶ່ງໃຫ້ແກ່ບໍລິສັດ UD ຟາມ ແລະ ເຮັດໜ້າທີດ້ານການຕະຫຼາດ, ສ່ວນບໍ ລິສັດ UD ຟາມ ຈະເຮັດໜ້າທີ່ຈັດຫາເນື້ອທີ່ປູກຕົ້ນ​ໄມ້ຕິ້ວຢູ່ຂອບເຂດແຂວງວຽງຈັນ ແລະ ເຂດອື່ນໆ, ຄາດວ່າ 5 ປີໄມ້ທີ່ ປູກຈະສາມາດຕັດນຳໄປຜະລິດເປັນຖ່ານຂາວ ເພື່ອສົ່ງໃຫ້ບໍລິສັດ KEI ZAN ໄດ້.

          ທ່ານ ເຄອີຈີ ກ່າວວ່າ: ປີນີ້ ແມ່ນຮົບຮອບ 60 ປີຂອງສາຍພົວພັນການທູດ ລາວ-ຍີ່ປຸ່ນ ​ແລະ  ຂ້າພະເຈົ້າຮູ້ສຶກຍິນດີ ທີ່ໄດ້ມີໂອກາດມາລົງທຶນຮ່ວມກັບບໍລິສັດ UD ຟາມ ເຊິ່ງເປັນ ບໍລິສັດທີ່ມີພື້ນທີ່ ແລະ ສິ່ງອຳນວຍຄວາມສະດວກໃນການ ປູກຕົ້ນໄມ້ຕິ້ວເພື່ອຜະລິດເປັນຖ່ານຂາວ, ສຳລັບ ບໍລິສັດ KEI ZAN ແມ່ນໄດ້ລິເລີ່ມການດຳເນີນທຸລະກິດໃນ ສປປ ລາວ ແລ້ວ ແລະ ຜ່ານ​ມາ​ກໍໄດ້ມີການສົ່ງອອກຖ່ານຂາວທີ່ເຮັດດ້ວຍໄມ້ ຕິ້ວປະມານ 700 ໂຕນ ໄປຍັງປະເທດຍີ່ປຸ່ນ ​ແລະ ກໍ​ໄດ້ມີຄວາມນິຍົມສູງ​ຈາກ​ຜູ້​ຊົມ​ໃຊ້​ໃນ​ຍີ່ປຸ່ນ ​ແລະ ຫວັງ​ວ່າການ​ຮ່ວມ​ມື​ດັ່ງກ່າວ​ຈະ​ມີ​ຜົນສຳ​ເລັດ​ເປັນ​ຢ່າງ​ດີ.