ທ່ານ ດຣ ບຸນຫລາຍ ພົມມະສັກ ຫົວໜ້າກົມຄວບຄຸມພະຍາດຕິດຕໍ່ກະຊວງສາລະນະສຸກ ໄດ້ໃຫ້ສຳພາດຕໍ່ສື່ມວນຊົນໃນວັນທີ 30 ກໍລະກົດນີ້ວ່າ: ພະຍາດທີ່ມັກເກີດຫລາຍໃນລະດູຝົນແມ່ນພະຍາດໄຂ້ເລືອດອອກ, ສະນັ້ນ ທຸກພາກສ່ວນຕ້ອງພ້ອມກັນເຝົ້າລະວັງບໍ່ໃຫ້ພະຍາດດັ່ງກ່າວມີການແຜ່ລະບາດ, ໂດຍໃຫ້ປະຕິບັດຕາມຫລັກການ 5 ປ ຢ່າງເຂັ້ມງວດຄື ປິດພາຊະນະທຸກຊະນິດທີ່ບັນຈຸນ້ຳ, ປ່ອຍນ້ຳຂັງອອກຈາກພາຊະນະ, ຢາງຕີນລົດ, ກະໂປະ, ກະປ໋ອງ ແລະ
ປ່ອຍປາຫາງນົກຍຸງໃນອ່າງ ຫລື
ພາຊະນະທີ່ບໍ່ສາມາດປ່ຽນຖ່າຍນ້ຳໄດ້, ປ່ຽນຖ່າຍນ້ຳເປັນປະຈຳ, ປັບປຸງສະພາບແວດລ້ອມອ້ອມເຮືອນບ້ານບໍ່ໃຫ້ຮົກເຮື້ອ ແລະ ປະຕິບັດໃຫ້ເປັນປະຈຳຈຶ່ງຈະສາມາດກຳຈັດການແຜ່ລະບາດຂອງພະຍາດໄຂ້ຍຸງລາຍໄດ້.
ຫົວໜ້າກົມຄວບຄຸມພະຍາດຕິດຕໍ່ ກ່າວວ່າ: ປັດຈຸບັນ, ຢູ່ປະເທດເຮົາພົບກໍລະນີຜູ້ເປັນພະຍາດໄຂ້ເລືອດອອກແລ້ວ 688 ກໍລະນີ, ແຕ່ຍັງບໍ່ມີຜູ້ເສຍຊີວິດ, ໃນນັ້ນແຂວງທີ່ມີຄົນເຈັບເປັນໄຂ້ເລືອດອອກຫລາຍກວ່າໝູ່ແມ່ນແຂວງອັດຕະປືມີ 339
ກໍລະນີ, ນອກຈາກນີ້, ກະຊວງສາທາລະນະສຸກ ແລະ ບັນດາແຂວງໆຕ່າງໆທີ່ມີກໍລະນີຜູ້ເປັນພະຍາດດັ່ງກ່າວກໍໄດ້ມີການເຝົ້າລະວັງພະຍາດດັ່ງກ່າວຢ່າງໃກ້ຊິດ, ໂດຍສົ່ງພະນັກງານສາທາລະສຸກໄປຈຳຢູ່ບ້ານ, ສຸກສາລາ ແລະ
ໂຮງໝໍແຫ່ງຕ່າງໆ, ເພື່ອໂຄສະນາສຸຂະສຶກສາແກ່ປະຊາຊົນໃຫ້ເອົາໃຈໃສ່ປະຕິບັດຕາມຫລັກສຸຂະນາໄມເພື່ອເຮັດໃຫ້ຮ່າງກາຍແຂງແຮງ ແລະ
ຫລີກເວັ້ນພະຍາດມາບຽດບຽນ.
No comments:
Post a Comment