ພິທີມອບ-ຮັບ ແລະ ເປີດນຳໃຊ້ໂຮງຮຽນມັດທະຍົມວຽງພູຄາ
ໄດ້ມີຂຶ້ນໃນແລງວັນທີ
29 ກໍລະກົດນີ້ ຢູ່ທີ່ເມືອງວຽງພູຄາ
ແຂວງຫລວງນ້ຳທາ ແລະ ນີ້ເປັນໂຮງຮຽນແຫ່ງທີສອງຂອງແຂວງຫລວງນ້ຳທາທີ່ໄດ້ຮັບທຶນຊ່ວຍເຫລືອລ້າຈາກລັດຖະບານຫວຽດນາມ ໃນມູນຄ່າເກືອບ 75 ຕື້ດົງ ສະກຸນເງິນຫວຽດນາມ ໂດຍມອບໃຫ້ແຂວງວິງຟຸກ ແລະ ຫລວງນ້ຳທາຮ່ວມກັນຈັດຕັ້ງປະຕິບັດ.
ໂຮງຮຽນດັ່ງກ່າວປະກອບດ້ວຍອາຄານຮຽນສູງ 3 ຊັ້ນ, ມີ 40 ຫ້ອງຮຽນ ແລະ ຫ້ອງການຄູ
2 ຫ້ອງ, ອາ ຄານສຳລັບອຳນວຍການ ແລະ ຄູອາຈານສູງສອງຊັ້ນ ມີເນື້ອທີ່ນຳໃຊ້ຫລາຍກວ່າ 530 ຕາແມັດ, ອາຄານຫ້ອງສະໝຸດ ປະກອບດ້ວຍອຸປະກອນນຳໃຊ້ຄົບຊຸດໃນເນື້ອທີ່ນຳໃຊ້ 194 ຕາແມັດ ແລະ ສະໂມສອນໃຫຍ່ ມີເນື້ອທີ່ນຳໃຊ້ 585 ຕາແມັດ. ພ້ອມນັ້ນ ຍັງມີເຂດຫ້ອງນ້ຳລວມຂອງນັກຮຽນ,
ເຮືອນສຳລັບຜູ້ປ້ອງກັນເວນຍາມ ແລະ ອຸປະກອນການສຶກສາຮ່ຳຮຽນຕ່າງໆຢ່າງຄົບຊຸດ.
ສ່ວນເບື້ອງທຶນປະກອບສ່ວນຂອງລັດຖະບານລາວປະມານ 9 ຕື້ກວ່າດົງ ໄດ້ນຳໃຊ້ເຂົ້າໃນການຕິດຕັ້ງລະບົບໄຟຟ້າ, ນ້ຳປະປາ, ສ້າງກຳແພງ, ເດີ່ນບານ ແລະ ການປັບໜ້າດິນອື່ນໆອີກ.
ໃນພິທີ, ທ່ານ ຫງວຽນຈີຢຸງ ກຳມະການສູນກາງພັກ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນຫວຽດນາມ, ຮອງປະທານຄະນະກຳມະການຮ່ວມມື ຫວຽດນາມ-ລາວ ແລະ ທ່ານ
ຄຳເຜີຍ ແກ້ວກິນມະນີ ຮອງປະທານຄະນະກຳມະການຮ່ວມມື ລາວ-ຫວຽດນາມ ຕ່າງກໍໄດ້ມີຄຳເຫັນສະແດງຄວາມຍ້ອງຍໍຊົມເຊີຍຕໍ່ໝາກຜົນການພົວພັນ, ຮ່ວມມືຊ່ວຍເຫລືອເຊິ່ງກັນ ແລະ ກັນລະຫວ່າງສອງປະເທດນັບມື້ໄດ້ຮັບການປັບປຸງກ້າວເຂົ້າສູ່ລວງເລິກ ແລະ ເສີມຂະຫຍາຍໄປສູ່ທົ່ວຂົງເຂດວຽກງານຢ່າງມີປະສິດທິຜົນ, ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ.
ໃນໂອກາດດຽວກັນ, ທ່ານ ເພັດຖາວອນ ພິລາວັນ ເລຂາພັກແຂວງ, ເຈົ້າແຂວງຫລວງນ້ຳທາ ໄດ້ກ່າວສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ພັກ-ລັດຖະບານ ແລະ ປະຊາຊົນຫວຽດນາມເວົ້າລວມ, ເວົ້າສະເພາະກໍແມ່ນແຂວງວິງຟຸກ, ເຖິງວ່າສະພາບເສດຖະກິດມີຄວາມຫຍຸ້ງຍາກ ແຕ່ກໍໄດ້ພະຍາຍາມຊ່ວຍເຫລືອລາວ ບົນຈິດໃຈເຂົ້າເມັດຫັກ ຜັກເສັ້ນໜຶ່ງ ກໍບິແບ່ງກັນກິນ ແລະ ຕໍ່ການຊ່ວຍເຫລືອອັນລ້ຳຄ່ານີ້, ແຂວງຫລວງນ້ຳທາຈະເຮັດສຸດຄວາມສາມາດ ເພື່ອນຳໃຊ້ໃຫ້ມີຜົນ ແລະ ໝັ້ນຄົງຍາວນານ.
No comments:
Post a Comment