ງານພົບປະພັນລະຍາການນຳກະຊວງການຕ່າງປະເທດ ​ແລະ ນັກການທູດອົງການ​ຈັດ​ຕັ້ງ​ສາກົນ

ສະຫະພັນແມ່ຍິງກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ໄດ້ຈັດງານພົບປະສັງສັນລະຫວ່າງບັນດາພັນລະຍາການນຳຂອງກະຊວງການຕ່າງປະເທດ, ພັນລະຍານັກການທູດລາວ, ພັນລະຍາຂອງທູຕານຸທູດຕ່າງປະເທດປະຈຳລາວ, ນັກການທູດຍິງ ແລະ ພັນລະຍາຂອງຜູ້ຕາງໜ້າອົງການຈັດຕັ້ງສາກົນປະຈຳລາວ, ຂຶ້ນໃນວັນທີ 13 ພະຈິກ 2015 ຢູ່ນະຄອນ ຫລວງວຽງຈັນເພື່ອສ້າງຂະບວນການຄຳນັບຮັບຕ້ອນວັນຊາດທີ 2ທັນວາຄົບຮອບ 40 ປີ, ທັງສົ່ງທ້າຍປີເກົ່າຕ້ອນຮັບປີໃໝ່ 2016 , ຊົມເຊີຍຜົນສຳເລັດວັນການທູດລາວຄົບຮອບ 70 ປີ (12 ຕຸລາ) ຖືເປັນໂອກາດພົບປະສັງສັນ, ສ້າງຄວາມມ່ວນຊື່ນ, ຄວາມຮູ້ຈັກຮັກແພງ, ແລກປ່ຽນວັດທະນະທຳເຊິ່ງກັນ ແລະ ກັນ, ພ້ອມນີ້ພາຍໃນງານຍັງມີການວາງສະແດງສິນຄ້າ ແລະ ອາຫານ, ສາທິດການເຮັດເຂົ້າໜົມລາວ ແລະ

ຕ່າງປະເທດ, ສະແດງສິລະປະສ້າງໄດ້ຄວາມເບີກບານມ່ວນຊ່ືນແລະ ຄວາມປະທັບໃຈໃຫ້ແກ່ຜູ້ຮ່ວມງານ.

          ທ່ານນາງ ນາລີ ສີສຸລິດ ພັນລະຍາທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ກ່າວວ່າ: ງານພົບປະດັ່ງກ່າວໄດ້ຈັດຂຶ້ນໃນໄລຍະແຫ່ງການອອກແຮງແຂ່ງຂັນສ້າງຂະບວນການຄຳນັບຮັບຕ້ອນວັນສະຖາປະນາ ສປປ ລາວ ຄົບຮອບ 40 ປີເຊິ່ງຕະຫລອດໄລຍະຜ່ານມາປະຊາຊົນລາວກໍຄືແມ່ຍິງລາວທີ່ມີຈຳນວນຫລາຍກວ່າເຄິ່ງໜຶ່ງຂອງພົນລະເມືອງລາວໄດ້ຕັ້ງໜ້າປະກອບສ່ວນເຂົ້າໃນການປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະເທດຊາດ, ທັງປະຕິບັດເປົ້າໝາຍສະຫັດສະວັດການພັດທະນາຂອງສະຫະປະຊາຊາດທີ່ໄດ້ມີຜົນສຳເລັດຫລາຍດ້ານທີ່ໃຫຍ່ຫລວງກວ່າເກົ່າອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນລາວລວມທັງແມ່ຍິງແລະ ເດັກນ້ອຍນັບມື້ດີຂຶ້ນເປັນກ້າວໆ, ປະເທດຊາດໄດ້ຮັບການພັດທະນາຈະເລີນຮຸ່ງເຮືອງຢ່າງບໍ່ຢຸດຢັ້ງເຊິ່ງຜົນສຳເລັດດັ່ງກ່າວທີ່ຍາດມາໄດ້ນັ້ນສ່ວນໜຶ່ງແມ່ນມາຈາກການປະກອບສ່ວນຊ່ວຍເຫລືອຮ່ວມມື ແລະ ສະໜັບສະໜູນຂອງວົງຄະນາຍາດສາກົນໂດຍສະເພາະແມ່ນການຊ່ວຍເຫລືອຮ່ວມມືຈາກບັນດານັກການທູດທີ່ມີສຳນັກງານຕັ້ງຢູ່ ສປປ ລາວ ອັນເຮັດໃຫ້ ສປປ ລາວ ມີບົດບາດສູງຂຶ້ນໃນເວທີສາກົນ ແລະ ໄດ້ຮັບຄວາມໄວ້ວາງໃຈຈາກສາກົນສະແດງອອກໄດ້ຮັບຄວາມໄວ້ວາງໃຈຈາກສາກົນໃຫ້ເປັນເຈົ້າພາບຈັດກອງປະຊຸມລະດັບພາກພື້ນ ແລະ ສາກົນລະດັບຕ່າງໆໃນຊຸມປີຜ່ານມາ.