ລາວພິຈາລະນາຮັບຮອງເອົາໂຄງຮ່າງຜົນສຳຫຼວດການໃຊ້ຄວາມຮຸນແຮງຕໍ່ເດັກ

ກອງເລຂາຄະນະກຳມາທິການເພື່ອແມ່ ແລະ ເດັກແຫ່ງຊາດ ໄດ້ຈັດກອງປະຊຸມພິຈາລະນາຮັບຮອງເອົາໂຄງຮ່າງຜົນສຳຫຼວດການໃຊ້ຄວາມຮຸນແຮງຕໍ່ເດັກໃນ ສປປ ລາວ ຂຶ້ນໃນວັນທີ 23 ກັນຍານີ້ ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມຂອງຜູ້ຮັກສາການຫົວໜ້າກອງເລຂາ ຄມດຊ ແລະ   ຫົວໜ້າກົມສະຖິຕິສັງຄົມ, ສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ  ໂດຍມີວິຊາການ ຈາກກະຊວງທີ່ກ່ຽວຂ້ອງເຂົ້າຮ່ວມ.

 ກອງປະຊຸມໄດ້ປຶກສາຫາລື, ພິຈາລະນາຮັບຮອງເອົາໂຄງຮ່າງຜົນສຳຫຼວດການໃນຄວາມຮຸນແຮງຕໍ່ເດັກໃນ ສປປ ລາວ ປີ 2014. ແລະ ສະເໜີບົດປະກອບຄຳເຫັນຂອງກະຊວງແຮງງານ ແລະ ສະຫວັດການສັງຄົມ ແລະ ສູນກາງສະຫະພັນແມ່ຍິງລາວ ທຽບໃສ່ໂຄງຮ່າງຜົນການສຳຫຼວດການໃຊ້ຄວາມຮຸນແຮງຕໍ່ເດັກໃນ ສປປ ລາວ ປີ 2014 ສະບັບທຳອິດ.

            ຈາກນັ້ນ ຜູ້ເຂົ້າຮ່ວມກອງປະຊຸມໄດ້ສົນທະນາ, ຄົ້ນຄວ້າ, ແລກປ່ຽນຄຳຄິດເຫັນໃສ່ໂຄງຮ່າງຜົນສຳຫຼວດການໃຊ້ຄວາມຮຸນແຮງຕໍ່ເດັກ ໃນ ສປປ ລາວ ຢ່າງກົງໄປກົງມາ ດ້ວຍຄວາມຮັບຜິດຊອບສູງ. ກອງປະຊຸມໄດ້ຕົກລົງ ແລະ ເຫັນດີເປັນເອກະພາບຮັບຮອງເອົາໂຄງຮ່າງຜົນສຳຫຼວດການໃຊ້ຄວາມຮຸນແຮງຕໍ່ເດັກໃນ ສປປ ລາວປີ 2014 ແລະ ມອບຄວາມຮັບຜິດຊອບໃນການຂຽນບົດລາຍງານຜົນການສຳຫລວດພາກທີ 1-3 ໃຫ້ສູນສະຖິຕິແຫ່ງຊາດ, ພາກທີ 4-7 ແລະ ທີ 11ແມ່ນສູນກາງສະຫະພັນແມ່ຍິງລາວ ພາກທີ 8-10 ແມ່ນກະຊວງແຮງງານ ແລະ ສະຫວັດດີການສັງຄົມ ພາກທີ 12 ແລະ ການສັງລວມຂໍ້ມູນທັງໝົດ ແມ່ນກອງເລຂາ ຄມດຊ .