ເກີດເຫດໄຟ​ໄໝ້ເຮືອນ 3 ຫລັງ ຢູ່ບ້ານໂພໄຊ ຍ້ອນໄຟຟ້າລັດວົງຈອນ

ຫົວໜ້າພະແນກມອດໄຟ ນະຄອນຫລວງວຽງຈັນ ໃຫ້ຮູ້ວ່າ: ໃນເວລາ 20:30 ໂມງຂອງວັນທີ 19 ສິງຫານີ້, ໄດ້ເກີດເຫດໄຟ​ໄໝ້ເຮືອນປະຊາຊົນ 3 ຫລັງຢູ່ບ້ານໂພໄຊ ເມືອງສີສັດຕະນາກ ນະຄອນຫລວງວຽງຈັນ ຍ້ອນໄຟຟ້າລັດວົງຈອນ, ເຊິ່ງເຮືອນຕົ້ນໄຟເປັນເຮືອນຫ້ອງແຖວໄດ້ລຸກລາມຢ່າງໄວວາໄປຍັງເຮືອນໃກ້ຄຽງອີກ 2 ຫລັງ, ເປັນເຮືອນ 2 ຊັ້ນ, ເທິງໄມ້ລຸ່ມກໍ່ ແລະ ອີກຫລັງໜຶ່ງເປັນເຮືອນກໍ່ຊັ້ນດຽວ. ຊຶ່ງພາຍຫລັງໄດ້ຮັບແຈ້ງເຈົ້າໜ້າທີ່ມອດໄຟກໍໄດ້ນຳເອົາລົດນ້ຳ ຈຳນວນ 8 ຄັນ ພ້ອມກຳລັງອອກໄປໃຫ້ການຊ່ວຍເຫລືອເພື່ອບໍ່ໃຫ້ໄຟລຸກລາມໄປສູ່ວົງກວ້າງ ແລະ ໂຊກດີບໍ່ມີຜູ້ໄດ້ຮັບບາດເຈັບ ແລະ ເສຍຊີວິດຈາກເຫດການດັ່ງກ່າວ.