ການໃຊ້ນ້ຳໃຕ້ດິນເຂົ້າໃນການຜະລິດກະສິກຳຢູ່ລາວຍັງມີໜ້ອຍ

    ຜູ້ຊ່ຽວຊານດ້ານນ້ຳຈາກປະເທດອົດສະຕຣາລີ ເປີດເຜີຍວ່າ: ຢູ່ລາວການນຳໃຊ້ນ້ຳຈາກໃຕ້ດິນເຂົ້າໃນການຜະ ລິດກະສິກຳຍັງມີໜ້ອຍ ເຊິ່ງໄດ້ເຮັດໃຫ້ຜົນຜະລິດບໍ່ຫລາຍເທົ່າທີ່ຄວນ ເພາະວ່ານ້ຳໃຕ້ດິນສາມາດຕອບສະໜອງ ໃຫ້ແກ່ການຜະລິດໄດ້ຕະຫລອດປີ.

     ທ່ານ ພໍຣ ພາເວີລິກ ຊ່ຽວຊານຈາກສະຖາບັນຄຸ້ມຄອງນ້ຳສາ ກົນ (IWMI) ທີ່ມີຫ້ອງການໃຫຍ່ປະຈຳພາກພື້ນອາ ຊີຕາເວັນອອກ ສຽງໃຕ້ຢູ່ນະຄອນຫລວງວຽງຈັນ ໃຫ້ຮູ້ວ່າ: ສະຖາບັນຄຸ້ມຄອງນ້ຳສາກົນພວມມີໂຄງການວິໄຈໃ ໝ່ເພື່ອຊອກຫາຊ່ອງທາງໃນການນຳໃຊ້ແຫລ່ງນ້ຳໃຕ້ດິນຢູ່ລາວເຂົ້າໃນການຜະລິດກະສິກຳພາຍໃນປະເທດໃຫ້ຫລາຍຂຶ້ນ ເຊິ່ງຈະຊ່ວຍໃຫ້ຊາວກະສິກອນມີສະບຽງອາຫານທີ່ພຽງພໍ ແລະ ມີລາຍຮັບຈາກຜົນຜະລິດຫລາຍຂຶ້ນ.

    ໃນໄລຍະຜ່ານມາ,ການໃຊ້ນ້ຳໃຕ້ດິນຢູ່ລາວແມ່ນມີໜ້ອຍ ແລະ ຍັງຈຳກັດຫລາຍ ເຊິ່ງຜ່ານມາພຽງແຕ່ການ ເຮັດຊົນລະປະທານແບບສວນຄົວຂະໜາດນ້ອຍ ໂດຍອາໄສນ້ຳສ້າງທີ່ສ້າງຂຶ້ນ ເພື່ອສະໜອງນ້ຳພາຍໃນຄອບຄົວ. ນ້ຳໃຕ້ດິນເກືອບມີຢູ່ທຸກແຫ່ງໃນລາວ, ແຕ່ຍັງບໍ່ທັນໄດ້ຮັບການຂຸດຄົ້ນ

ເນື່ອງຈາກຂາດຂໍ້ມູນກ່ຽວກັບພື້ນທີ່ທີ່ສາມາດເຂົ້າເຖິງແຫລ່ງນ້ຳໃຕ້ດິນທີ່ມີຄຸນນະພາບຂອງກະສິກອນ ແລະ ຂາດວິຊາການກະສິກຳ ແລະ ການໃຫ້ຄຳແນະ ນຳ.

    ທ່ານພໍຣກ່າວວ່າ:ໃນຫລາຍປະເທດໃກ້ຄຽງການນຳໃຊ້ນ້ຳໃຕ້ດິນແມ່ນມີຄວາມສຳຄັນຢ່າງຍິ່ງໃນການເຮັດ ຊົນລະປະທານໃນລະດູແລ້ງ ແລະ ເປັນແຫລ່ງ ສະໜອງນ້ຳສຳຮອງໃນການເຮັດຊົນລະປະທານໃນລະດູຝົນ. ນອກ ຈາກນີ້ ລະບົບນ້ຳໃຕ້ດິນຍັງມີຄວາມສ່ຽງໜ້ອຍກວ່າຕໍ່ການປ່ຽນແປງຂອງສະພາບດິນຟ້າອາກາດ.

    ໂຄງການສົ່ງເສີມການນຳໃຊ້ນ້ຳໃຕ້ດິນທີ່ຈະປະຕິບັດຢູ່ລາວນີ້ ແມ່ນໂຄງການລະດັບຊາດ ໂດຍມີການຮ່ວມມືຈາກຫລາຍພາກ ສ່ວນ ຄືກົມຊົນລະປະທານ, ກົມຊັບພະຍາກອນນ້ຳ, ສະຖາບັນຊັບ ພະຍາກອນທຳມະຊາດ ແລະ ສິ່ງແວດລ້ອມ, ມະຫາວິທະຍາໄລແຫ່ງຊາດ, ມະຫາວິທະຍາໄລຂອນແກ່ນ ແລະ ສະຖາບັນຄຸ້ມຄອງນ້ຳສາ ກົນ ໂດຍໄດ້ຮັບການສະໜັບສະໜູນທຶນຈາກສູນຄົ້ນ ຄວ້າກະສິກຳສາກົນແຫ່ງປະເທດອົດສະຕຣາລີ (ACAR) ແຕ່ນີ້ຮອດປີ 2015 ໂດຍຈະເລືອກທົດລອງຂຸດເຈາະຢູ່ແຂວງວຽງຈັນ ເພື່ອເຮັດການປະເມີນເບິ່ງປະລິມານນ້ຳໃຕ້ດິນ ແລະ ລວມໄປເຖິງການພັດທະນາ ແລະ ນຳໃຊ້ເຂົ້າໃນການຜະລິດກະສິກຳແບບຍືນຍົງ.