ທ່ານຫົວໜ້າກົມມັດທະຍົມສຶກສາ, ກະຊວງສຶກສາທິການ ແລະ ກິລາ ໄດ້ໃຫ້ສຳພາດຕໍ່ນັກຂ່າວໜັງສືພິມພວກເຮົາໃນວັນທີ 27 ສິງຫານີ້ວ່າ: ເພື່ອກະກຽມສົກຮຽນໃໝ່ນີ້ ກົມມັດທະຍົມສຶກສາ ກໍໄດ້ມີແຈ້ງການໃຫ້ພະແນກສຶກສາທິການ ແລະ ກິລານະຄອນຫລວງວຽງຈັນ ແລະ ບັນດາແຂວງຕ່າງໆໃນທົ່ວປະເທດ ກ່ຽວກັບການຈັດຕັ້ງປະຕິບັດການຮຽນ-ການສອນ ຕາມປະຕິທິນການສຶກສາທີ່ໄດ້ກຳນົດ, ໂດຍເນັ້ນໃຫ້ແຕ່ລະໂຮງຮຽນກະກຽມໄຂສົກຮຽນໃໝ່ຢ່າງເປັນຂະບວນຟົດຟື້ນ ພ້ອມທັງແນະນຳໃຫ້ມີການກະກຽມອາຄານສະຖານທີ່ຮຽນ, ຫ້ອງຮຽນ, ໂຕະຕັ່ງ ແລະ ອຸປະກອນການຮຽນ-ການສອນໃຫ້ພຽງພໍ. ນອກຈາກນີ້ ຍັງໄດ້ຊັບຊ້ອນຄູສອນ ໃຫ້ເໝາະສົມກັບແຕ່ລະວິຊາທີ່ສອນ ເພື່ອໃຫ້ການສິດສອນມີປະສິດທິພາບສູງ ແລະ ຄົບຖ້ວນທຸກວິຊາຕາມຫລັກສູດທີ່ກຳນົດໄວ້. ພ້ອມທັງແນະນຳໃຫ້ແຕ່ລະໂຮງຮຽນເຜີຍແຜ່ກົດລະບຽບຂອງໂຮງຮຽນ ໃຫ້ນັກຮຽນເຂົ້າໃຈເລິກເຊິ່ງ ເພື່ອສ້າງຂະບວນການສອນດີ-ຮຽນເກັ່ງໃຫ້ຟົດຟື້ນ. ພ້ອມດຽວກັນນີ້, ທາງສະຖາບັນຄົ້ນຄ້ວາວິທະຍາສາດການສຶກສາ ໄດ້ສຳເລັດການພັດທະນາຫລັກສູດຊັ້ນມັດທະຍົມສຶກສາສະບັບປະຕິຮູບ ຊັ້ນ
ມ.6,
ດັ່ງນັ້ນ ເພື່ອໃຫ້ຄູສອນໃນຊັ້ນດັ່ງກ່າວມີຄວາມເຂົ້າໃຈຕໍ່ຫລັກສູດໃໝ່ນີ້ ຢ່າງເລິກເຊິ່ງ ແລະ ມີຄວາມເປັນເອກກະພາບໃນການຈັດຕັ້ງ
ປະຕິບັດ, ສ່ວນທາງກົມມັດທະຍົມສຶກສາ ກໍໄດ້ສົມທົບກັບກົມສ້າງຄູ ແລະ ສະຖາບັນຄົ້ນຄ້ວາວິທະຍາສາດການສຶກສາ ຈັດຕັ້ງຝຶກອົບຮົມ ກ່ຽວກັບການນຳໃຊ້ຫລັກສູດ, ປຶ້ມແບບຮຽນ ແລະ ຄູ່ມືຄູ ຊັ້ນ
ມ.6
ໃໝ່ດັ່ງກ່າວ, ພ້ອມທັງແນະນຳວິທີສິດສອນແບບໃໝ່ໃຫ້ແກ່ຄູເຝິກຂັ້ນແຂວງ ສຳເລັດເປັນທີ່ຮຽບຮ້ອຍແລ້ວ ແລະ ປັດ ຈຸບັນຄູເຝິກແຕ່ລະແຂວງກໍາລັງຈັດຕັ້ງການເຝິກອົບຮົມຕໍ່ໃຫ້ຄູສອນ ຊັ້ນ
ມ.6
ທຸກຄົນໃນແຂວງຂອງຕົນໃຫ້ສຳເລັດກ່ອນເປີດສົກຮຽນໃໝ່ນີ້.
ຕໍ່ບັນຫາການເສຍຄ່າລົງທະບຽນນັກຮຽນນັ້ນ ທ່ານຫົວໜ້າກົມມັດທະຍົມສຶກສາ ໄດ້ຊີ້ແຈງວ່າ: ການເກັບຄ່າທຳນຽມດັ່ງກ່າວ ທາງກະຊວງສຶກສາ ແລະ ກິລາ ແມ່ນບໍ່ເຄີຍກຳນົດ ແລະ ບໍ່ມີລະບຽບການໃດໆ, ແຕ່ກົງກັນຂ້າມ ກະຊວງສຶກສາ ໄດ້ມີນະໂຍບາຍໃຫ້ເງິນບໍລິຫານໂຮງຮຽນໃນແຕ່ລະປີ ເພື່ອຮັບໃຊ້ການບໍລິຫານໂຮງຮຽນ, ສ່ວນວ່າມີບາງໂຮງຮຽນໄດ້ເກັບຄ່າລົງທະບຽນຂອງນັກຮຽນນັ້ນ ອາດມີຄວາມຈຳເປັນຂອງໂຮງຮຽນດັ່ງກ່າວ, ເຊິ່ງໂຮງຮຽນຈະເປັນຜູ້ກຳນົດເອງ, ໂດຍສົມທົບກັບອຳນາດການປົກຄອງທ້ອງຖິ່ນ ໃນການເກັບຄ່າທຳນຽມຂອງນັກຮຽນ.
ນອກຈາກນີ້ ໂຮງຮຽນເອກກະຊົນບາງແຫ່ງ ໄດ້ໃຫ້ນັກຮຽນຊື້ເຄື່ອງແບບນັກຮຽນ ອາດເປັນເພາະວ່າໂຮງ ຮຽນດັ່ງກ່າວໄດ້ກຳນົດຊຸດເຄື່ອງແບບເປັນເອກກະລັກສະເພາະຂອງຕົນ, ຈຶ່ງເຮັດໃຫ້ນັກຮຽນທຸກຄົນຕ້ອງໄດ້ນຸ່ງຖືເປັນເອກະພາບຕາມແບບທີ່ໂຮງຮຽນກຳນົດ, ເຊິ່ງຊຸດເຄື່ອງແບບດັ່ງກ່າວອາດຈະບໍ່ມີຂາຍຢູ່ບ່ອນອື່ນ ຈຶ່ງຈຳເປັນຕ້ອງໄດ້ຊື້ກັບໂຮງຮຽນ ແລະ ສຳລັບໂຮງຮຽນຂອງລັດແມ່ນມີກຳນົດເຄື່ອງແບບນັກຮຽນເອກກະພາບກັນທົ່ວປະເທດ ດັ່ງທີ່ລະບຸໄວ້ຢູ່ໃນຫລັກການຄຸ້ມຄອງໂຮງຮຽນມັດທະຍົມສຶກສາ ແລະ ນັກຮຽນສາມາດຊື້ເຄື່ອງແບບ ແລະ ປຶ້ມແບບຮຽນ ໄດ້ຕາມຫ້າງຮ້ານຕ່າງໆໃນຂອບເຂດທົ່ວປະເທດ.
No comments:
Post a Comment