ກອງບັນຊາການ ປກສ ນະຄອນຫລວງວຽງຈັນ ໄດ້ປະກາດແຈ້ງການປິດນຳໃຊ້ເສັ້ນທາງຊົ່ວຄາວຄື: 1.) ຖະໜົນໄກສອນ ພົມວິຫານ
- ວົງວຽນ 450 ປີ - 4 ແຍກ ຂົວຮ່ອງແຊງ (ໄຟແດງຄ້ອຍໂພນເຄັງ); 2.) ຖະໜົນ 23 ສິງຫາ - 4 ແຍກໄຟແດງທາດຫລວງ; 3.) 4 ແຍກໄຟແດງວັດນາໄຊ
- 3ແຍກໜອງບອນ (ລ້ຽວຊ້າຍໄປໄຟແດງທາດຫລວງ) ແລະ 4.) ຖະໜົນກຳແພງເມືອງ - 4 ແຍກໄຟແດງຂົວຮ່ອງແຊງ ຕາມທາງຮ່ອມທີ່ສາມາດເຂົ້າໄປເຖິງເດີ່ນພະທາດຫລວງແມ່ນປິດບໍ່ໃຫ້ຜ່ານຢ່າງເດັດຂາດ.
ທ່ານ ພັຕ ສັງຄົມ
ພົມມະລາດ ຮອງຫົວໜ້າພະແນກຕຳຫລວດຈະລາຈອນ ນະຄອນຫລວງວຽງຈັນ ໄດ້ຖະແຫລງກ່ຽວກັບການປິດນຳໃຊ້ຖະໜົນຕ່າງໆດັ່ງກ່າວ ໃນວັນທີ 30 ພະຈິກນີ້, ຢູ່ຫ້ອງຕຳຫລວດ
ນະຄອນຫລວງວຽງຈັນວ່າ: ເພື່ອຮັບປະກັນໃຫ້ແກ່ການສະເຫລີມສະຫລອງວັນຊາດທີ 2 ທັນວານີ້ ມີຄວາມເປັນລະບຽບຮຽບຮ້ອຍ, ກອງບັນຊາການ ປກສ
ນະຄອນຫລວງວຽງຈັນ ຈຶ່ງໄດ້ອອກແຈ້ງການໃຫ້ຊາບທົ່ວເຖິງກັນດັ່ງນີ້: ເລີ່ມປິດການນຳໃຊ້ຖະໜົນຕ່າງໆຊົ່ວຄາວນັບແຕ່ເວລາ 5:00 ຂອງວັນທີ
2 ທັນວານີ້ ຈົນກວ່າຈະສຳເລັດພິທີການຕ່າງໆໃນວັນດັ່ງກ່າວ, ສຳລັບລົດທີ່ຂົນສົ່ງກ້ອນກຳລັງສວນສະໜາມແມ່ນໃຫ້ຈອດໄວ້ທີ່ສວນປະຕູໄຊ ຫລື ບ່ອນຈອດລົດທີ່ຄະນະກຳມະການສວນສະໜາມກຳນົດໄວ້ໃຫ້ ແລະ ຫ້າມເດັດຂາດນຳໃຊ້ລົດຂົນສົ່ງວັດສະດຸກໍ່ສ້າງປະເພດ: ດິນດຳ,
ດິນແດງ, ຫີນແຮ່, ຊາຍ, ລົດໂມ້ປູນ, ລົດປ້ຳປູນ ແລະ ລົດຂົນສົ່ງອື່ນໆ ເຂົ້າຮັບໃຊ້ໂຄງການກໍ່ສ້າງຕ່າງໆ ໃນຊ່ວງໄລຍະນີ້; ທຸກໆໂຄງການກໍ່ສ້າງຕ້ອງມີຮົ້ວອ້ອມສະໜາມກໍ່ສ້າງ ໄລຍະຫ່າງຂອງແລວຮົ້ວຢ່າງໜ້ອຍ 1,5 ແມັດນັບຈາກຟຸດບາດທາງຍ່າງເບື້ອງນອກ, ມີການກັ້ງບັງອາຄານທີ່ກໍ່ສ້າງໃໝ່, ຫ້າມບໍ່ໃຫ້ວາງວັດສະດຸກໍ່ສ້າງ, ກອງຫີນ-ຊາຍ ແລະ ອື່ນໆ
ໃນເຂດສະຫງວນ, ຖ້າຫາກພົບເຫັນວ່າມີການລະເມີດແມ່ນຈະໄດ້ປະສານກັບອຳນາດການປົກຄອງເມືອງ ແລະ ພາກສ່ວນກ່ຽວຂ້ອງ ເພື່ອດຳເນີນມາດຕະການຕາມລະບຽບກົດໝາຍຢ່າງເຂັ້ມງວດ.
ສຳລັບມວນຊົນທີ່ຈະເຂົ້າຮ່ວມຊົມການສະແດງ ໃນໂອກາດສະເຫລີມສະຫລອງວັນຊາດທີ 2 ທັນ ວານີ້, ເຈົ້າໜ້າທີ່ໄດ້ກຳນົດຂອບເຂດໄວ້ໃຫ້ເປັນທີ່ຮຽບຮ້ອຍແລ້ວ, ທັງນີ້ກໍເພື່ອຄວາມເປັນລະບຽບຮຽບຮ້ອຍດ້ານການສັນຈອນ. ດັ່ງນັ້ນ ຈຶ່ງຮຽກຮ້ອງໃຫ້ທຸກພາກ ສ່ວນໃນສັງຄົມຈົ່ງຮ່ວມມືກັນ ເພື່ອຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດດ້ວຍ.
No comments:
Post a Comment