ໃນຕອນເຊົ້າວັນທີ
30 ຕຸລາແລ້ວນີ້, ຢູ່ສຳນັກງານສະຖານີວິທະຍຸກະຈາຍສຽງ, ທ່ານສຈ. ດຣ. ບໍ່ແສງຄຳວົງດາລາກຳມະການສູນກາງພັກ, ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ໃຫ້ກຽດພົບປະໂອ້ລົມບັນດາຄະນະອຳນວຍການ, ບັນນາທິການຖັນແຖວສື່ມວນຊົນລາວທັງພາກລັດ ແລະ ເອກະຊົນ ເພື່ອແນະນຳໃຫ້ບັນດາສື່ເຫລົ່ານັ້ນເພີ່ມທະວີໂຄສະນາໃຫ້ແກ່ຂະບວນການສ້າງຜົນງານຄຳນັບຮັບຕ້ອນວັນສະຖາ ປະນາ ສປປ ລາວ
ຄົບຮອບ
40 ປີ
ໃຫ້ມີບັນຍາກາດຟົດຟື້ນຍິ່ງຂຶ້ນ.
ທ່ານລັດຖະມົນຕີ ຊີ້ໃຫ້ເຫັນວ່າ: ໃນໄລຍະຜ່ານມາເຖິງວ່າກຳລັງສື່ພວກເຮົາໄດ້ມີຄວາມພະຍາຍາມສູງໃນການສຸມໃສ່ໂຄສະນາຜົນສຳເລັດຕ່າງໆແຫ່ງການສ້າງສາພັດທະນາປະເທດຊາດຕະຫລອດໄລຍະ 40 ປີຜ່ານມາອັນໄດ້ຍົກໃຫ້ເຫັນບັນດາໄຊຊະນະ ແລະ ຜົນງານຕ່າງໆຂອງແຕ່ລະຂະແໜງການຍາດມາໄດ້, ພ້ອມທັງຍົກໃຫ້ເຫັນບາງບັນຫາຈຸດອ່ອນຄົງຄ້າງຂອງແຕ່ລະຂົງເຂດວຽກງານທີ່ຈະຕ້ອງໄດ້ເອົາໃຈໃສ່ແກ້ໄຂ
ເພື່ອພັດທະນາຕົນເອງໃຫ້ກ້າວໜ້າຂະຫຍາຍຕົວດີຂຶ້ນ, ແຕ່
ຄຽງຄູ່ກັນນັ້ນບັນດາຖັນແຖວສື່ມວນຊົນເຮົາບໍ່ວ່າຈະເປັນສື່ສິ່ງພິມ, ສື່ເອເລັກໂຕຣນິກ, ຂ່າວສານ ແລະວາລະສານຕ່າງໆຈະຕ້ອງໄດ້ເພີ່ມທະວີຍົກສູງພາລະບົດບາດຂອງຕົນໃນການເຮັດວຽກໂຄສະນາເຜີຍແຜ່ແນວທາງນະໂຍບຍຂອງພັກ, ລະບຽບກົດໝາຍຂອງລັດລົງສູ່ປະຊາຊົນໃຫ້ກວ້າງຂວາງທົ່ວເຖິງ. ພ້ອມນັ້ນກໍຕ້ອງນຳສະເໜີໃຫ້ໄດ້ບັນດາຜົນງານ ແລະ ຜົນສຳເລັດຕ່າງໆທີ່ຂະແໜງການ ແລະ ປະຊາຊົນທ້ອງຖິ່ນຕ່າງໆຍາດມາໄດ້ໃນຂະບວນວິວັດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຕະຫລອດໄລຍະ 40 ປີຜ່ານມາອັນເປັນໄລຍະທີ່ປະເທດລາວເຮົາໄດ້ຮັບການພັດທະນາດີຂຶ້ນກວ່າເວລາໃດໝົດ.
ທ່ານລັດຖະມົນຕີ ແນະນຳວ່າ: ແຕ່ລະສື່ຕ້ອງເປັນເຈົ້າການເຮັດວຽກງານຕາມພາລະບົດບາດຂອງຕົນໃຫ້ຫລາຍຂຶ້ນດ້ວຍການເປີດຄໍລຳ
ແລະ ລາຍການຕ່າງໆ,
ພ້ອມທັງການສຳພາດຊັ້ນຄົນ ແລະ ບຸກຄົນສຳຄັນຕ່າງໆແຕ່ລະຂະແໜງການ, ແຕ່ລະຂົງເຂດວຽກງານໃຫ້ຕິດພັນກັບຂະບວນການ 3 ສ້າງ ແລະ ປຸກລະດົມຂະບວນການແຂ່ງຂັນຮັກຊາດ ແລະ ພັດທະນາໃຫ້ມີຜົນສຳເລັດ ແລະ ເປັນຮູບປະທຳຫລາຍຂຶ້ນ, ໄປຄຽງຄູ່ກັບການສ່ອງແສງປາກົດການຫຍໍ້ທໍ້ຕ່າງໆ ເພື່ອປັບປຸງແກ້ໄຂຄືສະພາບອຸປະຕິເຫດ, ຂີ້ລັກງັດແງະ, ການເຊື່ອຖືງົມງວາຍ, ບັນຫາຢາເສບຕິດ ແລະ ອື່ນໆ ເພື່ອມີວິທີສະກັດກັ້ນ ແລະ ແກ້ໄຂໃຫ້ທັນການ. ແຕ່ຢາກໄດ້ແນວນັ້ນກຳລັງສື່ພວກເຮົາກໍຕ້ອງໄດ້ພັດທະນາຕົນເອງໃຫ້ມີຄຸນນະພາບ,
ສ່ອງແສງເຫດການໄດ້ຢ່າງຖືກຕ້ອງ, ວ່ອງໄວທັນເຫດການເພື່ອສ້າງຄວາມເຊື່ອໝັ້ນໃຫ້ແກ່ຜູ້ອ່ານ, ຜູ້ເບິ່ງ, ຜູ້ຟັງກໍຄືສັງຄົມນັບມື້ດີຂຶ້ນ ໂດຍສະເພາະການນຳໃຊ້ສັບພາສາຄຳເວົ້າກໍຕ້ອງໃຫ້ຖືກຕາມຫລັກໄວຍາກອນ, ຖ້າເຮັດໄດ້ແນວນີ້ຈຶ່ງຈະສົມກັບເປັນກະບອກສຽງອັນແຫລມຄົມຂອງພັກ ແລະ ລັດຖະບານເຮົາ.
No comments:
Post a Comment