ຜ່ານບົດສຳຫລວດກຳນົດເຂດແລວທາງລົດໄຟສະຫວັນນະເຂດ-ລາວບາວ

ກອງປະຊຸມປຶກສາຫາລື ແລະ ຮັບຟັງການລາຍງານບົດສຳ ຫລວດການກຳນົດຂອບເຂດແລວທາງລົດໄຟ ສະຫວັນນະເຂດ ຫາຊາຍແດນລາວ-ຫວຽດນາມ (ສະຫວັນນະເຂດ-ລາວບາວ), ໄລຍະທາງ 220 ກິໂລແມັດ, ມີໄດ້ຈັດຂຶ້ນໃນວັນທີ 14 ມີນາ ນີ້, ທີ່ຫ້ອງວ່າການປົກຄອງແຂວງສະຫວັນນະເຂດ ພາຍໃຕ້ການເປັນປະທານຂອງທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ແລະ ທ່ານ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ, ມີພາກສ່ວນທຸລະກິດເຂົ້າຮ່ວມນຳດ້ວຍ.

ທ່ານ ສອນສັກ ນໍຍານຊະນະ ຮອງຫົວໜ້າກົມທາງລົດໄຟ ໃຫ້ຮູ້ວ່າ: ການຜ່ານແບບການກຳນົດຂອບເຂດແລວທາງລົດໄຟດັ່ງກ່າວ ໃນຄັ້ງນີ້ ເປັນແບບທີ 2 ພາຍຫລັງທີ່ໄດ້ມີການສຳຫລວດອອກແບບ

ແລວທີ 1 ແລ້ວ ແຕ່ເຫັນວ່າເປັນແບບທີ່ໃຊ້ງົບປະມານຫລາຍ ແລະ ມີການກະທົບຕໍ່ສິ່ງ ແວດລ້ອມ, ສັງຄົມໃນຫລາຍຈຸດ ສະນັ້ນ ຈຶ່ງໄດ້ສຳຫລວດອອກແບບແລວທາງໃໝ່ ເພື່ອຫລຸດດຜ່ອນຜົນກະທົບໃຫ້ໜ້ອຍທີ່ສຸດ. ໃນຄວາມຍາວ 220 ກິໂລແມັດ, ລະບົບລາງກວ້າງ 1,435 (Standard Gauge) ເປັນລາງຄູ່ໄປກັບໄດ້ ໂດຍຈະກໍ່ສ້າງໄປຂະໜານກັບທາງເລກ 9 ຫ່າງກັນປະມານ 30 ແມັດ, ລວມມີ 11 ສະຖານີ, ໃນນີ້ມີ 4 ສະຖານີໃຫຍ່ ແລະ 7 ສະຖານີນ້ອຍ, ສະຖານີຫລັກແມ່ນຕັ້ງຢູ່ທີ່ບ້ານທ່າສະໂນນ້ອຍ ເມືອງໄກສອນພົມວິຫານ ແລະ ໄປສິ້ນສຸດຢູ່ທີ່ສະຖານີສຸດທ້າຍບ້ານແດນສະຫວັນ ເມືອງເຊໂປນ. ລົດໄຟດັ່ງກ່າວ, ສາມາດແລ່ນໄດ້ໃນຄວາມໄວສູງສຸດ 160 ກິໂລແມັດ/ຊົ່ວໂມງ, ຮັບນ້ຳໝັກໄດ້ 25 ໂຕນ/ເພົາ. ຈາກການກຳນົດແລວທາງຕາມມາດຕະຖານໃຈກາງທາງລົດໄຟ  ເບື້ອງລະ 40 ແມັດ, ລວມສອງຟາກທາງ 80 ແມັດ ແລະ ເຂດສະຖານີໃຫຍ່ແມ່ນ 240-500 ແມັດ, ຍາວ 2.000 ແມັດຫາ 3.000 ແມັດ, ສະຖານີນ້ອຍກວ້າງ 160-200 ແມັດ, ຍາວ 1.500 ແມັດ-2.000 ແມັດ.

ໃນໂອກາດນີ້, ທ່ານ ດຣ. ບຸນຈັນ ສິນທະວົງ ໄດ້ມີຄວາມເຫັນຕໍ່ກອງປະຊຸມວ່າ: ໂຄງການທາງລົດໄຟສະຫວັນນະເຂດ-ລາວບາວ ໄດ້ລົງນາມສັນຍາແມ່ ວ່າດ້ວຍການສຳປະທານໂຄງການກໍ່ສ້າງ ແລະ ພັດທະນາເສັ້ນທາງລົດໄຟດັ່ງກ່າວ ໃນຮູບແບບ BOT (ເປັນຝ່າຍບໍລິສັດລົງທຶນກ່ອນ) ລະຫວ່າງລັດຖະບານສປປ ລາວ ແລະ ບໍລິສັດ Giant Consolidated Limited ໃນວັນທີ 5/11/ 2012, ເຊິ່ງມີໄລຍະສຳປະທານໂຄງການ 50 ປີ ແລະ ສາມາດຕໍ່ສັນຍາໄດ້ບົນພື້ນຖານການຕົກລົງເຫັນດີຈາກລັດຖະບານ, ຄາດວ່າໂຄງການດັ່ງກ່າວ ຈະໃຊ້ເວລາກໍ່ສ້າງ 5 ປີ, ດ້ວຍທຶນທັງໝົດ 5 ຕື້ໂດລາສະຫະລັດ. ເພື່ອເປັນການປັບປຸງເນື້ອໃນຂອງບົດສຳຫລວດການກຳນົດຂອບເຂດແລວທາງລົດໄຟ ທີ່ໄດ້ສະເໜີມານັ້ນໃຫ້ຄົບຖ້ວນ ແລະ ສົມບູນຕາມການປະກອບຄຳເຫັນຂອງບັນດາທ່ານ ທີ່ເຂົ້າຮ່ວມ ຂໍມີຄຳເຫັນຊີ້ນຳບາງບັນຫາດັ່ງນີ້: ເຫັນດີເປັນເອກະພາບການກຳນົດເອົາແລວທາງລົດໄຟຕາມແບບທີ 2, ປັບປຸງເນື້ອໃນໃຫ້ຄົບຖ້ວນສົບບູນ ເພື່ອຈະໄດ້ລາຍງານລັດຖະບານພິຈາລະນາຮັບຮອງ ແລະ ຈາກນັ້ນແລ້ວ ແມ່ນໃຫ້ບໍລິສັດສືບຕໍ່ການດຳເນີນການອອກແບບເຕັກນິກກໍ່ສ້າງ, ສຶກສາຜົນກະທົບຕໍ່ສະພາບແວດລ້ອມລວມທັງຫົວໜ່ວຍລາຄາກໍ່ສ້າງ, ເພື່ອສະເໜີກະຊວງ ຍທຂ ພິຈາລະນາຮັບຮອງເປັນທາງການ ພ້ອມທັງເລີ່ມລົງມືຈັດຕັ້ງປະຕິບັດໂຄງການໃຫ້ສຳເລັດຕາມແຜນກຳນົດໄວ້.