ອາສາສະໝັກຍີ່ປຸ່ນປະກອບສ່ວນສຳຄັນເຂົ້າໃນການພັດທະນາຊົນນະບົດຢູ່ລາວ

    ນີ້ແມ່ນຄຳເເຫັນບາງຕອນຂອງທ່ານນາຍົກລັດຖະມົນຕີ ທອງລຸນ ສີສຸລິດ ຕໍ່ບັນດາອາສາສະໝັກຍີ່ປຸ່ນ ໃນໂອກາດທີ່ທ່ານໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງອາສາສະໝັກດັ່ງກ່າວ ໃນວັນທີ 22 ມິຖຸນານີ້ ທີ່ສຳນັກງານນາຍົກລັດຖະມົນຕີ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ອາສາສະໝັກຍີ່ປຸ່ນທີ່ມາປະຕິບັດໜ້າທີ່ຢູ່ລາວຕາມຂະແໜງການ ແລະ ທ້ອງຖິ່ນຕ່າງໆ, ພ້ອມທັງຕີລາຄາສູງຕໍ່ການສະໜັບສະໜູນຊ່ວຍເຫລືອຈາກລັດຖະບານຍີ່ປຸ່ນໃນຫລາຍດ້ານ. ໃນຊຸມປີຜ່ານມາ, ຍີ່ປຸ່ນໄດ້ພິຈາລະນາປ່ອຍເງິນກູ້ດອກເບ້ຍຜ່ອນຜັນໃຫ້ແກ່ລາວອີກຄັ້ງໃໝ່ ແລະ ຕົກລົງໃຫ້ການຊ່ວຍເຫລືອ ສປປ ລາວ ຕື່ມອີກ 2 ໂຄງການ ຄືໂຄງການປັບປຸງຂົວໃນເສັ້ນທາງເລກ 9 ແລະ ໂຄງການພັດທະນາຊັບພະຍາກອນມະນຸດ ໂດຍການໃຫ້ການສຶກສາລະດັບປະລິນຍາໂທ ແລະ ເອກ ໃນສົກປີ 2016-2017. ນອກຈາກນີ້ ຍັງໄດ້ສົ່ງ

ອາສາສະໝັກເປັນຈຳນວນຫລາຍມາຊ່ວຍພັດທະນາໃນຂະແໜງການຕ່າງໆ ເປັນຕົ້ນຂົງເຂດວຽກງານການສຶກສາ, ສາທາລະນະສຸກ, ກະສິກຳ-ປ່າໄມ້, ການພັດທະນາຊົນນະບົດ ແລະ ອື່ນໆ ເຊິ່ງນັບແຕ່ປີ 1965 ມາຮອດປັດຈຸບັນ ມີອາສາສະໝັກຍີ່ປຸ່ນມາປະຕິບັດໜ້າທີ່ຢູ່ລາວແລ້ວເກືອບພັນຄົນ ແລະ ສະເພາະປີ 2016 ກໍມີຫລາຍກວ່າ 60 ຄົນ ເພື່ອຊ່ວຍເຫລືອດ້ານວິຊາການ ກໍຄືການຖ່າຍທອດຄວາມຮູ້, ຄວາມສາມາດ, ເຕັກໂນໂລຊີໃຫ້ແກ່ຂະແໜງການ ແລະ ທ້ອງຖິ່ນຊົນນະບົດຫ່າງໄກສອກຫລີກ, ປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມຂອງລາວໄດ້ເປັນຢ່າງດີ.

    ໃນຕອນທ້າຍ, ທ່ານນາຍົກລັດຖະມົນຕີ ໄດ້ອວຍພອນໃຫ້ອາສາສະໝັກດັ່ງກ່າວປະສົບຜົນສຳເລັດໃນການປະຕິບັດໜ້າທີ່ ແລະ ຮຽນຮູ້ປະສົບການຕ່າງໆຢູ່ລາວນຳດ້ວຍ.