laophatthananewspaper: ລາວໂຈະການນຳເຂົ້າໝູນ້ອຍ ແລະ ຊີ້ນໝູບໍ່ມີຄຸນນະພາບຈາກຕ່າງປະເທດ

ປັດຈຸບັນກົມລ້ຽງສັດ ແລະ ການປະມົງກຳລັງດຸ່ນດ່ຽງການຄ້ຳປະກັນສະບຽບອາ ຫານ,ໂດຍສະເພາະແມ່ນການຜະລິດໝູຊີ້ນໃນນະຄອນຫຼວງວຽງຈັນ ແລະ ສັງເກດເຫັນວ່າຜ່ານມາໄດ້ມີການລັກລອບນຳເຂົ້າລູກໝູ ແລະ ຊີ້ນໝູບໍ່ຜ່ານດ່ານສັດຕະວະແພດຕາມດ່ານຊາຍແດນຕ່າງໆ, ສົ່ງຜົນກະທົບຕໍ່ຜູ້ຜະລິດ ແລະ ລ້ຽງໝູຊີ້ນຢູ່ທ້ອງຖິ່ນຕ່າງ ແລະ ສົ່ງຜົນໃຫ້ການຈຳໜ່າຍລູກໝູ ແລະ ຊີ້ນໝູທີ່ຜະລິດຢູ່ພາຍໃນພົບຄວາມຫຍຸ້ງຍາກ, ພ້ອມດຽວກັນນັ້ນກົມລ້ຽງສັດ ແລະ ການປະມົງກໍບໍ່ສາມາດດຸ່ນດ່ຽງການຄ້ຳປະກັນສະບຽງອາຫານໄດ້, ໂດຍສະເພາະແມ່ນການດຸ່ນດ່ຽງດ້ານການຕອບສະໜອງຂອງຊີ້ນຢູ່ຕະຫຼາດຕ່າງໆຂອງປະເທດ ແລະ ຍັງຄັດກັບ

ທິດນະໂຍບາຍສົ່ງເສີມການລ້ຽງສັດພາຍໃນແລະ ຫຼຸດຜ່ອນການນຳເຂົ້າຈາກຕ່າງປະເທດ, ປັດຈຸບັນສະພາບການຜະລິດລູກໝູ ແລະ ຊີ້ນໝູໃນນະຄອນຫຼວງວຽງຈັນເຫັນວ່າສາມາດຕອບສະໜອງໄດ້ຕາມຄວາມຕ້ອງການຂອງສັງຄົມ, ດັ່ງນັ້ນກົມລ້ຽງສັດ ແລະ ການປະມົງ, ຈຶ່ງໄດ້ອອກແຈ້ງການສະບັບເລກທີ 0961/ກລປ, ລົງວັນທີ 22 ກຸມພາ 2016, ເຖິງຫົວໜ້າຂະແໜງລ້ຽງສັດ ແລະ ການປະມົງ ແລະ ຜູ້ປະກອບການລ້ຽງໝູຢູ່ທ້ອງຖິ່ນຕ່າງໆ ໃນຂອບເຂດທົ່ວປະເທດໃຫ້ໂຈະຊົ່ວຄາວການນຳເຂົ້າໝູນ້ອຍ, ລູກໝູ, ໝູູມ່ີຊີວິດ ແລະ ຊີ້ນໝູທີ່ບໍ່ມີຄຸນນະພາບຈາກຕ່າງປະເທດເປັນຊົ່ວຄາວຄື: (1) ໃຫ້ຂະແໜງລ້ຽງສັດ ແລະ ການປະມົງປະຈຳແຂວງຕ່າງໆ, ໂຈະຊົ່ວຄາວການນຳເຂົ້າໝູນ້ອຍ, ລູກໝູ , ໝູມີຊີວິດ, ໝູສຸດລູກ ແລະ ຊີ້ນໝູທີ່ໍ່ບໍ່ມີຄຸນນະພາບ, ພ້ອມທັງແນະນຳດ່ານກວດກາສັດຕະວະແພດຢູ່ດ່ານຊາຍແດນຕ່າງໆ, ເອົາໃຈໃສ່ຕິດຕາມກວດກາ ແລະ ສະກັດກັ້ນການນຳເຂົ້າໝູນ້ອຍ ແລະ ຊີ້ນໝູດັ່ງກ່າວ ຢາງເຂັ້ມງວດ(2) ໃຫ້ດ່ານກວດກາສັດຕະວະແພດເພີ່ມຄວາມເຂັ້ມງວດໃນການຕິດຕາມ, ກວດກາ ແລະ ບໍ່ອະນຸຍາດໃຫ້ນຳເຂົ້າໝູນ້ອຍ ແລະ ຊີ້ນໝູດັ່ງກ່າວ ເດັດຂາດ, ໃນກໍລະນີພົບເຫັນຜູ້ລະເມີດໃຫ້ສົມທົບກັບພາກສ່ວນກ່ຽວຂ້ອງປະຕິ ບັດຕາມມາດຕະການ ກ່າວເຕືອນ, ສຶກສາອົບຮົມ, ປັບໃໝ່ ແລະ ດຳເນີນຄະດີທາງແພ່ງ, ທາງອາຍາ, ຕາມແຕ່ກໍລະນີໜັກ ຫຼ ເບົາ, ທີ່ໄດ້ກຳນົດໄວ້ໃນກົດໝາຍ ແລະ ລະບຽບການ , ສ່ວນຂອງກາງໃຫ້ຍືດ ແລະ ນຳໄປທຳລາຍຖິ້ມຕາມຫຼັກວິຊາການກຳນົດ.(3) ພາຍຫຼັງທີ່ກົມລ້ຽງສັດ ແລະ ການປະມົງດຸ່ນດ່ຽງການຄ້ຳປະກັນສະບຽບອາຫານ (ໂດຍສະເພາະແມ່ນການຜະລິດໝູຊີ້ນ) ເປັນທີ່ຮຽບຮ້ອຍແລ້ວ, ກົມລ້ຽງສັດ ແລະ ການປະມົງຈະເປັນຜູ້ຄົ້ນຄ້ວາ ແລະ ພິຈາລະນາເປັນອັນສະເພາະ ແລະ ອອກແຈ້ງການຍົກເລິກການສະກັດກັ້ນການນຳເຂົ້າດັ່ງກ່າວຕາມແຕ່ລະເງື່ອນໄຂຄວາມຈຳເປັນໃນແຕ່ລະໄລຍະໃຫ້ແທດເໝາະ.