ລະນຶກວັນສ້າງຕັ້ງ ທຫລ ຄົບຮອບ 47 ປີ

       

ທະນາຄານແຫ່ງ ສປປ ລາວ ( ທຫລ ) ໄດ້ຈັດຕັ້ງການຫວນຄືນມູນເຊື້ອແຫ່ງການກໍາເນີດ ແລະ ເຕີບໃຫຍ່ເຂັ້ມ ແຂງຂອງວຽກງານທະນາຄານບົນຍ່ານທາງ 47 ປີ ( 7 ຕຸລາ 1968 - 7 ຕຸລາ 2015 ) ເຊິ່ງ​ໄດ້ຈັດຂຶ້ນໃນວັນທີ 3 ຕຸລາ ທີ່ນະ ຄອນຫຼວງວຽງຈັນດ້ວຍບັນຍາກາດຟົດ​ຟື້ນ​ພ້ອມກັບຂະບວນການກິລາ ພ້ອມ​ກັບ​ຂະ​ບວນກິລາ​ຕ່າງໆ ໂດຍການ ເຂົ້າຮ່ວມຂອງສະຫາຍ ດຣ ສົມພາວ ໄຟສິດ ເລຂາຄະນະພັກ, ຜູ້ວ່າການ ທຫລ, ພ້ອມຄະນະພັກ, ພະນັກງານ ຈາກທະນາຄານຕ່າງໆ ແລະ ສະຖາບັນການເງິນເຂົ້າຮ່ວມຢ່າງຫຼວງຫຼາຍ.

         ໃນພິທີທີ່ມີຄວາມໝາຍສໍາຄັນດັ່ງກ່າວ ສະຫາຍ ດຣ ສົມພາວ ໄຟສິດ  ຜູ້ວ່າການ ທຫລ ໄດ້ນໍາສະເໜີມູນເຊື້ອອັນດີງາມຂອງວຽກງານທະນາຄານໃນຕະ ຫຼອດ 47 ປີຜ່ານມາ ໂດຍໄດ້ຮັບການຊີ້ນໍານໍາພາ, ສຶກສາອົບຮົມຢ່າງໃກ້ຊິດ ແລະ ເປັນປະຈໍາຂອງກົມການເມືອງສູນການພັກ ແລະ ລັດຖະບານໃນແຕ່ລະໄລຍະ ອັນໄດ້ເຮັດໃຫ້ຂະແໜງການທະນາຄານ

ມີການພັດທະນາດ້ວຍບາດກ້າວທີ່ໜັກແໜ້ນສາມາດປະຕິບັດໜ້າທີ່ການເມືອງຂອງຕົນໃນແຕ່ລະໄລຍະ​ໄດ້ເປັນຢ່າງດີ ທັງສາມາດເຊື່ອມໂຍງພາກພື້ນ ແລະ ສາກົນຢ່າງເປັນເຈົ້າການ, ອັນພົ້ນເດັ່ນ​ແມ່ນພາຍຫຼັງມີແນວທາງປ່ຽນແປງໃໝ່ຂອງພັກໃນປີ 1986 ຂະແໜງການທະນາຄານ ກໍໄດ້ມີການປັບຕົວໄປສູ່ກົນໄກເສດຖະກິດຕະຫຼາດທີ່ມີການຄຸ້ມຄອງຂອງລັດໂດຍແຍກລະບົບທະນາຄານຂັ້ນດຽວ ມາເປັນທະນາຄານສອງຂັ້ນຄື: ທະນາຄານແຫ່ງ ສປປ ລາວ ມີພາລະບົດບາດຄຸ້ມຄອງມະຫາພາກດ້ານເງິນຕາ ແລະ ບັນດາທະນາຄານທຸລະກິດ ປະຕິບັດບົດບາດດຳເນີນທຸລະກິດດ້ານເງິນຕາ-ບໍລິການດ້ານທະນາຄານໃຫ້ແກ່ສັງຄົມ, ໃນຊຸມປີມໍ່ໆມານີ້ ສະຖາບັນການເງິນປະເພດຕ່າງໆ, ວຽກງານຄຸ້ມຄອງຫຼັກຊັບ ແລະ ຕະຫຼາດຫຼັກຊັບ ກໍໄດ້ຮັບການສ້າງຕັ້ງຂຶ້ນ ແລະ ມີການຂະຫຍາຍຕົວເປັນກ້າວໆມາ.

              ມາເຖິງປັດຈຸບັນນີ້ຂະແໜງການທະນາຄານ ໄດ້ປະຕິບັດໜ້າທີ່ການເມືອງຂອງຕົນປະກອບສ່ວນໃນການຮັກສາ ສະຖຽນລະພາບເສດຖະກິດມະຫາພາກໄດ້ເປັນຢ່າງດີ ເຊິ່ງໄດ້ສະແດງອອກໃນການປະກອບສ່ວນຢ່າງຕັ້ງໜ້າເຂົ້າໃນການຄວບຄຸມອັດຕາເງິນເຟີ້ໃຫ້ຢູ່ໃນລະດັບຕໍ່າ, ອັດຕາແລກປ່ຽນມີຄວາມສະຫງົບ, ພັດທະນາບັນດາທະນາ ຄານທຸລະກິດ ໃຫ້ເຕີບໃຫຍ່ ແລະ ມີຄວາມໝັ້ນຄົງ, ລະດົມແຫຼ່ງທຶນ ແລະ ສະໜອງທຶນເຂົ້າໃນການພັດທະນາເສດຖະ ກິດ-ສັງຄົມ ແລະ ແກ້ໄຂຄວາມ ທຸກຍາກຂອງປະຊາຊົນໃຫ້ບັນລຸຄາດໝາຍທີ່ພັກ, ລັດຖະບານກຳນົດໄວ້ແຕ່ລະໄລຍະ, ຫັນລະບົບການບໍລິການທະນາຄານໃຫ້ທັນສະໄໝຍິ່ງຂຶ້ນເພື່ອສາມາດເຊື່ອມໂຍງພາກພື້ນ ແລະ ສາກົນ​ເທື່ອ​ລະ​ກ້າວ.

              ສະຫາຍ ເລຂາຄະນະພັກ ທຫລ ໄດ້ເນັ້ນວ່າ: ໃນໄລຍະຜ່ານມາ​ເຖິງ​ວ່າຂະແໜງການທະນາຄານຈະມີຜົນສໍາເລັດໃນຫຼາຍດ້ານ, ແຕ່ກໍຍັງມີສິ່ງທ້າທາຍບໍ່ໜ້ອຍໃນຍຸກໂລກາພິວັດ ຍຸກແຫ່ງການເຊື່ອມໂຍງສາກົນ ຊຶ່ງພວກເຮົາຈະຕ້ອງ​ໄດ້ເອົາໃຈໃສ່ປັບປຸງຕົນເອງຢ່າງຈິງຈັງ ແລະ ດ້ວຍຄວາມເປັນເຈົ້າການ​ເພື່ອສ້າງຂະແໜງການທະນາຄານໃຫ້ເຕີບໃຫຍ່, ເຂັ້ມແຂງ ແລະ ໝັ້ນຄົງ ເພື່ອເຊື່ອມໂຍງກັບທະນາຄານຂອງບັນດາປະເທດອາຊຽນກໍຄືການເຂົ້າຮ່ວມປະຊາຄົມເສດຖະກິດອາຊຽນໃນທ້າຍປີນີ້, ພ້ອມນັ້ນ ກໍຕ້ອງຮັບປະກັນການປະກອບສ່ວນຂອງຂະແໜງການທະນາຄານໃນການຈັດຕັ້ງປະຕິບັດບັນດາຄາດໝາຍສູ້ຊົນທີ່ພັກ ແລະ ລັດຖະບານວາງໄວ້ໃຫ້ປາກົດຜົນເປັນຈິງ.