ພິທີປະກາດຈົບຊັ້ນມັດທະຍົມສຶກສາຕອນຕົ້ນບຳລຸງ ທົ່ວນະຄອນ ຫລວງວຽງຈັນ ໄດ້ຈັດຂຶ້ນໃນວັນທີ 30 ພະຈິກນີ້, ທີ່ໂຮງແຮມດອນຈັນພາເລດ ໂດຍການໃຫ້ກຽດເຂົ້າຮ່ວມຂອງທ່ານຮອງນາຍົກລັດຖະມົນ ຕີ, ລັດຖະມົນຕີວ່າການກະຊວງສຶກສາທິການ ແລະ ກິລາ ພັນຄຳ ວິພາວັນ, ມີທ່ານເຈົ້າຄອງນະຄອນຫລວງວຽງຈັນ, ພ້ອມດ້ວຍຄູອາຈານ-ນັກຮຽນເຂົ້າຮ່ວມເປັນຈຳນວນຫລາຍ.
ໃນພິທີດັ່ງກ່າວ,
ທ່ານ ຊົມພູ
ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ
ໄດ້ລາຍງານຜົນການຈັດຕັ້ງປະຕິບັດການສຶກສາບຳລຸງມັດທະຍົມຕອນຕົ້ນຂອງນະຄອນ ຫລວງວຽງຈັນວ່າ: ເພື່ອບັນລຸແຜນພັດທະນາເສດຖະກິດ-ສັງຄົມຂອງນະຄອນຫລວງວຽງຈັນ 5 ປີ ຄັ້ງທີ
VII (2011-2015) ນີ້,
ປະຊາຊົນໃນນະຄອນຫລວງວຽງຈັນ
ຕ້ອງມີລະດັບການສຶກສາຈົບຊັ້ນມັດທະຍົມຕອນຕົ້ນ, ສະນັ້ນ ພະແນກສຶກສາທິການ ແລະ ກິລາ
ຈຶ່ງໄດ້ວາງແຜນການຄາດໝາຍສູ້ຊົນແຕ່ລະໄລຍະ, ໂດຍຖອດຖອນບົດຮຽນຈາກການເຮັດວຽກງານລົບລ້າງຄວາມບໍ່ຮູ້ໜັງສື ແລະ ບຳລຸງຈົບຊັ້ນປະຖົມມາຜັນຂະຫຍາຍ ແລະ ຈັດຕັ້ງປະຕິບັດຕາມ 6 ຂັ້ນຕອນຄື:
ເກັບກຳສະຖິຕິກຸ່ມເປົ້າໝາຍໃນເກນອາຍຸ 15-35ປີ;
ເຈົ້າເມືອງອອກຂໍ້ຕົກລົງແຕ່ງຕັ້ງຄະນະຮັບຜິດຊອບຈັດການຮຽນ-ການສອນບຳລຸງມັດ ທະຍົມຕອນຕົ້ນໃຫ້ປະຊາຊົນກຸ່ມເປົ້າໝາຍ; ລົງເອົາລາຍຊື່ລະອຽດຢູ່ແຕ່ລະຄອບຄົວ; ວາງແຜນການຈັດຕັ້ງການຮຽນ-ການສອນ, ກະກຽມຕຳລາຮຽນ, ອຸປະກອນຮັບໃຊ້ໃຫ້ແກ່ການຮຽນ-ການສອນຢູ່ແຕ່ລະບ້ານ; ເຕົ້າໂຮມກຸ່ມເປົ້າໝາຍເພື່ອຈັດຕັ້ງການຮຽນ-ການສອນ ແລະ ລົງຕິດຕາມ ແລະ ປະເມີນການຮຽນ-ການສອນ. ຜ່ານການຈັດຕັ້ງປະຕິບັດຕາມຂັ້ນຕອນດັ່ງກ່າວຈຶ່ງເຮັດໃຫ້ເມືອງປາກງື່ມ ເປັນເມືອງທຳອິດຂອງນະຄອນຫລວງວຽງຈັນທີ່ເຮັດສຳເລັດວຽກງານການສຶກສາບຳລຸງມັດທະຍົມຕອນຕົ້ນໃຫ້ກັບປະຊາຊົນໃນກຸ່ມເປົ້າໝາຍ ແລະ ສາມາດປະກາດເປັນທາງການໃນວັນທີ 20 ພຶດສະ ພາ 2014, ຈາກນັ້ນ ບັນດາເມືອງຕ່າງໆ ກໍໄດ້ເຂົ້າຮ່ວມແລກປ່ຽນຖອດຖອນບົດຮຽນ ຈົນສາມາດປະກາດຈົບຊັ້ນມັດທະຍົມຕອນຕົ້ນບຳລຸງໄດ້ຕາມລຳດັບຄື:
ເມືອງປາກງື່ມ ປະກາດໃນວັນທີ 20 ພຶດ ສະພາ 2014 ມີນັກຮຽນທັງໝົດ 1.583 ຄົນ, ເມືອງໄຊເສດຖາ ປະກາດໃນວັນທີ 1 ກໍລະກົດ 2014 ໃນຈຳນວນນັກຮຽນ 315 ຄົນ, ເມືອງນາຊາຍທອງ ປະກາດໃນວັນທີ 14 ສິງຫາ 2014, ມີນັກຮຽນ 1.434 ຄົນ, ເມືອງສີໂຄດຕະບອງ ປະກາດໃນວັນທີ 10 ກັນຍາ 2014, ມີນັກຮຽນ 517 ຄົນ, ເມືອງສີສັດຕະນາກ ວັນທີ 16 ມັງກອນ 2014, ມີນັກຮຽນ 271 ຄົນ, ເມືອງຫາດຊາຍຟອງ ວັນທີ
30 ມັງກອນ 2015, ມີນັກຮຽນ 471 ຄົນ, ເມືອງຈັນທະບູລີ ວັນທີ
27 ມີນາ 2015, ມີນັກຮຽນ 64 ຄົນ, ເມືອງ ໄຊທານີ ປະກາດໃນວັນທີ 7 ເມສາ 2015, ມີນັກຮຽນ 2.908 ຄົນ ແລະ ເມືອງສັງທອງ ປະກາດໃນວັນທີ 22 ກໍລະກົດ 2015, ມີນັກຮຽນ 1.056 ຄົນ, ຊຶ່ງທົ່ວນະຄອນ ຫລວງວຽງຈັນ ມີນັກຮຽນຈົບຊັ້ນປະຖົມສຶກສາບຳລຸງ ທັງໝົດ
8.619 ຄົນ, ຍິງ 4.775 ຄົນ.
ຄຽງຄູ່ກັນນີ້ ວຽກງານການສຶກສານອກໂຮງຮຽນ ກໍເປັນວຽກງານໜຶ່ງທີ່ມີຄວາມຫຍຸ້ງຍາກ ແລະ ສັບສົນພໍສົມຄວນສຳລັບນະຄອນຫລວງວຽງຈັນ ເພາະວ່າກຸ່ມເປົ້າໝາຍສ່ວນໃຫຍ່ແມ່ນເຮັດອາຊີບຫາເຊົ້າ-ກິນຄ່ຳ, ຊາວກະສິກອນ ແລະ ເປັນກຳມະກອນຢູ່ຕາມໂຮງຈັກໂຮງງານ, ແຕ່ຍ້ອນໄດ້ຮັບການຊີ້ນຳ ແລະ ເອົາໃຈໃສ່ຢ່າງໃກ້ຊິດຈາກອົງການປົກຄອງທຸກຂັ້ນ ຈຶ່ງສາມາດຈັດຕັ້ງປະຕິບັດວຽກງານດັ່ງກ່າວໄດ້ມີຜົນສຳເລັດຕະຫລອດມາ. ໃນໄລຍະຜ່ານມາ,
ນະຄອນຫລວງວຽງຈັນ ໄດ້ປະກາດຈົບຊັ້ນປະຖົມສຶກສາບຳລຸງໄປແລ້ວໃນວັນທີ 16 ທັນວາ 2010, ແຕ່ກໍຍັງສືບຕໍ່ວຽກງານບຳລຸງຈົບຊັ້ນປະຖົມ ໃຫ້ແກ່ປະຊາຊົນກຸ່ມເປົ້າໝາຍໃນປີຜ່ານມາໄດ້ 61 ບ້ານ,
ມີຜູ້ເຂົ້າຮ່ວມ 914 ຄົນ, ຍິງ 574 ຄົນ, ພ້ອມນີ້ ຍັງໄດ້ບຳລຸງຍົກລະດັບການສຶກສາຊັ້ນມັດທະຍົມຕອນປາຍໃຫ້ແກ່ພະ ນັກງານ, ທະຫານ, ຕຳຫລວດ ແລະ ຊາວໜຸ່ມຜູ້ທີ່ພາດໂອກາດໄດ້ 550 ຄົນ, ຍິງ 232 ຄົນ ແລະ ວຽກງານດ້ານອື່ນໆ.
ທ່ານຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກິລາ ໄດ້ກ່າວໃນຕອນທ້າຍວ່າ: ໄລຍະຜ່ານມາ,
ບັນດາທ້ອງຖິ່ນໄດ້ສຳເລັດການປະກາດຈົບຊັ້ນປະຖົມສຶກສາບຳລຸງແລ້ວ ແລະ ກໍໄດ້ສືບຕໍ່ຈັດຕັ້ງການຮຽນ-ການສອອນບຳລຸງຊັ້ນມັດທະຍົມຕອນຕົ້ນ ເຊິ່ງມາຮອດປັດ ຈຸບັນມີ 56 ເມືອງທົ່ວປະເທດ ສາມາດປະກາດຈົບຊັ້ນມັດທະຍົມຕອນຕົ້ນທົ່ວເມືອງ ແລະ ມີ
2 ແຂວງໄດ້ປະກາດຈົບຊັ້ນມັດທະຍົມຕອນຕົ້ນບຳລຸງໄດ້ແລ້ວຄື: ແຂວງໄຊຍະບູລີ ປະກາດໃນວັນທີ 27 ກຸມພາ 2015, ແຂວງຊຽງຂວາງ ປະກາດໃນວັນທີ 8 ຕຸລາ 2015 ແລະ ທົ່ວນະຄອນຫລວງວຽງຈັນ ໄດ້ປະກາດໃນວັນທີ 30 ພະຈິກ 2015, ພ້ອມນີ້ ທ່ານຍັງໄດ້ຮຽກຮ້ອງໃຫ້ບັນດາແຂວງໃນທົ່ວປະເທດ ສືບຕໍ່ປະຕິບັດ ແລະ ເລັ່ງປະກາດການຈົບຊັ້ນມັດທະຍົມຕອນຕົ້ນ ແລະ ຕົ້ນປາຍໃຫ້ເປັນລະບົບຕໍ່ເນື່ອງອີກດ້ວຍ.
ຂໍຖາມແດ່ ຍັງມີໂຄງການສອນບໍາລຸງ ນັກຮຽນທີ່ບໍ່ຈົບ ມໍ ຕົ້ນບໍ່ ?
ReplyDeleteຂໍຖາມແດ່ ຍັງມີໂຄງການສອນບໍາລຸງ ນັກຮຽນທີ່ບໍ່ຈົບ ມໍ ຕົ້ນບໍ່ ?
ReplyDelete