ເຫດຄາດຕະກຳຢູ່ຫ້ອງເຊົ່າເມືອງປາກເຊເຈົ້າໜ້າທີ່ສາມາດຈັບຕົວຄາດຕະກອນໄດ້ແລ້ວ

ພາບ-ຂ່າວ : ຫນັງສືພິມ ປກສ

           ເມື່ອສອງອາທິດຜ່ານມາ ໄດ້ເກີດເຫດສະເທືອນຂວັນ ຄືມີຊາຍໜຸ່ມຄົນໜຶ່ງຖືກຄາດຕະກຳຢ່າງໂຫດຫ້ຽມໃນຫ້ອງເຊົ່າຂອງຕົນ ທີ່ເມືອງປາກເຊ ແຂວງຈຳປາສັກ. ຜ່ານການລົງສືບສວນ-ສອບສວນຂອງເຈົ້າໜ້າທີ່ໃນຈຸດເກີດເຫດຮູ້ວ່າ: ຜູ້ຕາຍຊື່ທ້າວ ພູຜ່ານ ອາຍຸ 32 ປີ ຢູ່ບ້ານເຊໂນ ເມືອງອຸ ທຸມພອນ ແຂວງສະຫວັນນະເຂດ ເຊິ່ງຖືກຂອງມີຄົມແທງຫລາຍຈຸດຕາມຮ່າງກາຍ ແລະ ບໍລິເວນຫົວກໍຖືກກະທົບ, ຈາກນັ້ນ ເຈົ້າໜ້າທີ່ຈຶ່ງໄດ້ເລັ່ງຕິດຕາມຕົວຄາດຕະກອນໃຈໂຫດລາຍນີ້ຢ່າງໃກ້ຊິດ ແລະ ໃນທີ່ສຸດກໍສາມາດຈັບຕົວມາດຳເນີນຄະດີໄດ້ ເມື່ອວັນທີ 6 ກໍລະກົດຜ່ານມານີ້ ຫລັງຈາກເອົາຕົວຫລົບໜີຂຶ້ນມາຢູ່ນະຄອນຫລວງວຽງຈັນ.

            ຜູ້ຕ້ອງຫາຊື່ວ່າທ້າວ ຄຳໄຊ ອາຍຸ 18 ປີ ຢູ່ບ້ານຫ້ວຍນ້ຳເຢັນ ເມືອງນາຊາຍທອງ ນະຄອນ ຫລວງວຽງຈັນ, ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ກ່ຽວຮັບສາລະພາບວ່າ: ຕົນໄດ້ລົງມາເຂົ້າໂຮງຮຽນມັດທະຍົມປາຍແຫ່ງໜຶ່ງຢູ່ເມືອງບາຈຽງ ແຂວງຈຳປາສັກ ໃນປີ 2014 ແລະ ເມື່ອກາງເດືອນມິຖຸນາ 2016 ຕົນໄດ້ຮູ້ຈັກກັບຜູ້ຕາຍຢູ່ຮ້ານເບຍແຫ່ງໜຶ່ງ ແລະ ໄດ້ມີການຕິດຕໍ່ພົວພັນບາງຄັ້ງຄາວ.

ໃນມື້ເກີດເຫດຄື 23 ມິຖຸນາ 2016 ຜູ້ຕາຍໄດ້ຂັບລົດໃຫຍ່ໄປຮັບຕົນຢູ່ຮ້ານເບຍແຫ່ງໜຶ່ງແລ້ວພາກັນໄປຫ້ອງເຊົ່າ ໂດຍຜູ້ຕາຍບອກວ່າແວ່ອາບນ້ຳ ເພື່ອຈະໄປຫລິ້ນຮ້ານບັນເທີງຕໍ່, ຫລັງຈາກນັ້ນທັງສອງເກີດການຜິດຖຽງກັນຢ່າງແຮງແລ້ວຕົນໄດ້ແລ່ນເຂົ້າໄປຫ້ອງຄົວຈັບມີດປາຍແຫລມດວງໜຶ່ງມາແທງໃສ່ບໍລິເວນທ້ອງຜູ້ຕາຍ ແຕ່ຜູ້ຕາຍຍັງຕໍ່ສູ້ຈຶ່ງໄດ້ເອົາແຂນຮັດຄໍ ແລະ ເອົາສາກເຂົ້າ ເບືອຕີບໍລິເວນຫົວສອງຄັ້ງ ແລະ ໃຊ້ມີດອີກດວງໜຶ່ງແທງເຂົ້າອີກບໍລິເວນຄໍ ແລະ ລຳຕົວຂອງຜູ້ຕາຍຈົນເສຍຊີວິດ. ຈາກນັ້ນໄດ້ເອົາສາຍຄໍຄຳ ແລະ ໂທລະສັບຂອງຜູ້ຕາຍຫລົບໜີອອກທາງດ້ານຫລັງຫ້ອງເຊົ່າ, ມາຮອດວັນທີ 28 ຕົນໄດ້ຂີ່ລົດໂດຍສານຂຶ້ນມານະຄອນຫລວງວຽງຈັນ ພ້ອມທັງຂາຍສາຍຄໍຄຳຂອງຜູ້ຕາຍໃຫ້ຜູ້ໂດຍສານຄົນໜຶ່ງທີ່ນັ່ງລົດມານຳກັນແລ້ວມາລີ້ຊ້ອນຕົວຢູ່ບ້ານຫ້ວຍນ້ຳເຢັນ ເມືອງນາຊາຍທອງ ນະຄອນຫລວງວຽງຈັນ ແລະ ຖືກເຈົ້າໜ້າທີ່ຈັບຕົວມາດຳເນີນຄະດີຕາມລະບຽບກົດໝາຍໄດ້ໃນທີ່ສຸດ.