ລາວ-ແຟັງລັງຈັດສຳມະນາບັນຫາການຄຸ້ມຄອງຊັບພະຍາກອນທຳມະຊາດ

ສປປ ລາວ ແລະ ສະຖານທູດແຟັງລັງ ປະຈຳລາວໄດ້ຮ່ວມກັນຈັດສຳມະນາໃນຫົວຂໍ້ບັນຫາການຄຸ້ມຄອງຊັບພະຍາກອນທຳມະຊາດຂຶ້ນໃນວັນທີ 22 ກັນຍານີ້ທີ່ສູນຮ່ວມມື ແລະ ການເຝິກອົບຮົມຫລັກ 5 ນະຄອນຫລວງວຽງຈັນໂດຍມີທ່ານ ຢົງ ຈັນທະລັງສີ ຫົວໜ້າສະຖາບັນການຕ່າງປະເທດກະຊວງການຕ່າງປະເທດແຫ່ງ ສປປ ລາວ, ທ່ານນາງ ຄິສຕີ ເວສຟາເລັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງປະເທດແຟັງລັງປະຈຳ ສປປ ລາວ, ມີບັນດາຫົວໜ້າກົມ, ຮອງກົມ ແລະ ພະນັກງານວິຊາການພ້ອມນັກສຶກສາຈາກມະຫາວິທະຍາໄລແຫ່ງຊາດຈຳນວນໜຶ່ງເຂັ້າຮ່ວມ.

ທ່ານ ຢົງ ຈັນທະລັງສີ ກ່າວວ່າ: ການຈັດຕັ້ງສຳມະນາດັ່ງກ່າວຈະເປັນໂອກາດອັນດີໃຫ້ຜູ້ເຂົ້າຮ່ວມໄດ້ແລກ ປ່ຽນບົດຮຽນກ່ຽວກັບການຮ່ວມມືທາງດ້ານການຄຸ້ມຄອງຊັບພະຍາກອນທຳມະຊາດໃນດ້ານຕ່າງໆລະຫວ່າງລາວ-ແຟັງລັງເຊັ່ນ: ການຮ່ວມມືດ້ານການຄຸ້ມຄອງສິ່ງແວດລ້ອມທຳມະຊາດ, ການຮ່ວມມືໃນຂະແໜງການພະລັງງານທົດແທນແລະ ບັນຫາອື່ນໆ.

ທ່ານ ຢົງ ຈັນທະລັງສີ ໃຫ້ຮູ້ຕື່ມວ່າ: ສປປ ລາວ-ແຟັງລັງ ໄດ້ສ້າງຕັ້ງສາຍພົວພັນການທູດນຳກັນມາແຕ່ປີ 1975 ແລະເຫັນວ່າການພົວພັນຮ່ວມມືລະຫວ່າງສອງປະເທດໄດ້ມີການພັດທະນາ ແລະ ຂະຫຍາຍໂຕຂຶ້ນເລື້ອຍໆ, ລັດຖະບານລາວໄດ້ຮັບການຊ່ວຍເຫລືອຈາກລັດຖະບານແຟັງລັງມີເຖິງ 50 ລ້ານເອີໂຣ ເຂົ້າໃນການພັດທະນາໂຄງການຕ່າງໆເຊັ່ນ: ໂຄງການເກັບກູ້ລະເບີດບໍ່ທັນແຕກ, ໂຄງການພັດທະນາສິ່ງແວດລ້ອມແບບຍືນຍົງ ແລະ ໂຄງການອື່ນໆອີກຈຳນວນໜຶ່ງ.