ເພີ່ມທະວີການຮ່ວມມືປ້ອງກັນຊາດເພື່ອຄວາມເຂັ້ມແຂງຂອງປະຊາຄົມອາຊຽນ

          ກອງປະຊຸມບໍ່ເປັນທາງການຂອງຜູ້ບັນຊາການທະຫານສູງສຸດອາຊຽນຄັ້ງທີ 13 ເຊິ່ງກອງທັບປະຊາຊົນລາວ ໄດ້ຮັບກຽດເປັນເຈົ້າພາບຈັດຂຶ້ນຢ່າງເປັນທາງການໃນວັນທີ 14 ມີນານີ້ ທີ່ນະຄອນຫລວງວຽງຈັນໄດ້ຮັບຜົນສຳເລັດຢ່າງຈົບງາມ. ໂດຍພາຍໃຕ້ຫົວຂໍ້ “ເພີ່ມທະວີດ້ານວຽກງານປ້ອງກັນຊາດເພື່ອສ້າງຄວາມເຂັ້ມແຂງຂອງປະຊາຊົມອາຊຽນ” ເຊິ່ງມີຜູ້ບັນຊາການທະຫານສູງສຸດຈາກ 10 ປະເທດສະມາຊິກອາຊຽນເຂົ້າຮ່ວມ.

          ທ່ານ ພົນຕີ ສຸວອນ ເລືອງບຸນມີ ລັດຖະມົນຕີຊ່ວຍວ່າການກະຊວງປ້ອງກັນປະເທດ ຫົວໜ້າ ກົມໃຫຍ່ເສນາທິການກອງທັບປະຊາຊົນລາວ ໄດ້ຖະແຫລງຕໍ່ສື່ມວນຊົນວ່າ: ກອງປະຊຸມຄັ້ງນີ້ໄດ້ແລກ ປ່ຽນ

ວິໄສທັດທາງການທະຫານຂອງກອງທັບ ບັນດາປະເທດສະມາຊິກອາຊຽນ ແລະ ທິດທາງການຮ່ວມມືໃນຂອບກອງປະຊຸມບໍ່ເປັນທາງການ ຜູ້ບັນຊາການທະຫານສູງສຸດອາຊຽນໃນອະນາຄົດ; ກຳນົດແຜນການຮ່ວມມື 2 ປີ ຂອງທະຫານອາຊຽນ 2016-2018; ປຶກສາຫາລື ແລະ ລົງນາມຖະແຫລງ ການຮ່ວມຂອງກອງປະຊຸມ ບໍ່ເປັນທາງການຜູ້ບັນຊາການທະຫານສູງສຸດ ອາຊຽນ ຄັ້ງທີ 13.

          ກອງປະຊຸມໄດ້ເຫັນດີເປັນເອກະພາບໃນການເພີ່ມທະວີ ການພົວພັນຮ່ວມມືດ້ານວຽກງານປ້ອງ ກັນຊາດຂອງບັນດາກອງທັບປະເທດສະມາຊິກອາຊຽນ ເພື່ອຮັບມືກັບໄພຂົ່ມຂູ່ ແລະ ສິ່ງທ້າທາຍຕ່າງໆ ທີ່ເກີດຂຶ້ນຢູ່ໃນພາກພື້ນໂດຍສະເພາະແມ່ນບັນຫາການກໍ່ການຮ້າຍ, ຄວາມໝັ້ນຄົງທາງທະເລ, ການຄ້າມະນຸດ, ໄພພິບັດທາງທຳມະຊາດ, ອາຊະຍາກຳທາງລະບົບຄອມພິວເຕີ ແລະ ອື່ນໆ ຢ່າງມີປະສິດທິພາບ ເພື່ອປົກປັກຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມສົມບູນພູນສຸກ ແລະ ຄວາມເຂັ້ມແຂງຂອງປະຊາຄົມອາຊຽນ.

ກອງປະຊຸມໄດ້ເຫັນດີ ສືບຕໍ່ເສີມສ້າງການຮ່ວມມືດ້ານປ້ອງກັນຊາດ ລະຫວ່າງກອງທັບຂອງບັນດາປະເທດສະມາຊິກດ້ວຍກັນ ເພື່ອສົ່ງເສີມຄວາມເຊື່ອໝັ້ນ, ຄວາມໄວ້ວາງໃຈ ເຊິ່ງກັນ ແລະ ກັນ, ລວມທັງຄວາມອາດສາມາດໃນການຮັບມືກັບສິ່ງທ້າທາຍ ທີ່ບໍ່ແມ່ນທາງທະຫານຢ່າງມີປະສິດທິພາບ ແລະ ທັນເວລາ ໂດຍເຄົາລົບຫລັກການອະທິປະໄຕ ແລະ ຜືນແຜນດິນອັນຄົບຖ້ວນ, ການຕົກລົງດ້ວຍຄວາມເປັນເອກະສັນ, ການເຂົ້າຮ່ວມກິດຈະກຳຕ່າງໆ ຕາມຄວາມສາມາດຕົວຈິງ, ດ້ວຍຄວາມສະໝັກໃຈ ແລະ ບໍ່ມີຂໍ້ຜູກມັດ ບົນພື້ນຖານຄວາມສະບາຍໃຈຂອງທຸກຝ່າຍ.