ສະພາບລົດເສຍຢູ່ນະຄອນຫລວງວຽງຈັນນັບມື້ຮ້າຍແຮງ ພຽງ 7 ວັນມີລົດຈັກເສຍເກືອບ 10 ຄັນ

        ຫ້ອງການຕຳຫຼວດນະຄອນຫຼວງວຽງຈັນ ເປີດເຜີຍວ່າ: ປັດຈຸບັນສະພາບລົດຈັກເສຍຫາຍ ຢູ່ນະຄອນ ຫຼວງວຽງຈັນ ນັບມື້ຮ້າຍແຮງຂື້ນພຽງໜຶ່ງອາທິດຜ່ານມານີ້ ໄດ້ມີລົດຈັກເສຍຫາຍເກືອບ 10 ຄັນ, ສ່ວນໃຫຍ່ ຈະເປັນລົດເວບ ຫຍີ່ຫໍ້ ຮອນດາ.

        ເຈົ້າໜ້າທີ່ ຫ້ອງຕຳຫຼວດ ນະ ຄອນຫຼວງວຽງຈັນ ໃຫ້ຮູ້ວ່າ: ນັບ ແຕ່ວັນທີ 23-29 ມັງກອນ ຜ່ານ ມາ ໄດ້ມີປະ ກົດການຫຍໍ້ທໍ້ເກີດ ຂື້ນ 30 ກ່ວາເລື່ອງ ທຽບໃສ່ອາທິດຜ່ານມາ ຜ່ອນລົງເລັກໜ້ອຍ ເປັນຕົ້ນ ແມ່ນອຸປະຕິເຫດ ແລະ ສະພາບປຸ້ນຈີ້-ຊີງຊັບ, ແຕ່ຂະນະ ດຽວກັນ ສະພາບລົດເສຍພັດເພີ່ມທະວີຂື້ນ ໂດຍສະເພາະແມ່ນລົດ ຈັກສະພາບລັກ ຄື: ໃນວັນທີ 23 ມັງກອນ ເວລາ 11 ໂມງທາງເຈົ້າໜ້າທີ່ຫ້ອງຕຳ ຫຼວດໄດ້ຮັບແຈ້ງຄວາມຈາກ ພົນລະເມືອງວ່າໄດ້ມີລົດຈັກເສຍຢູ່ຮ້ານສະໜຸກເກີ້ ແຫ່ງໜຶ່ງໃນບ້ານຄຳຮຸ່ງ ເມືອງໄຊເສດຖາ ນະຄອນຫຼວງ ວຽງຈັນ ແລະ ຕໍ່ມາໃນວັນທີ 28 ນີ້ ເຈົ້າໜ້າທີ່ກໍໄດ້ຮັບແຈ້ງວ່າ: ໄດ້ມີຄົນຮ້າຍ 2 ຄົນ ເຂົ້າມາລັກລົດຈັກ ທີ່ ຈອດໄວ້ຂ້າງເຮືອນພັກ ມັງກອນ ຄຳ ເຊິ່ງເປັນລົດຈັກ ຍີ່ຫໍ້ CRB ສີ ຂາວ ແລະ ເຫດການລັກລົດ ອື່ນໆ ເກີດຂື້ນ ຢ່າງລຽນຕິດພຽງ 7 ວັນ ຜ່ານມາ ມີລົດຈັກ ເສຍແລ້ວ ເກືອບ 10 ຄັນ. ສະນັ້ນ ເຈົ້າໜ້າທີ່ ປກສ ນະຄອນຫຼວງວຽງ ຈັນ ຈຶ່ງ ຢາກໃຫ້ ປະຊາຊົນ ຈົ່ງເປັນເຈົ້າ ການ ມີສະຕິຮັກສາລົດ ແລະ ຊັບ ສິນຂອງຕົນໃຫ້ດີ ເພື່ອບໍ່ໃຫ້ກຸ່ມ ຄົນບໍ່ດີລັກເອົາໄປໄດ້ .

           ທ່ານ ພັນເອກ ແສງເພັດ ພົມມະລີ ຮອງກອງບັນຊາການ ປກສ ນະຄອນຫຼວງວຽງຈັນກ່າວ ໃນກອງປະຊຸມ ສະຫຼຸບວຽກງານ ກໍ່ ສ້າງຮາກຖານການເມືອງ ຢູ່ ນະຄອນຫຼວງວຽງຈັນ ປະຈຳ 3 ເດືອນ, ວັນທີ 8 ມັງກອນ 2012 ວ່າ: ກຸ່ມຄົນບໍ່ດີທີ່ເຄື່ອນໄຫວກໍ່ ຄວາມ ບໍ່ສະຫງົບໃນສັງຄົມ ສ່ວນ ຫຼາຍແມ່ນ ກຸ່ມໄວໜຸ່ມ, ໄວຄະ ນອງ ທີ່ມົ້ວສຸມ ນຳຢາເສບຕິດ ແລະ ຂາດວຽກເຮັດງານທຳ ໂດຍນຳໃຊ້ອາວຸດ ແລະ ພາຫະ ນະທີ່ທັນສະໄໝເຊັ່ນ: ປືນ, ມີດ, ງ້າວ, ລົດຈັກ, ລົດໃຫຍ່ ແລະ ອື່ນໆ. ບັນຫາທີ່ພົ້ນເດັ່ນແມ່ນພວກ ເຂົາ ໄດ້ເຄື່ອນໄຫວປຸ້ນຊັບ, ຊີງ ຊັບ, ຂີ້ລັກ-ງັດ ແງະ, ຂ້າເຈົ້າເອົາ ຂອງ, ຄ້າຢາເສບຕິດ, ມົ້ວສຸມຫຼີ້ນ ກິນຝຸມ ເຟືອຍ, ເຕົ້າໂຮມກັນຂີ່ລົດ ເປັນກຸ່ມແກ໋ງ ກວນເມືອງ ເຮັດໃຫ້ ສັງຄົມມີຄວາມແຕກຕື່ນ, ຢ້ານ ກົວ, ຂາດ ຄວາມເຊື່ອໝັ້ນຕໍ່ເຈົ້າ ໜ້າທີ່ຕຳ ຫຼວດພວກເຮົາ.

           ຕາມບົດສະຫຼຸບ 3 ເດືອນ ຜ່ານມາ, ໃນ ນະຄອນຫຼວງວຽງ ຈັນ ໄດ້ກວດກາຂື້ນບັນຊີເປົ້າ ໝາຍທີ່ ກໍ່ຄວາມ ບໍ່ສະຫງົບໄດ້ທັງ ໝົດ 5 ພັນກ່ວາຄົນ, ໃນນີ້ມີເປົ້າ ໝາຍປະເພດໜຶ່ງ 2,860 ຄົນ, ປະ ເພດສອງ 2.233 ຄົນ, ປະເພດ ສາມມີ 746 ຄົນ, ມີລາຍຄະດີເກີດ ຂື້ນທັງໝົດ 449 ເລື່ອງ, ສາມາດ ແກ້ໄຂໄດ້ 197 ເລື່ອງ, ກັກຕົວຜູ້ ກະທຳຜິດໄດ້ 527 ຄົນ, ເດັ່ນກ່ວາ ໝູ່ແມ່ນຄະດີ ຊີງຊັບພົນລະເມືອງ ມີ 51 ເລື່ອງ, ແກ້ໄຂໄດ້ 8 ເລື່ອງ ແລະ ລັກຊັບພົນລະເມືອງ 46 ເລື່ອງ, ແກ້ໄຂໄດ້ 25 ເລື່ອງ ແລະ ຄະດີອື່ນໆ ອີກຈຳນວນໜຶ່ງ.

         ປະກົດການຫຍໍ້ທໍ້ເຫຼົ່ານີ້, ໄດ້ສ້າງຜົນເສຍຫາຍທາງດ້ານ ຊີວິດ, ຊັບສິນເປັນຈຳນວນຫຼາຍ ເຮັດໃຫ້ ສັງຄົມບໍ່ ມີຄວາມສະ ຫງົບ ແລະ ບໍ່ປອດໄພ, ຖ້າພວກ ເຮົາບໍ່ເອົາໃຈໃສ່ແກ້ໄຂ ດ້ວຍ ມາດຕະການທີ່ເດັດ ຂາດ ແລະ ເຂັ້ມງວດແລ້ວກໍຈະເປັນສິ່ງທ້າທາຍ, ເປັນອຸປະສັກໃຫຍ່ຫຼວງທີ່ ກົດ ໜ່ວງການສ້າງສາພັດທະນາ, ເຊິ່ງເປັນຜົນກະ ທົບອັນບໍ່ດີຕໍ່ ລະ ບອບປະຊາທິປະໄຕ ປະຊາ ຊົນລາວຂອງພວກເຮົາໃນ ຕໍ່ໜ້າ ແລະ ຍາວນານ ດັ່ງນັ້ນ ຈຶ່ງຮຽກ ຮ້ອງໃຫ້ທຸກພາກສ່ວນ ເພີ່ມທະວີ ການເຮັດວຽກງານ ປ້ອງກັນ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນ ສັງຄົມຢ່າງຕັ້ງໜ້າ ແລະ ເຂົ້າເຖີງບັນຫາໃຫ້ດີຂື້ນກ່ວາເກົ່າ, ເພາະວ່າເປົ້າໝາຍສິ່ງຫຍໍ້ທໍ້ແມ່ນກະທົບກະເທືອນ ໂດຍ ກົງຕໍ່ຄວາມສະຫງົບ, ຄວາມເປັນ ລະບຽບຮຽບຮ້ອຍໃນ ສັງຄົມ ແລະ ຄວາມສຸກທຸກຂອງປະຊາຊົນ, ເຊິ່ງຕ້ອງໄດ້ແກ້ໄຂຢ່າງເດັດ ຂາດ ໂດຍໄວທັງຮັບປະກັນໃຫ້ ແກ່ຂະ ແໜງການ ແລະ ສະຖານ ທີ່ໆມັກມີປະ ກົດການຫຍໍ້ທໍ້ເກີດ ຂື້ນໃຫ້ໄດ້ຮັບການປັບ ປຸງແກ້ໄຂ ຢ່າງເໝາະສົມ ແລະ ຖືກຕ້ອງ, ແຕ່ຢາກເຮັດໄດ້ຄືແນວນນັ້ນ ການ ປ້ອງກັນສະກັດກັ້ນ ແລະ ແກ້ໄຂ ປະກົດການຫຍໍ້ທໍ້ ຕ້ອງປະຕິບັດຢູ່ ທຸກບ່ອນທຸກທີ່ ພ້ອມທັງເອົາໃຈ ໃສ່ປ້ອງ ກັນເປັນຕົ້ນຕໍ, ຖ້າເກີດຂື້ນຢູ່ບ່ອນໃດບ່ອນນັ້ນຕ້ອງເປັນເຈົ້າການຮີບຮ້ອນແກ້ໄຂຢ່າງເດັດຂາດ ແລະ ທັນການ, ຕ້ອງລະດົມການຈັດຕັ້ງທຸກພາກສ່ວນທັງພາກລັດ ແລະ ເອກະຊົນ, ສະຖາບັນການສຶກສາ, ໂຮງຮຽນຊັ້ນຕ່າງໆ ທັງຫົວໜ່ວຍການຜະລິດ, ທຸລະກິດ, ສະມາຄົມວິຊາຊີບ ແລະ ບ້ານ ລວມເຖີງຄອບຄົວເຂົ້າຮ່ວມໃນວຽກ ງານດັ່ງກ່າວ.