laophatthananewspaper: ລາວ-ຫວຽດນາມ ຮັດແໜ້ນການພົວພັນຮ່ວມມືສອງຝ່າຍ

ໃນວັນທີ 14 ກັນຍາ 2015 ນີ້ ທີ່ຫ້ອງວ່າການລັດຖະບານ, ທ່ານ ທອງສິງ ທໍາມະວົງ ນາຍົກລັດ ຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ຫງວຽນ ເຕິນ ຢຸງ ນາຍົກລັດຖະມົນຕີ ສສ ຫວຽດນາມ ພ້ອມຄະນະ ເຊິ່ງສອງຝ່າຍໄດ້ທົບທວນຄືນການຮ່ວມມືໃນໄລຍະຜ່ານມາ; ພ້ອມທັງໄດ້ເປັນເອກະພາບກັນ ແລະ ຕີລາຄາສູງມູນເຊື້ອແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນໄລຍະຜ່ານມາ. ສອງຝ່າຍເປັນເອກະພາບນຳກັນວ່າ ເຖິງວ່າສະພາບການພາກພື້ນ ແລະ ສາກົນຈະຜັນແປຢ່າງສັບສົນ ແຕ່ສາຍພົວພັນພິເສດ ລະຫວ່າງ ລາວ-ຫວຽດນາມ ໄດ້ສືບຕໍ່ຮັບການເພີ່ມພູນຄູນສ້າງ ແລະ ຂະຫຍາຍຕົວຢ່າງຕໍ່ເນື່ອງ, ເຊິ່ງໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຫວຽດນາມ.

ນາຍົກລັດຖະມົນຕີ ທອງສິງ ທຳມະວົງ ໄດ້ຕີລາຄາສູງບັນດານັກທຸລະກິດລົງທຶນຫວຽດນາມ ທີ່ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງລາວ, ອັນເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບແບບພິເສດ ລາວ-ຫວຽດນາມ, ພ້ອມທັງສະແດງຄວາມຂອບໃຈ ສະຫາຍ ຫວຽດນາມ ທີ່ໄດ້ໃຫ້ການຊ່ວຍເຫລືອຢ່າງມີປະສິດທິຜົນ ແລະ ທັນການ ແກ່ ສປປ ລາວ ຕະຫລອດມາ.

ສອງຝ່າຍເຫັນດີເປັນເອກະພາບກັນ ຈະສືບຕໍ່ຮ່ວມມືກັນຢ່າງໃກ້ຊິດ ເພື່ອຊີ້ນຳຊຸກຍູ້ບັນດານັກລົງທຶນຫວຽດນາມ ທີ່ມາລົງທຶນຢູ່ລາວ ໃຫ້ເພີ່ມຄວາມເອົາໃຈໃສ່ເຖິງປະສິດທິພາບການລົງທຶນ ແລະ ຮ່ວມກັນແກ້ໄຂບັນຫາບົ່ມ ຊ້ອນຕ່າງໆ ທີ່ເກີດຂຶ້ນເພື່ອເຮັດແນວໃດໃຫ້ການລົງທຶນຂອງຫວຽດນາມຢູ່ລາວ ນຳເອົາຜົນປະໂຫຍດມາສູ່ປະຊາຊົນສອງຊາດຢ່າງແທ້ຈິງ. ນອກຈາກນັ້ນ, ຜູ້ນຳທັງສອງຍັງໄດ້ເຫັນດີເຫັນພ້ອມນຳກັນຈະສືບຕໍ່ຊີ້ນຳຂະແໜງການຕ່າງໆຂອງສອງປະເທດໃຫ້ເອົາໃຈໃສ່ຍົກສູງປະສິດທິຜົນຂອງການຮ່ວມມື ທັງນີ້ກໍເພື່ອເຮັດໃຫ້ສາຍພົວພັນມິດຕະພາບຖານອ້າຍນ້ອງ, ຄວາມສາມັກຄີພິເສດ ແລະ ການຮ່ວມມືຮອບດ້ານທີ່ສອງພັກ, ສອງລັດຖະບານ ແລະ ປະຊາຊົນສອງຊາດ ໃຫ້ຄວາມສໍຳຄັນນັ້ນ, ນັບມື້ນັບແຕກດອກອອກຜົນ ແລະ ຈະເລີນງອກງາມຂຶ້ນໄປເລື້ອຍໆ. ຫລັງຈາກສຳເລັດການ ພົບປະສອງຝ່າຍ ນາຍົກລັດຖະມົນຕີທັງສອງໄດ້ເຂົ້າຮ່ວມເປັນສັກຂີພິຍານໃນພິທີລົງນາມບົດບັນທຶກຊ່ວຍຈຳລະຫວ່າງ ລັດຖະບານ ລາວ-ສສ ຫວຽດນາມ ກ່ຽວກັບຍຸດທະສາດການຮ່ວມມືໃນຂົງເຂດຄົມມະນາຄົມ-ຂົນສົ່ງໄລຍະ 2016-2025 ແລະ ວິໄສທັດ ຮອດປີ 2030 ໂດຍການຮ່ວມລົງນາມ ລະຫວ່າງ ທ່ານ ດຣ. ບຸນຈັນ ສິນທະວົງ ລັດຖະມົນ ຕີວ່າການກະຊວງໂຍທາທິການ ແລະ ຂົນສົ່ງ ສປປ ລາວ ແລະ ທ່ານ ດິງ ລາ ທັງ ລັດຖະມົນຕີກະຊວງໂຍທາທິ ການ ແລະ ຂົນສົ່ງ ສສ ຫວຽດນາມ.