ຍທຂ ມີແຜນແກ້ໄຂສະພາບການສັນຈອນແອອັດໃນຕົວເມືອງຢ່າງເປັນລະບົບ

ຄືດັ່ງພວກເຮົາຮູ້ນຳກັນແລ້ວວ່າ: ປັດຈຸບັນ, ສະພາບການສັນຈອນແອອັດຕິດຂັດໃນ ຕົວເມືອງ, ພວມກາຍ ເປັນບັນຫາຫຍຸ້ງຍາກສັບສົນທີ່ສົ່ງຜົນກະທົບໂດຍກົງ ຕໍ່ການດຳລົງຊີວິດຂອງຄົນ ໃນສັງຄົມເພີ່ມຂຶ້ນນັບມື້, ເຖິງວ່າ ໃນໄລຍະຜ່ານມາ, ພາກສ່ວນກ່ຽວຂ້ອງໄດ້ມີຄວາມພະຍາຍາມຄົ້ນຄວ້າຊອກຫາຫລາຍວິທີແກ້ໄຂ, ແຕ່ປາກົດວ່າເປັນ ການແກ້ໄຂໄດ້ພຽງປາຍເຫດຂອງບັນຫາເທົ່ານັ້ນ.

    ຕໍ່ບັນຫາດັ່ງກ່າວ, ທ່ານລັດຖະມົນຕີວ່າການກະຊວງກະຊວງໂຍທາທິການ ແລະ ຂົນສົ່ງ ດຣ ບຸນຈັນ ສີນທະວົງ ໄດ້ໃຫ້ສຳພາດຕໍ່ນັກຂ່າວເມື່ອບໍ່ດົນນີ້ວ່າ: ສະພາບການສັນຈອນແອອັດໃນປັດຈຸບັນແມ່ນເກີດຈາກຈຳນວນພາຫະນະ ເພີ່ມຂຶ້ນສະເລ່ຍ 15% ຕໍ່ປີ, ມີການຈອດ ລົດແບບຊະຊາຍຫລາຍຕາມແຄມທາງ, ລະບົບການຂົນສົ່ງສາທາລະນະ ຍັງບໍ່ດີ, ການຄຸ້ມຄອງຈະລາຈອນບໍ່ເປັນລະ ບົບຄົບຊຸດ ແລະ ສະຕິເຄົາລົບລະບຽບກົດໝາຍຂອງຜູ້ຂັບຂີ່ຈຳນວນ

ໜຶ່ງຍັງບໍ່ທັນສູງ, ແນວໃດກໍຕາມສຳລັບມາດຕະການແກ້ໄຂສະເພາະໜ້າຍັງແມ່ນສືບຕໍ່ຈັດສັນເສັ້ນທາງ ເພື່ອກຳນົດ ທາງຂຶ້ນ-ທາງລອງ-ທາງລ້ຽວຄືນໃໝ່, ປັບປຸງປ້າຍຫ້າມຄືນໃໝ່,ຕິດຕັ້ງລະບົບໄຟອຳນາດໃຫ້ແທດເໝາະກັບການສັນ ຈອນຕົວຈິງ, ຈັດສັນເວລາເຂົ້າໂຮງຮຽນກ່ອນໂມງເຂົ້າວຽກ-ເລິກວຽກ, ເພີ່ມກຳລັງເຈົ້າໜ້າທີ່ເຂົ້າຊ່ວຍລະບາຍລົດ ໃນຊົ່ງໂມງເລັ່ງດ່ວນ, ຊຸກຍູ້ໃຫ້ນັກຮຽນ-ນັກສຶກສາຂີ່ລົດເມສາທາລະນະເພື່ອຫລຸດຜ່ອນການນຳໃຊ້ລົດຈັກລົດ

ໃຫຍ່ໄປໂຮງຮຽນ. ສ່ວນມາດຕະການແກ້ໄຂໄລຍະຍາວກໍແມ່ນການສຸມທຶນຮອນເຂົ້າໃສ່ການກໍ່ສ້າງລະບົບຂົນສົ່ງ, ໂດຍສະເພາະກໍ່ສ້າງເສັ້ນທາງຕ່າງລະດັບໃນຈຸດທີ່ມີການສັນຈອນແອອັດ, ສ້າງສະຖານທີ່ຈອດລົດໃນຕົວເມືອງ ໃຫ້ພຽງພໍ, ຄຸ້ມຄອງການປົກສ້າງໃຫ້ໄປຕາມລະບຽບກົດໝາຍຜັງເມືອງ, ສ້າງສູນຄວບຄຸມການສັນຈອນໃຫ້ມີມາດ ຕະຖານດີ.

    ລັດຖະມົນຕີວ່າການກະຊວງໂຍທາ ກ່າວວ່າ: ເພື່ອຮອງຮັບສະພາບການສັນຈອນທີ່ເພີ່ມຂຶ້ນໃນຕົວເມືອງນີ້, ນັບແຕ່ປີ 2005 ເປັນຕົ້ນມາ, ກະຊວງໂຍທາທິການ ແລະ ຂົນສົ່ງ, ໄດ້ມີຄວາມພະຍາມຍາມໃນການຄົ້ນຄວ້າບັນດານິຕິ ກຳ, ມາດຕະການ ແລະ ແຜນດຳເນີນງານຫລາຍໂຄງການເປັນຕົ້ນແມ່ນສ້າງແຜນຍຸດທະສາດການຂົນສົ່ງແບບ ຍືນ ຍົງຕໍ່ສິ່ງແວດລ້ອມ, ໂດຍໄດ້ຮັບການຊ່ວຍເຫລືອຈາກອົງການສະຫະປະຊາຊາດ, ໃນປີ 2008 ອົງການໄຈກາປະ

ເທດຍີປຸ່ນໄດ້ໃຫ້ການຊ່ວຍເຫລືອສ້າງແຜນແມ່ບົດການຂົນສົ່ງສາທາລະນະໃນຕົວເມືອງວຽງຈັນ, ໂດຍໄດ້ຊ່ວຍ ເຫລືອລົດເມຂະໜາດ 45 ບ່ອນນັ່ງຈຳນວນ 42 ຄັນໃຫ້ນະຄອນຫລວງວຽງຈັນໃນປີ 2012.

ນອກຈາກນີ້ລັດຖະບານຍັງໄດ້ຮັບຮອງເອົາໂຄງການແກ້ໄຂການສັນຈອນແອອັດແບບຍືນຍົງຢູ່ນະຄອນຫລວງວຽງຈັນດ້ວຍເງິນກູ້ຈາກທະນາຄານພັດທະນາອາຊີ (ADB) ແລະ ອົງການສາກົນຈຳນວນໜຶ່ງລວມມູນຄ່າ 98 ລ້ານໂດລາສະຫະລັດ, ເຊິ່ງປະກອບມີ: ການຈັດຊື້ລົດເມຄວາມໄວສູງ (BRT) ຈຳນວນ 92 ຄັນ, ກໍ່ສ້າງສະຖານີ ຈອດສອງແຫ່ງໃນຕົວເມືອງ, ປັປປຸງບ່ອນຈອດລົດ, ທາງຍ່າງໃນຕົວເມືອງໃຫ້ຮັບປະກັນຄວາມປອດໄພ, ປັບປຸງລະ

ບົບຄຸ້ມຄອງການຈໍລະຈອນ, ເຊິ່ງຄາດວ່າໂຄງການດັ່ງກ່າວຈະໄດ້ເລີ່ມຈັດຕັ້ງປະຕິບັດໃນປີ 2017 ແລະ ຈະສຳເລັດ ໃນທ້າຍປີ 2018 ເຊິ່ງຈະສາມາດແກ້ໄຂສະພາບການສັນຈອນແອອັດໃນຕົວເມືອງໄດ້ໂດຍພື້ນຖານ ຈາກການສ້າງລະ ບົບຂົນສົ່ງສາທາລະນະທີ່ມີຄວາມສະດວກແທນການນຳໃຊ້ພາຫະນະສ່ວນຕົວເທື່ອລະກ້າວ, ທັງຈະມີບ່ອນຈອດລົດ, ລະບົບທາງຍ່າງທີ່ສະດວກປອດໄພ ແລະ ການປັບປຸງທັດສະນີຍະພາບໃນຕົວເມືອງທີ່ຂຽວສົດງົດງາມນຳດ້ວຍ.