ກອງປະຊຸມລະດັບພາກພື້ນອານມາຕີຈະຈັດຂຶ້ນວັນທີ 57 ມີນານີ້ ຢູ່ນະຄອນຫລວງວຽງຈັນ

    ເພື່ອກະກຽມໃຫ້ແກ່ການເປັນເຈົ້າພາບຈັດກອງປະຊຸມທົບທວນ ລະດັບພາກ ພື້ນ ອາຊີເອີຣົບ ເພື່ອທົບທວນຄືນ 10 ປີ ຂອງການ ຈັດຕັ້ງປະ ຕິບັດແຜນດຳເນີນງານອານມາຕີ ວ່າດ້ວຍການຮ່ວມມືການຂົນສົ່ງຜ່າ ນແດນຂອງກຸ່ມປະ ເທດກຳລັງພັດທະນາທີ່ບໍ່ມີຊາຍແດນຕິດກັບທະເລ (Landlocked Developing Countries LLDCs) ເຊິ່ງຈະຈັດຂຶ້ນ ໃນລະຫວ່າງວັນທີ 57 ມີນາທີ່ຈະເຖິງນີ້, ດັ່ງໃນຕອນບ່າຍຂອງວັນທີ 29 ມັງກອນນີ້, ທີ່ກະຊວງການຕ່າງ ປະເທດ ຄະນະຊີ້ນຳລະດັບຊາດ ໄດ້ຈັດກອງປະຊຸມກະກຽມຂອງຕົນຂຶ້ນ ໂດຍການ ເປັນປະທານຂອງທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າ ການກະຊວງການຕ່າງ ປະເທດ ທັງເປັນປະທານຄະນະຊີ້ນຳລະດັບຊາດໃນການກະກຽມເປັນເຈົ້າພາບກອງປະຊຸມດັ່ງກ່າວ.

    ກອງປະຊຸມທົບທວນລະດັບພາກພື້ນເທື່ອນີ້ ມີຄວາມສຳຄັນເປັນພິເສດ ເນື່ອງຈາກເປັນການຕີລາຄາຄືນໃນຮອບ 1 ທົດສະວັດຜ່ານມາ (2003 ເຖິງ 2013) ກ່ຽວກັບຄວາມຄືບໜ້າໃນການຈັດຕັ້ງ ປະຕິບັດແຜນດຳເນີນງານອານມາຕີ ໂດຍມີເປົ້າໝາຍລວມແນໃສ່ແກ້ໄຂຄວາມຈຳເປັນພິເສດຂອງບັນດາປະເທດພວມພັດທະນາທີ່ບໍ່ມີຊາຍແດນຕິດທະເລ ໂດຍສະເພາະໃນຂົງເຂດວຽກງານທີ່ເປັນບູລິມະສິດກຳນົດໄວ້ໃນແຜນດຳເນີນງານດັ່ງກ່າວ, ຊອກຮູ້ບັນດາອຸປະສັກ, ສິ່ງທ້າທາຍ, ຂໍ້ຄົງຄ້າງ, ມາດຕະການຮ່ວມມືໃນລະດັບພາກພື້ນ ແລະ ສາກົນໃນການຈັດ ຕັ້ງປະຕິບັດແຜນດຳເນີນງານອານມາຕີ ເພື່ອກະກຽມໃຫ້ແກ່ການທົບທວນສາກົນລະດັບສູງ ໃນປີ 2014. ກອງປະຊຸມທົບທວນລະດັບພາກພື້ນດັ່ງກ່າວຈະມີການເຂົ້າຮ່ວມຂອງຄະນະຜູ້ແທນຂັ້ນ ສູງຈາກບັນດາປະເທດພວມພັດທະນາທີ່ບໍ່ມີຊາຍແດນຕິດທະເລຈາກທະວີບອາຊີ ແລະ ເອີຣົບ, ປະເທດທີ່ເປັນທາງຜ່ານ, ປະເທດໃຫ້ທຶນ ແລະ ອົງການຈັດຕັ້ງສາ ກົນ ລວມທັງໝົດ 50 ກວ່າຄະນະ.

    ແຜນດຳເນີນງານອານມາຕີ ໄດ້ຖືກຮັບຮອງເອົາໃນກອງປະ ຊຸມລັດຖະມົນຕີຂອງບັນດາປະເທດພວມພັດທະນາທີ່ບໍ່ມີຊາຍແດນຕິດກັບທະເລ, ປະເທດທາງຜ່ານ, ປະເທດຜູ້ໃຫ້ທຶນ ແລະ ສະຖາບັນການພັດທະນາ ແລະ ການເງິນສາກົນ ທີ່ໄດ້ຈັດຂຶ້ນໃນເດືອນສິງຫາ 2003 ຢູ່ເມືອງອານມາຕີ ປະເທດກາຊັກສະຖານ. ແຜນດຳເນີນງານດັ່ງກ່າວແມ່ນແຜນດຳເນີນການສາກົນສະບັບທຳອິດ ສຳລັບປະເທດພວມພັດທະນາທີ່ບໍ່ມີຊາຍແດນຕິດກັບທະເລ ເພື່ອເປັນບ່ອນອີງໃຫ້ແກ່ການຮ່ວມມືພັດທະນາລະບົບການຂົນສົ່ງຜ່ານແດນທີ່ມີປະສິດທິພາບຢູ່ໃນບັນ ດາປະເທດທີ່ບໍ່ມີຊາຍແດນຕິດທະເລ ແລະ ປະເທດທາງຜ່ານ ໂດຍແນໃສ່ວາງມາດຕະການເພື່ອອຳ ນວຍຄວາມສະດວກດ້ານການຂົນສົ່ງຜ່ານແດນ, ປັບປຸງຂັ້ນ ຕອນການບໍລິການດ້ານການຄ້າ ແລະ ການເກັບພາສີອາກອນ ເພື່ອຫລຸດຜ່ອນຄ່າໃຊ້ຈ່າຍໃນການຂົນສົ່ງຜ່ານແດນ ທັງນີ້ກໍເພື່ອເຮັດໃຫ້ສິນຄ້າຈາກປະເທດທີ່ບໍ່ມີຊາຍແດນຕິດທະເລສາມາດແຂ່ງຂັນໃນຕະຫລາດໂລກ.

    ແຜນດຳເນີນງານອານມາຕີຖືເປັນຜົນງານໜຶ່ງທີ່ສຳຄັນຂອງການເຄື່ອນໄຫວວຽກງານການຕ່າງປະເທດຂອງ ສປປ ລາວ ໃນເວທີສາກົນ, ໃນຖານະທີ່ເປັນປະ ທານກຸ່ມປະເທດດັ່ງກ່າວໃນລະ ດັບສາກົນ ແຕ່ປີ 1998 ເຖິງ 2007 ໄດ້ນຳພາກຸ່ມປະເທດດັ່ງກ່າວເຄື່ອນໄຫວຊຸກຍູ້ໃຫ້ມີການສ້າງແຜນປະຕິບັດງານດັ່ງກ່າວ ເຊິ່ງ ຜ່ານການຮັບຮອງໂດຍອົງການສະຫະປະຊາຊາດ ອັນເປັນການປະກອບສ່ວນໃນການຍົກສູງຖາ ນະບົດບາດຂອງ ສປປ ລາວ ໃນເວທີສາກົນ. ຍ້ອນຜົນງານທີ່ພົ້ນເດັ່ນຄືດັ່ງກ່າວ, ສປປ ລາວ ຈຶ່ງໄດ້ຮັບການເລືອກຕັ້ງຈາກປະເທດສະມາຊິກກຸ່ມໃຫ້ເປັນປະ ທານອີກສະໄໝໜຶ່ງ ເຊິ່ງເລີ່ມແຕ່ປີ 2012 ເປັນຕົ້ນມາ.