ລັດຖະມົນຕີສຶກສາທິການ ແລະ ກິລາ ອອກແຈ້ງການພັກຮຽນໃນຊ່ວງໄລຍະອາກາດໜາວ
ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາທິການ ແລະ ກິລາ ດຣ.
ພັນຄຳ ວິພາວັນ ໄດ້ອອກແຈ້ງການເຖິງນະຄອນຫລວງວຽງຈັນ ແລະ ທ້ອງຖິ່ນຕ່າງໆກ່ຽວກັບການພັກຮຽນໃນຊ່ວງໄລຍະອາກາດໜາວ, ຊຶ່ງລະບຸວ່າ: ໃນຊ່ວງໄລຍະວັນທີ 25-31 ມັງກອນ 2016 ແມ່ນໄລຍະພັກພາກຮຽນທີ I ສົກຮຽນ 2015-2016 ແລະ
ຈະເລີ່ມເຂົ້າຮຽນພາກຮຽນທີ II ນັບແຕ່ວັນທີ 1 ກຸມພາ 2016 ເປັນຕົ້ນໄປ. ເນື່ອງຈາກວ່າໃນຊ່ວງໄລຍະເວລານີ້ເຫັນວ່າ ສະພາບອາກາດໜາວຫລາຍອາດຈະມີຜົນກະທົບໂດຍກົງຕໍ່ສຸຂະພາບຂອງນັກຮຽນ-ນັກສຶກສາ. ສະນັ້ນ ຈິ່ງສະເໜີມອບໃຫ້ທ່ານເຈົ້າຄອງນະຄອນຫລວງວຽງຈັນ ແລະ ທ່ານເຈົ້າແຂວງ ທຸກໆແຂວງໃນທົ່ວປະເທດ ຊ່ວຍຊີ້ນຳອຳນາດການ
ປົກຄອງທ້ອງຖິ່ນ, ຜູ້ບໍລິຫານການສຶກສາ ແລະ ກິລາ ຂັ້ນຂອງຕົນ ພ້ອມກັນເອົາໃຈໃສ່ຕິດຕາມຊຸກຍູ້ການຮັກສາສຸຂະພາບຂອງນັກຮຽນ-ນັກສຶກສາ ໃນຊ່ວງອາກາດໜາວນີ້ໃຫ້ດີ ແລະ ປະສະຈາກສິ່ງເຈັບເປັນຕ່າງໆທີ່ອາດຈະເກີດຂຶ້ນຍ້ອນອາກາດໜາວ. ຖ້າຫາກວ່າໃນຊ່ວງໄລຍະເຂົ້າຮຽນພາກຮຽນທີ II ນີ້ອາກາດຍັງສືບຕໍ່ໜາວຈັດຢູ່ແມ່ນມອບໃຫ້ອຳນາດການປົກຄອງແຕ່ລະທ້ອງຖິ່ນເປັນຜູ້ຄົ້ນຄວ້າພິຈາລະນາ ຕາມສະພາບຄວາມເປັນຈິງ, ອາດຈະໂຈະການເຂົ້າຮຽນຊົ່ວຄາວຈົນກວ່າອາກາດຈະຢູ່ໃນສະພາບປົກກະຕິ ແຕ່ໃຫ້ມີແຜນການດຳເນີນການຮຽນ-ການສອນຊົດເຊີຍຄືນໃນຊ່ວງໄລຍະພັກຮຽນຊົ່ວຄາວນັ້ນ. ທັງນີ້ກໍເພື່ອຮັບປະກັນເຮັດໃຫ້ການຮຽນ-ການສອນໝົດຕາມໂຄງການຫລັກສູດ ທີ່ກຳນົດໄວ້ໃນແຕ່ລະຊັ້ນຮຽນ.
No comments:
Post a Comment