ງານສຳມະນາພາຍໃຕ້ຫົວຂໍ້: “ກຽມຄວາມພ້ອມທຸກດ້ານບົນເສັ້ນທາງເຊື່ອມໂຍງເສດຖະກິດກັບສາກົນ” ເປັນກິດຈະກຳໜຶ່ງໃນງານວາງສະແດງຜົນງານ 40 ປີວຽງຈັນ EXPO 2015, ຊຶ່ງຈັດຂຶ້ນໃນຕອນບ່າຍວັນທີ 28 ພະຈິກຜ່ານມາ, ທີ່ສູນການຄ້າໄອເຕັກມໍ, ນະຄອນ ຫຼວງວຽງຈັນ, ໂດຍການເຂົ້າຮ່ວມຂອງທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດທອງລຸນສີສຸລິດ, ມີບັນດາລັດຖະມົນຕີ, ພ້ອມດ້ວຍນັກທຸລະກິດທັງພາຍໃນ ແລະ ຕ່າງປະເທດເຂົ້າຮ່ວມເປັນຈຳນວນຫຼາຍ.
ທ່ານຮອງນາຍົກລັດຖະມົນຕີ ທອງລຸນ
ສີສຸລິດ ໄດ້ມີຄຳເຫັນຕໍ່ງານດັ່ງກ່າວວ່າ: ງານສຳມະນາຄັ້ງນີ້ແມ່ນມີຄວາມສຳຄັນຫຼາຍສຳລັບ ສປປ ລາວ, ເນື່ອງຈາກເປັນເວທີໃນການແລກປ່ຽນຂໍ້ມູນຂ່າວສານ,ຄຳສະເໜີແນະຕ່າງໆຈາກຫຼາຍພາກສ່ວນເພື່ອນໍາໄປສຶກສາວິໄຈ ແລະ ກຳນົດແນວທາງນະໂຍບາຍຂອງການ
ເຊື່ອມໂຍງດ້ານເສດຖະກິດກັບພາກພື້ນ ແລະ ສາກົນ, ຊ່ວຍໃຫ້ທຸກພາກສ່ວນໃນສັງຄົມເຫັນໄດ້ທ່າແຮງ, ຄວາມສາມາດບົ່ມຊ້ອນ, ກາລະໂອກາດ ແລະ ສິ່ງທ້າທາຍຕ່າງໆໃນການກ້າວສູ່ການເປັນປະຊາຄົມເສດຖະກິດອາຊຽນໃນອີກບໍ່ດົນນີ້, ລັດຖະບານລາວເຂົ້າໃຈດີວ່າ: ປະເທດທີ່ມີການເຊື່ອມໂຍງກັບສາກົນເທົ່ານັ້ນຈຶ່ງຈະເຮັດໃຫ້ປະເທດຊາດໄດ້ຮັບການພັດທະນາ ແລະ ສາມາດລຶບລ້າງຄວາມທຸກຍາກຂອງປະຊາຊົນ, ສາມາດສ້າງຄວາມເຂັ້ມແຂງໃຫ້ແກ່ການພັດທະນາຊັບພະ ຍາກອນມະນຸດ, ລວມເຖິງແຫຼ່ງທຶນ,
ເຕັກໂນໂລຊີອັນທັນສະໄໝ,
ການບໍລິການທີ່ດີ, ກໍຄືເຮັດໃຫ້ປະເທດຊາດກ້າວເດີນໄປຄຽງຄູ່ກັບວົງຄະນະຍາດສາກົນໄດ້ຢ່າງເຂັ້ມແຂງ.
ທ່ານຮອງນາຍົກ ທອງລຸນ ສີສຸລິດ ກ່າວວ່າ: ການເຊື່ອມໂຍງເສດຖະກິດຂອງ ສປປ ລາວ ກັບສາກົນໄດ້ເລີ່ມຕັ້ງແຕ່ມີນະໂຍບາຍປ່ຽນແປງໃໝ່ຂອງພັກເພື່ອເປີດປະຕູສູ່ການຮ່ວມມືຕ່າງປະເທດກໍຄືເປີດຮັບການລົງທືນຈາກພາຍນອກ, ເພື່ອສ້າງເງື່ອນໄຂໃຫ້ປະເທດໄດ້ມີການພົວພັນຮ່ວມມືກັບຕ່າງປະເທດໃນດ້ານການຄ້າ, ການລົງທຶນດີຂຶ້ນເທື່ອລະກ້າວ, ຂະນະທີ່ເສັ້ນທາງກ້າວເດີນຂອງອາຊຽນແມ່ນຕ້ອງໄປຕາມວິໃສທັດ ແລະ ເປົ້າໝາຍຂອງອາຊຽນກໍຄືການກ້າວໄປສູ່ເສດຖະກິດທີ່ເປັນໜຶ່ງດຽວ.
No comments:
Post a Comment