laophatthananewspaper: ລັດຖະບານຊີ້ຜ່ານມາ ບັນຫາທີ່ດິນວຸ້ນວາຍຍ້ອນການປະຕິບັດນະໂຍບາຍ ແລະ ກົດຫມາຍຍັງບໍ່ທັນເຂັ້ມງວດເທົ່າທີ່ຄວນ

ລັດຖະບານຈະເລັ່ງປັບປຸງນະໂຍ ບາຍແຫ່ງຊາດແຜນແມ່ບົດນຳໃຊ້ທີ່ດິນໃຫ້ສຳເລັດໂດຍໄວ ເພື່ອເປັນບ່ອນອີງໃນການຄຸ້ມຄອງຈັດສັນການນຳໃຊ້ທີ່ດິນ ທັງຈຳກັດຊ່ອງຫວ່າງໃນການຈັບຈອງທີ່ດິນທີ່ຜິດກົດໝາຍ ຫລັງເຫັນວ່າຜ່ານມາບັນຫາທີ່ດິນມີຂໍ້ຂັດແຍ່ງຢ່າງຫລວງ ຫລາຍຈົນກາຍເປັນປາກົດການຫຍໍ້ທໍ້ໃນສັງຄົມແມ່ນຍ້ອນການປະຕິບັດນະໂຍບາຍ ແລະ ກົດໝາຍບໍ່ທັນເຂັ້ມ ງວດ.

ໃນລະຫວ່າງກອງປະຊຸມລັດຖະບານເປີດກວ້າງ ທີ່ຈັດຂຶ້ນໃນທ້າຍປີ 2012 ໂດຍການເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ, ກອງປະຊຸມມີຄຳເຫັນຄ້າຍຄືກັນຕໍ່ປາ ກົດການຫຍໍ້ທໍ້ພົ້ນເດັ່ນຈຳນວນໜຶ່ງທີ່ພວມເກີດຂຶ້ນຢູ່ຫລາຍທ້ອງຖິ່ນ ເຊິ່ງໃນນັ້ນກ່ຽວກັບການພັດ ທະນາ ແລະ ນຳໃຊ້ທີ່ດິນເຫັນວ່າມີບັນຫາພົ້ນເດັ່ນ ຄືຂໍ້ຂັດແຍ່ງຄະ ດີຄວາມກ່ຽວກັບສິດນຳໃຊ້, ສິດໃຊ້ທີ່ດິນຂອງປະຊາຊົນໃນເຂດຕົວເມືອງໃຫຍ່ເພີ່ມຂຶ້ນໃນແຕ່ລະປີ, ການຈັບຈອງ-ຄອບຄອງ ແລະ ຊື້-ຂາຍທີ່ດິນແບບບໍ່ຖືກຕ້ອງຕາມກົດໝາຍ ເປັນຕົ້ນການອອກໃບຕາດິນ, ແຜນທີ່ດິນເກີນອັດຕາທີ່ກົດໝາຍກຳນົດ, ການສວຍໃຊ້ນະໂຍບາຍ 2+3 ເພື່ອເອົາດິນໄປຂາຍ ແລະ ການຈັບຈອງຊື້ເພື່ອເກັງກຳໄລ, ການໃຫ້ສຳປະທານ ແລະ ຫັນຊັບສິນຂອງລັດເປັນທຶນບາງບ່ອນເຮັດບໍ່ຖືກຕ້ອງ ເປັນ ຕົ້ນການພັດທະນາທີ່ດິນເພື່ອໂຄງ ການລົງທຶນໄຟຟ້າ, ການກະເສດບໍ່ໄດ້ສຳຫລວດເຕັມປ່ຽມ

(ສຳຫລວດພຽງ 10-15%) ແຕ່ໄດ້ຕົກ ລົງກວມລວມເຮັດໃຫ້ຊ້ຳຊ້ອນກັບໂຄງການອື່ນໆ, ການຍົກຍ້າຍຈັດສັນຊົດເຊີຍໃຫ້ຜູ້ຖືກຜົນກະທົບມີບາງໂຄງການບໍ່ທັນເປັນເອກະພາບກັນ,ແຕ່ພັດຟ້າວຟັ່ງຕົກລົງປະຕິບັດພາໃຫ້ເກີດມີຄວາມບໍ່ສະຫງົບ, ມີການບຸກລຸກດິນລັດຄຸ້ມຄອງ, ເຂດສະຫງວນ ແລະ ປ່າສະຫງວນ.

ບັນຫາພົ້ນເດັ່ນເຫລົ່ານັ້ນບໍ່ແມ່ນຄວາມຜິດພາດດ້ານນະໂຍບາຍຂອງພັກ, ກົດໝາຍຂອງລັດທີ່ປະກາດໃຊ້ມາກ່ອນ. ນະໂຍບາຍກົດໝາຍທີ່ປະກາດໃຊ້ໂດຍພື້ນຖານແມ່ນຍັງຖືກຕ້ອງສອດຄ່ອງກັບທ່າອ່ຽງລວມຂອງໂລກ ສອດຄ່ອງກັບສະພາບຄວາມເປັນຈິງຂອງປະເທດ, ແຕ່ຫາກແມ່ນການຈັດຕັ້ງປະຕິບັດນະໂຍບາຍ ແລະ ກົດໝາຍເຫລົ່ານັ້ນຍັງບໍ່ທັນດີບໍ່ທັນເຂັ້ມງວດ ແລະ ສັກສິດເທົ່າທີ່ຄວນ. ດັ່ງນັ້ນ ເພື່ອແກ້ໄຂບັນຫາດັ່ງກ່າວ, ກອງປະຊຸມໄດ້ມີຄວາມເປັນເອກະພາບກັນວ່າຕ້ອງຍຶດໝັ້ນໃນແຜນນະໂຍບາຍຂອງພັກ, ກົດໝາຍຂອງລັດທີ່ໄດ້ປະກາດໃຊ້ກ່ອນແລ້ວຢ່າງເຂັ້ມງວດ, ປະຕິບັດໃຫ້ຖືກຂັ້ນຕອນ ດຳເນີນໄປຢ່າງເດັດຂາດຕາມລະບຽບ ແລະ ກົດໝາຍກຳນົດໄວ້ຕໍ່ການຈັບຈອງບຸກລຸກນຳໃຊ້ທີ່ດິນທີ່ບໍ່ຖືກຕ້ອງຕາມລະບຽບກົດ ໝາຍ, ດຳເນີນການກວດກາຄືນບັນດາໂຄງການທີ່ໄດ້ອະນຸມັດໃຫ້ສຳປະທານແລ້ວ ຫລື ພວມປະຕິ ບັດຢູ່ວ່າໄດ້ດຳເນີນຖືກຕ້ອງຕາມຂັ້ນຕອນເປົ້າໝາຍ ແລະ ລະບຽບແລ້ວ ຫລື ບໍ່ ຫລື ມີຜົນກະທົບຮ້າຍແຮງຕໍ່ສິ່ງແວດລ້ອມ ແລະ ສັງຄົມແນວໃດ ເພື່ອມີມາດຕະການແກ້ໄຂຢ່າງມີປະສິດທິຜົນ. ສິ່ງສຳຄັນແມ່ນຮີບຮ້ອນຄົ້ນຄວ້າປັບປຸງນະໂຍບາຍກ່ຽວກັບທີ່ດິນ ເປັນຕົ້ນນະໂຍບາຍແຫ່ງຊາດ, ແຜນແມ່ບົດຈັດສັນນຳໃຊ້ທີ່ດິນໃຫ້ສຳເລັດເພື່ອເປັນບ່ອນອີງໃນການຄຸ້ມຄອງຈັດສັນນຳໃຊ້ທີ່ດິນ, ຈຳກັດຊ່ອງຫວ່າງໃນການຈັບ ຈອງທີ່ດິນທີ່ຜິດກົດໝາຍ. ນອກ ຈາກນີ້ ຕ້ອງເຮັດການສຶກສາອົບ ຮົມແນວຄິດໃຫ້ທົ່ວປວງຊົນເຂົ້າໃຈນິຕິກຳກ່ຽວກັບທີ່ດິນ ໂດຍສະເພາະອົງການປົກຄອງຂັ້ນເມືອງ ແລະ ບ້ານ.